Apocalipsis 15:1-8
15 Tan anengneng ko ed tawen so sananey nin tanda, a baleg tan makapakelaw, pitoran anghel a walaan na pitoran salot. Sampot la irayan salot, ta diad panamegley na saraya et mangangga la so sanok na Dios.
2 Tan anengneng ko so dayat a singa salming ya alaokan na apoy, tan saramay akatalo ed atap ya ayep tan ed imahen to tan ed numero na ngaran to et akaalagey ira diad dayat a singa salming, a walaan iray arpa na Dios.
3 Tan kakansionen da so kanta nen Moises ya aripen na Dios tan say kanta na Kordero, a kuan da:
“Alay abig tan makapakelaw iray gawam, Jehova a Dios, say Makapanyarin-amin. Matunong tan matua iray dalan mo, Ari ed andi-anggaan.
4 Siopa so ag-ontakot ed sika, Jehova, tan agmangigloria ed ngaran mo, lapud sika labat so matoor? Ta amin a nasyon et ondago tan mandayew ed arapan mo, lapud niparungtal la iray matunong a ganggan mo.”
5 Tan kayari na sarayan bengatla, anengneng ko ya alukasan ed tawen so santuaryo na tabernakulo a kinmana bilang pantasi,
6 tan say pitoran anghel a walaan na pitoran salot et pinmaway ed santuaryo, ya akakawes ira na malinis tan masileng a lienzo tan akabariber ed pagew da iray balitok a balkes.
7 Tan sakey ed saray apatiran mabilay a pinalsa so angiter ed pitoran anghel na pitoran yaong a napno na sanok na Dios, a mabilay ed andi-anggaan.
8 Tan say santuaryo et apano na asewek lapud gloria na Dios tan lapud pakapanyari to, tan anggapo so akaloob ed santuaryo anggad impakasumpal na pitoran salot na pitoran anghel.
