L-Aħbar Tajba Skont Mattew 9:1-38
9 Għalhekk telaʼ fuq dgħajsa, qasam għan-naħa l-oħra tal-baħar, u mar fil-belt fejn kien qed joqgħod.
2 Hemmhekk ħadulu raġel ipparalizzat fuq sodda. Meta Ġesù ra l-fidi tagħhom, qal lir-raġel ipparalizzat: “Agħmel kuraġġ ibni! Id-dnubiet tiegħek ġew maħfurin.”
3 U xi skribi qalu bejnhom u bejn ruħhom: “Dan qed jidgħi.”*
4 Peress li Ġesù kien jaf x’kienu qed jaħsbu, qalilhom: “Għala qed taħsbu ħażin dwari?
5 X’inhu l-eħfef, li tgħidlu ‘Dnubietek ġew maħfurin,’ jew li tgħidlu ‘Qum u imxi’?
6 Imma jien, Bin il-bniedem, se nurikom li għandi l-awtorità li naħfer id-dnubiet fuq l-art.” Imbagħad qal lir-raġel ipparalizzat: “Qum, erfaʼ s-sodda tiegħek, u mur id-dar.”
7 U hekk għamel.
8 Malli l-folol raw dan, huma baqgħu mbellhin u faħħru lil Alla, li ta din l-awtorità lil bniedem.
9 Imbagħad Ġesù telaq minn hemm, u ra raġel jismu Mattew bilqiegħda fl-uffiċċju tat-taxxi, u qallu: “Kun dixxiplu tiegħi.” Dan qam u mar warajh.
10 Iktar tard, waqt li kien qed jiekol fid-dar taʼ Mattew, marru hemmhekk ħafna nies li jiġbru t-taxxi u midinbin* u bdew jieklu maʼ Ġesù u d-dixxipli tiegħu.
11 Imma meta l-Fariżej raw dan, staqsew lid-dixxipli tiegħu: “Għala l-għalliem tagħkom qiegħed jiekol maʼ dawk li jiġbru t-taxxi u l-midinbin?”
12 Meta Ġesù sema’ dan, qalilhom: “Dawk li huma f’saħħithom m’għandhomx bżonn tabib, imma dawk li huma morda iva.
13 Mela morru u ifhmu dan il-kliem, ‘Jien ħniena rrid, u mhux sagrifiċċji.’ Għax ma ġejtx biex ngħin lin-nies tajbin jindmu, imma lill-midinbin.”
14 Imbagħad marru għandu d-dixxipli taʼ Ġwanni u staqsewh: “Għala aħna u l-Fariżej insumu imma d-dixxipli tiegħek ma jsumux?”
15 Ġesù wiġibhom: “Il-ħbieb tal-għarus m’għandhomx għalfejn ikunu mdejqin sakemm l-għarus ikun magħhom, hux hekk? Imma meta jiġi ż-żmien li l-għarus jittieħed minn magħhom, huma jsumu.
16 Ħadd ma jsewwi libsa qadima b’biċċa drapp ġdida, inkella l-biċċa drapp ġdida tiġbed id-drapp qadim, u dan iktar jitqattaʼ.
17 U ħadd ma jitfaʼ nbid ġdid fi fliexken tal-ġilda qodma, inkella l-fliexken tal-ġilda jinfaqgħu u ma jibqgħux tajbin u l-inbid joħroġ. Għalhekk, l-inbid ġdid jitpoġġa fi fliexken tal-ġilda ġodda, u b’hekk jibqgħu tajbin it-tnejn.”
18 Waqt li kien qed jgħidilhom dawn l-affarijiet, mar ħdejh mexxej li miel quddiemu u qallu: “Wisq probabbli t-tifla tiegħi diġà mietet s’issa, imma ejja u qiegħed idek fuqha, u hi terġaʼ tieħu l-ħajja.”
19 Imbagħad Ġesù mar warajh mad-dixxipli tiegħu.
20 U huma u sejrin, mara li kienet ilha tbati bit-tnixxija tad-demm għal 12-il sena marret minn wara Ġesù u messitlu t-tarf tal-libsa.
21 Għax hi kienet tgħid bejnha u bejn ruħha li jekk imqar tmisslu l-libsa, tfiq.
22 Ġesù dar, raha, u qalilha: “Agħmel kuraġġ binti! Il-fidi tiegħek fejqitek.” U l-mara fieqet dak il-ħin stess.
23 Meta wasal fid-dar tal-mexxej, hu ra xi nies idoqqu l-flawt u l-folla tibki b’leħen għoli.
24 Ġesù qalilhom: “Oħorġu, għax it-tifla mhix mejta imma rieqda.” Meta semgħu dan, bdew jidħqu bih.
25 Malli l-folla ħarġet, hu daħal fejn kien hemm it-tifla, qabdilha idha, u qamet.
26 Naturalment, din l-aħbar malajr inxterdet f’dawk l-inħawi kollha.
27 Malli Ġesù telaq minn hemm, żewġt irġiel li ma kinux jaraw marru warajh u bdew jgħajtu: “Ħenn għalina, Bin David.”
28 Wara li daħal ġo dar, dawn l-irġiel marru għandu, u hu staqsiehom: “Għandkom fidi li nistaʼ nfejjaqkom?” Huma wiġbuh: “Iva Mulej.”
29 Imbagħad messilhom għajnejhom u qalilhom: “Peress li għandkom il-fidi, se tibdew taraw.”
30 U huma bdew jaraw. Imbagħad Ġesù wissiehom b’leħen sod: “Araw li ħadd ma jsir jaf b’dan.”
31 Imma wara li ħarġu minn hemm, huma xerrdu l-aħbar maʼ kullimkien.
32 Meta kienu sejrin, in-nies ħadulu raġel li ma kienx jitkellem u li kellu demonju fih.
33 Wara li Ġesù keċċa d-demonju, ir-raġel beda jitkellem. Il-folol kienu mbellhin u qalu: “Qatt ma rajna xi ħaġa bħal din f’Iżrael.”
34 Imma l-Fariżej kienu qed jgħidu: “Hu qed ikeċċi d-demonji bis-saħħa tal-mexxej tad-demonji.”
35 U Ġesù mar idur il-bliet u l-irħula kollha jgħallem fis-sinagogi tagħhom, jipprietka l-aħbar tajba tas-Saltna, u jfejjaq kull tip taʼ mard.
36 Malli ra l-folol, hu tħassarhom, għax kienu ttrattati ħażin u mferrxin bħal nagħaġ mingħajr ragħaj.
37 Imbagħad qal lid-dixxipli tiegħu: “Iva, ix-xogħol tal-ħsad hu kbir, imma l-ħaddiema huma ftit.
38 Għalhekk, itolbu bil-ħniena lis-Sid tal-ħsad biex jibgħat iktar ħaddiema ħalli jiġbru l-ħsad tiegħu.”