L-Aħbar Tajba Skont Mattew 15:1-39
15 Imbagħad xi Fariżej u skribi telqu minn Ġerusalemm u marru għand Ġesù u qalulu:
2 “Id-dixxipli tiegħek għala ma jżommux mat-tradizzjonijiet taʼ dawk taʼ qabilna? Pereżempju, huma ma jaħslux idejhom* qabel ma jieklu.”
3 Hu wiġibhom: “Intom għala żżommu mat-tradizzjonijiet tagħkom waqt li tiksru l-kmandamenti t’Alla?
4 Pereżempju Alla qal, ‘Irrispetta lil missierek u lil ommok,’ u ‘Kull min joffendi* lil missieru jew lil ommu għandu jinqatel.’
5 Imma intom tgħidu li persuna tistaʼ tgħid lil missierha jew lil ommha li ma tistax tgħinhom, għax dak li għandha diġà hu ddedikat lil Alla bħala rigal,
6 u allura ma jkollhiex għalfejn tirrispettahom. B’hekk, it-tradizzjonijiet tagħkom ġabu l-kelma t’Alla fix-xejn.
7 Ja ipokriti! Sewwa pprofetizza dwarkom Isaija meta qal,
8 ‘Dawn in-nies ifaħħruni bi kliemhom, imma ma jħobbunix.
9 Għalxejn jibqgħu jqimuni, għax dak li jgħallmu hu bbażat fuq dak li jgħidu n-nies, u mhux fuq dak li jgħid Alla.’”
10 Imbagħad qal lin-nies biex imorru ħdejh u qalilhom: “Ejjew ħa titgħallmu u tifhmu.
11 Bniedem ma jitniġġisx b’dak li jiekol, imma b’dak li jgħid.”
12 Imbagħad id-dixxipli marru fuqu u qalulu: “Taf li fixkilt lill-Fariżej b’dak li għedt?”
13 Wiġibhom: “Kull pjanta li ma ħawwilx Missieri tas-sema, se tinqalaʼ mill-għeruq.
14 Tagħtux kashom. Huma nies għomja li jmexxu lil oħrajn. Għalhekk, jekk agħmi jmexxi lil agħmi, it-tnejn jaqgħu fil-ħofra.”
15 Pietru staqsieh: “Tistaʼ tispjegalna?”
16 Għal dan Ġesù qal: “Lanqas intom għadkom ma fhimtu?
17 Ma tafux li kulma tieklu jgħaddi mill-istonku u jispiċċa fid-dranaġġ?
18 Però, kulma tgħid persuna jiġi mill-qalb. Huma dawn l-affarijiet li jniġġsuha.
19 Pereżempju, mill-qalb joħroġ raġunar ħażin li jwassal għal qtil, adulterju, immoralità sesswali,* serq, xhieda falza, u dagħa.*
20 Dawn huma l-affarijiet li jniġġsu bniedem. Imma mhux se jitniġġes għax jiekol mingħajr ma jaħsel idejh.”*
21 Ġesù telaq minn hemm u mar fir-reġjun taʼ Tir u Sidon.
22 Mara mill-Feniċja li kienet toqgħod f’dawk l-inħawi marret titolbu bil-ħniena u b’leħen għoli: “Mulej, Bin David, urini ħniena jekk jogħġbok. It-tifla tiegħi qed tbati ħafna għax għandha demonju fiha.”
23 Imma hu ma qalilha xejn. Allura d-dixxipli ħeġġewh biex jibgħatha ’l hemm, għax kienet se tibqaʼ tgħajjat warajhom.
24 Hu wieġeb: “Alla bagħatni biex ngħin lin-nies t’Iżrael biss, li huma bħal nagħaġ mitlufin.”
25 Imma l-mara marret, mielet quddiemu, u qaltlu: “Mulej għinni!”
26 Hu wiġibha: “Mhux sewwa li tieħu l-ikel tat-tfal u tagħtih lill-klieb żgħar.”
27 Hi qaltlu: “Vera Mulej, imma l-klieb żgħar xorta jieklu mill-frak li jaqaʼ mill-mejda taʼ sidhom.”
28 Imbagħad Ġesù qalilha: “Int għandek fidi kbira. Ħa jsir kif tixtieq.” U t-tifla tagħha fieqet dak il-ħin stess.
29 Wara li Ġesù telaq minn hemm, mar ħdejn il-Baħar tal-Galilija, telaʼ fuq il-muntanja, u qagħad bilqiegħda hemm.
30 Imbagħad folol kbar marru ħdejh, u dawn ħadulu nies li ma kinux jitkellmu, li ma kinux jaraw, zopop, b’diżabbiltà, u ħafna oħrajn, u fejjaqhom.
31 Allura l-folla baqgħet mistagħġba meta rat lil dawk li ma jitkellmux jitkellmu, lil dawk b’diżabbiltà jfiqu, lil dawk li jzappu jimxu, u lil dawk li ma jarawx jaraw. B’hekk, in-nies faħħru lill-Alla t’Iżrael.
32 Imbagħad Ġesù għajjat lid-dixxipli tiegħu u qalilhom: “Qed nitħassarhom lil dawn in-nies, għax diġà ilhom tlett ijiem miegħi u m’għandhomx x’jieklu. Ma rridx nibgħathom lura bil-ġuħ* li ma jmurx jagħtihom xi ħass ħażin fit-triq.”
33 Imma d-dixxipli qalulu: “Aħna qegħdin f’post imwarrab, kif nistgħu nġibu biżżejjed ħobż biex nitimgħu lil dawn in-nies kollha?”
34 Għal dan Ġesù qalilhom: “Kemm għandkom ħobż?” Qalulu: “Sebgħa, u ftit ħut żgħir.”
35 Allura qal lin-nies biex ipoġġu bilqiegħda.
36 Hu ħa s-sebaʼ ħobżiet u l-ħut, qal talba, qasam il-ħobż, beda jagħtihom lid-dixxipli, u dawn tawhom lin-nies.
37 Kulħadd kiel u xebaʼ, u b’li kien għad fadal imlew sebat iqfief kbar.
38 Kien hemm 4,000 raġel li kielu, minbarra n-nisa u t-tfal.
39 Wara li bagħat lin-nies lura, telaʼ fid-dgħajsa u mar fir-reġjun taʼ Magadan.
Noti taʼ taħt
^ Dan jirreferi għal li jnaddfu jdejhom b’mod ċerimonjali skont it-tradizzjoni tal-Lhud.
^ Jew “jobgħod.”
^ Bil-Grieg pornea. Ara Termini tal-Bibbja Spjegati.
^ Dan jirreferi għal li jnaddaf idejh b’mod ċerimonjali skont it-tradizzjoni tal-Lhud.
^ Jew “sajmin.”
