Apocalipsis 8:1-13
8 Tan sanen inekal to so komapiton selyo, dinmeen ed tawen a ngalngali kapalduay oras.
2 Tan anengneng ko so pitoran anghel ya akaalagey ed arap na Dios, tan niiter ed sikara so pitoran trumpeta.
3 Tan sinmabi so sananey ya anghel tan inmalagey ed abay na altar, a walay awit ton balitok a pananginan na insenso; tan naikdan na dakdakel ya insenso pian saya tan saray pikakasi na amin a masanto et niyapay to diad balitok ya altar a walad arap na trono.
4 Tan say asewek na insenso manlapud lima na anghel pati saray pikakasi na saray masanto et amaarap ed Dios.
5 Balet tampol ya inala na anghel so pananginan na insenso, tan pinano to itan na apoy ed altar tan imbantak to diad dalin. Tan kinmarol tan walay nadngel iran boses tan kinmirmat tan yinmegyeg.
6 Tan say pitoran anghel a walaan na pitoran trumpeta et akaparaan lan mamaknol ed saratan.
7 Tan pinaknol na unonan anghel so trumpeta to. Tan niwalay yelo tan apoy ya alaokan na dala, tan pinmelag itan diad dalin; tan apoolan so kakatlo na dalin tan kakatlo na saray kiew tan amin a birdin karikaan.
8 Tan pinaknol na komaduan anghel so trumpeta to. Tan walay singa mandarlang a baleg a palandey a nibantak diad dayat. Tan nagmaliw a dala so kakatlo na dayat;
9 tan inatey so kakatlo na saray pinalsa a walaan na kamarerwa* diad dayat, tan nakneb so kakatlo na saray baloto.
10 Tan pinaknol na komatlon anghel so trumpeta to. Tan sakey a baleg a bitewen a mandarlang a singa sakey a silew so naplag manlapud tawen, tan naplag itan ed kakatlo na saray ilog tan ed saray subol na danum.
11 Tan say ngaran na bitewen et Ahenho.* Tan nagmaliw ya ahenho so kakatlo na saray danum, tan dakel ed saray totoo so inatey ed danum, ta nagmaliw irayan ampait.
12 Tan pinaknol na komapat ya anghel so trumpeta to. Tan say kakatlo na agew tan kakatlo na bulan tan kakatlo ed saray bitewen et kinabil, ta pian ombilunget so kakatlo na saratan tan no agew et agnaliwawaan so kakatlo na satan, tan ontan met no labi.
13 Tan anengneng ko, tan nadngel ko so sakey ya agila ya ontitikyab ed pegley na tawen a kuan to ed maksil a boses: “Kasi la, kasi la, kasi la iramay manaayam ed dalin lapud wala niray nakekeraan a tanol na trumpeta a magano lan paknolen na taloran anghel!”
