Apocalipsis 9:1-21

9  Tan pinaknol na komaliman anghel so trumpeta to. Tan anengneng kon naplag ed dalin so sakey a bitewen manlapud tawen, tan niiter ed sikato so tombok na abot na kaaralman.  Tan nilukasan to so abot na kaaralman, tan pinmaway so asewek manlapud abot a singa asewek na manliob a hurno, tan binmilunget so agew tan say dagem, lapud asewek ed abot.  Tan manlapud asewek et pinmaway iray duron tan kinmayat ira diad dalin; tan naikdan ira na pakauley, a singa say pakauley a walad saray alakdan ed dalin.  Tan niganggan ira ya agda sasakitan so tanaman ed dalin odino dinanman a birdin dika odino dinanman a kiew, noagta saraman labat so totoon anggapoy tatak na Dios ed saray moling da.  Tan saray duron et agnaabuloyan a mamatey ed sikara, noagta nepeg iran napairap ed limay bulan, tan say pamairap ed sikara et singa panamairap na alakdan sano ketketen na satan so too.  Tan diad saratan ya agew et mananap na paraan iray totoo pian ompatey la ra balet agdan balot naromog itan, tan labay da la komon so ompatey balet ta aarawian ira na patey.  Tan say itsura na saray duron et singara kabayo ya akaparaan lan miguerra; tan diad ulo ra et walaray singa koronan balitok, tan say lupa ra et singa lupa na totoo,  balet say buek da et singa buek na bibii. Tan saray ngipen da et singa saray ngipen na leon;  tan walaray singa balatyang a samben ed pagew da. Tan say tanol na saray payak da et singa tanol na saray karwahe na dakel a kabayon ombabatik pian miguerra. 10  Ontan met, walaray ikol da tan manotot so ketket da a singa saray alakdan; tan walad ikol da so pakayari ran mamasakit ed totoo ed limay bulan. 11  Walay ari ra, say anghel na kaaralman. Diad Hebreo, say ngaran to et Abaddon, balet diad Griego, say ngaran to et Apollyon. 12  Linmabas lay sakey a desyang. Nia! Duara nin desyang so onsabi kayari na sarayan bengatla. 13  Tan pinaknol na komanem ya anghel so trumpeta to. Tan nadngel koy sakey a boses manlapud saray suyok* na balitok ya altar a walad arap na Dios 14  ya angikuan ed komanem ya anghel, a walaan na trumpeta: “Ukbaran mo so apatiran anghel ya abalor diad baleg ya ilog na Eufrates.” 15  Tan naukbaran so apatiran anghel, ya akaparaan la parad satan ya oras tan agew tan bulan tan taon, pian pateyen da so kakatlo ed saray totoo. 16  Tan say bilang na saray armada na saray managkabayo et mamiduan samplon libolibo: Nadngel ko so bilang da. 17  Tan onia so impakanengneng ko ed saray kabayo diad pasingawey, tan ed saramay akakabayo ed saratan: saray samben ed pagew da et ambalanga tan asul tan duyaw; tan saray ulo na saray kabayo et singa ulo na saray leon, tan ompapaway ed sangi ra so apoy tan asewek tan asupre. 18  Lapud sarayan taloran salot, kakatlo ed saray totoo so inatey ed apoy tan asewek tan asupre a pinmaway ed sangi ra. 19  Ta say pakayari na saray kabayo et walad saray sangi ra tan walad saray ikol da; ta saray ikol da et singara uleg tan walaray ulo ra, tan uusaren da iraya ed pamasakit da. 20  Balet arum ed saray totoo ya ag-inatey ed sarayan salot et agnagbabawi ed saray gagawaen da, a tinundaan da la komon so mandayew ed saray demonyo tan saray idolo a balitok tan pilak tan gansa tan bato tan kiew, ya agmakanengneng tan agmakarengel tan agmakaakar; 21  tan agda nagbabawian iray impamatey da tan saray ginagawa ra nipaakar ed espiritismo tan saray impilawanan da tan saray impantakew da.

Paimanod leksab

Apo 9:13 * Saray suyok a singa saklor.