L-Aħbar Tajba Skont Mattew 14:1-36
14 F’dak iż-żmien, Erodi, il-mexxej tad-distrett* tal-Galilija, semaʼ dwar Ġesù.
2 Hu qal lill-qaddejja tiegħu: “Dan hu Ġwanni l-Għammied. Hu ġie mqajjem mill-mewt, u hu għalhekk li għandu l-qawwa li jagħmel dawn il-mirakli.”
3 Erodi* kien arresta lil Ġwanni, rabtu, u tefgħu l-ħabs minħabba Erodja, il-mara taʼ ħuh Filippu.
4 Hu għamel hekk għax Ġwanni kien jgħidlu: “Skont il-Liġi din il-mara ma tistax tkun tiegħek.”
5 Imma għalkemm xtaq joqtlu, hu kien jibżaʼ min-nies għax lil Ġwanni kienu jqisuh profeta.
6 Meta Erodi għalaq żmienu, hu għamel festa. Fiha, it-tifla taʼ Erodja ħarġet tiżfen, u Erodi tant ħa pjaċir biha
7 li ħalef li jagħtiha kulma titolbu.
8 Imbagħad hi, imħeġġa minn ommha, qalet: “Ġibli ras Ġwanni l-Għammied fuq platt.”
9 Għalkemm ir-re għamel id-dwejjaq, hu kkmanda li jsir hekk għax kien ħalef quddiem il-mistidnin.
10 Għalhekk, bagħat suldat biex jaqtaʼ ras Ġwanni fil-ħabs.
11 Is-suldat ħa ras Ġwanni fuq platt u tah lit-tfajla, u din tatha lil ommha.
12 Iktar tard, id-dixxipli taʼ Ġwanni marru, ħadu l-ġisem tiegħu, u difnuh. Imbagħad marru u qalu lil Ġesù b’dan.
13 Malli semaʼ hekk, Ġesù telaq minn hemm b’dgħajsa lejn post imwarrab biex ikun waħdu. Meta n-nies saru jafu b’dan, huma telqu mill-belt tagħhom u marru warajh bil-mixi.
14 Meta niżel mid-dgħajsa, hu ra folla kbira, tħassarhom, u fejjaq il-morda.
15 Filgħaxija d-dixxipli tiegħu marru għandu u qalulu: “Dan il-post hu mwarrab u diġà sar il-ħin. Ibgħat lill-folol fl-irħula fil-viċin ħalli jixtru xi ħaġa x’jieklu.”
16 Madankollu, Ġesù qalilhom: “M’għandhomx għalfejn imorru. Agħtuhom xi ħaġa tal-ikel intom.”
17 Huma qalulu: “Kulma għandna ħames ħobżiet u żewġ ħutiet.”
18 Qalilhom: “Ġibuhom hawn.”
19 Hu qal lin-nies biex ipoġġu fuq il-ħaxix. Imbagħad ħa l-ħames ħobżiet u ż-żewġ ħutiet, ħares lejn is-sema, u qal talba. Wara, qasam il-ħobż, tah lid-dixxipli, u dawn tawh lin-nies.
20 B’hekk kulħadd kiel u xebaʼ, u b’dak li kien fadal imlew 12-il qoffa.
21 Kien hemm madwar 5,000 raġel li kielu, minbarra n-nisa u t-tfal.
22 Eżatt wara, hu qal lid-dixxipli tiegħu biex jitilgħu fid-dgħajsa ħalli jmorru n-naħa l-oħra tax-xatt qablu, waqt li bagħat lin-nies lejn djarhom.
23 Wara, hu telaʼ waħdu fuq il-muntanja biex jitlob. Hu baqaʼ hemm sa ma dalam.
24 Sadanittant, id-dixxipli kienu fuq id-dgħajsa mijiet taʼ metri ’l bogħod mill-art. Dawn kienu qed jitħabtu mal-mewġ, għax ir-riħ kien kontrihom.
25 Meta kien kważi sebaħ,* Ġesù wasal ħdejhom miexi fuq il-baħar.
26 Meta rawh, id-dixxipli tħawdu u bdew jgħidu: “Din xi viżjoni?” U bdew jgħajtu bil-biżaʼ.
27 Imma Ġesù mill-ewwel qalilhom: “Agħmlu kuraġġ! Jien Ġesù, tibżgħux.”
28 Pietru qallu: “Mulej, jekk int veru Ġesù, ħallini nimxi ħdejk fuq il-baħar.”
29 Hu qallu: “Ejja!” U Pietru niżel mid-dgħajsa u beda jimxi fuq il-baħar lejn Ġesù.
30 Imma meta ra l-maltemp beżaʼ. Xħin beda jegħreq, għajjat: “Mulej salvani!”
31 Ġesù mill-ewwel qabdu minn idu u qallu: “M’għandekx biżżejjed fidi? Għala qed tiddubita?”
32 Wara li telgħu fid-dgħajsa, il-maltempata kkalmat.
33 Imbagħad id-dixxipli li kienu fid-dgħajsa mielu quddiemu u qalulu: “Int bilfors l-Iben t’Alla.”
34 U qasmu għan-naħa l-oħra u niżlu fl-art taʼ Ġennesaret.
35 Malli n-nies tal-post għarfuh, marru jgħidu lin-nies fl-inħawi kollha, u dawn ħadulu lil kull min kien marid.
36 Huma talbuh bil-ħniena biex imqar imissu t-tarf tal-libsa tiegħu, u kull min għamel hekk, fieq għalkollox.
Noti taʼ taħt
^ Letteralment “it-tetrarka.”
^ Jiġifieri Erodi Antipa. Ara Termini tal-Bibbja Spjegati.
^ Letteralment “fir-rabaʼ għassa.” Jiġifieri minn madwar it-3:00 a.m. sakemm titlaʼ x-xemx madwar is-6:00 a.m.