Apocalipsis 20:1-15
20 Tan anengneng koy sakey ya anghel ya onleleksab manlapud tawen a sankaegnaan toy tombok na kaaralman tan sakey a baleg a gulonggulong.
2 Tan inerel to so dragon, say daan ya uleg, say Diablo tan Satanas, tan binalor to ed sanlibon taon.
3 Tan sikatoy imbasileng to ed kaaralman tan sinaraan to itan tan sinelyadoan to, pian agto la napalikdo iray nasyon anggad kasumpal na sanlibon taon. Kayari na sarayan bengatla et sikatoy nepeg ya ibulos a magano.
4 Tan akanengneng ak na saray trono, tan walaray akayurong ed saratan, tan niiter ed sikara so pakayari a mangukom. On, anengneng ko iray kamarerwa na saramay pinatey ed wasay lapud pantatasi ra nipaakar ed si Jesus tan pansasalita ra nipaakar ed Dios, tan saramay agnandayew ed atap ya ayep odino ed imahen to tan agmet angawat ed marka diad moling da tan diad lima ra. Tan sikaray abilay tan nanuley bilang arari a kaiba nen Kristo diad sanlibon taon.
5 (Saray arum ya inaatey et ag-abilay anggad kasumpal na sanlibon taon.) Saya so unonan kioli.
6 Maliket tan masanto so siopaman a kabiangan ed unonan kioli; diad sikara et anggapoy pakayari na komaduan ipapatey, balet magmaliw iran saserdote na Dios tan say Kristo, tan manuley ira bilang arari a kaiba to diad sanlibon taon.
7 Tan sano asumpal lay sanlibon taon, ibulos si Satanas ed impakapriso to,
8 tan sikatoy ompaway pian palikdoen to iramay nasyon diad apatiran suyok na dalin, say Gog tan Magog, pian tiponen to ira parad guerra. Say karakel na saraya et singa buer ed dayat.
9 Tan kinmayat ira ed interon dalin tan pinaliberan day kampo na saray masanto tan say inad-aron syudad. Balet pinmelag so apoy manlapud tawen tan sikaray inupot na satan.
10 Tan say Diablo a mamapalikdo ed sikara et imbasileng ed dayat na apoy tan asupre, a ditan so angibasilengan la ed atap ya ayep tan say palson propeta; tan diad agew tan labi et sikaray napairap lawas ed andi-anggaan.
11 Tan anengneng koy sakey a baleg tan amputin trono tan samay akayurong ed satan. Diad arapan to et naandi so dalin tan say tawen, tan agla ra aromog.
12 Tan anengneng ko iray inaatey, saray atagey tan saray abeba, ya akaalagey ed arap na trono, tan walaray alukasan a lukot. Balet walay sananey a lukot ya alukasan; satan so lukot na bilay. Tan diad panamegley na saray akasulat ed saray lukot, saray inaatey et inukom unong ed saray gawa ra.
13 Tan inter na dayat iray inaatey ditan, tan say patey tan Hades* et inter da iray inaatey da, tan saraya so sansakey ya inukom unong ed saray gawa ra.
14 Tan nibantak ed dayat na apoy so patey tan Hades. Say dayat na apoy et mankabaliksan na komaduan ipapatey.
15 Tan siopaman ya ag-akasulat ed libro na bilay et imbantak ed dayat na apoy.
