1, 2. Bõe la a Zeova maan yʋʋmd 33 Pãntekotã daare, la ãnd dãmb n lebg a bu-paalgã neba? (Ges-y fotã sẽn be yĩngrã.)

YƲƲMD 33 Pãntekotã daare, Wẽnnaam a Zeova maana bõn-kãsenga. Daar-n-kãnga, a pʋdga a vʋʋsem sõngã neb zutu, tɩ b lebg bu-paalga. Bu-kãng la b sẽn boond tɩ “Israyɛll sẽn yaa Wẽnnaam dẽndã.” (Gal. 6:16) A Abrahaam wakatã tɛka, Wẽnnaam nin-buiidã sʋka, rapã fãa ra segd n kẽe bãongo. La yʋʋmd 33 Pãntekotã tɛka, yɛlã toeemame. A Poll goma bu-paalgã neb yelle, n yeel tɩ bãmb “bãong yaa sũur yelle, Sɩɩg Sõng sẽn maanda.”—Rom 2:29.

² Bu-paalgã pipi neb yɩɩ Kiristã tʋm-tʋmdbã, la a karen-biis koabg la zak sẽn da tigim taab yĩngr doog zug Zerizalɛm. (Tʋʋ. 1:12-15) Wẽnnaam pʋdga a vʋʋsem sõngã b zut tɩ b lebg a kamba. (Rom 8:15, 16; 2 Kor. 1:21) Rẽ wilgame t’a Zeova saka Kiristã maoongã, la tɩ kaool-paalgã ledga tõogã kaoolã. (Luk 22:20; karm-y Hebre dãmb 9:15.) Woto, karen-bi-kãens sẽn paam vʋʋsem sõng zaeebã lebga a Zeova bu-paalgã neba. Vʋʋsem sõngã kɩtame tɩ b moon koɛɛgã buud-goam toor-toor pʋsẽ, tɩ zʋɩf-rãmb la bu-zẽmsã neb nins sẽn  sakd zʋɩf-rãmbã tũudum wʋm koe-noogã. Nin-kãens ra yii Rom soolmã tõr n wa Zerizalɛm n na n maan Pãntekotã. B wʋma karen-biisã sẽn gomd “Wẽnnaam tʋʋm-kãsemsã” yell b buud-goamã pʋsẽ.—Tʋʋ. 2:1-11.

3-5. a) Pãntekotã daare, bõe la a Pɩɛɛr yeel zʋɩf-rãmbã? b) Bõe n maan tɩ bu-paalgã neb sõor tall paasgo?

³ A Zeova kɩtame tɩ tʋm-tʋmd a Pɩɛɛr wilg zʋɩf-rãmbã ne bu-zẽmsã neb nins sẽn sakd zʋɩf-rãmbã tũudmã tɩ b tõe n lebga kiris-neb n naag bu-paalgã neba. Pãntekotã daare, a Pɩɛɛr talla raood n yeel zʋɩf-rãmbã tɩ b segd n tẽ a Zezi sẽn yaa rao ning b sẽn kʋ wã, tɩ bala “Wẽnnaam zẽka bãmb tɩ b yɩ Zu-soaba la Kirist.” Kʋʋngã sẽn sok tɩ bõe la b segd n maanã, a Pɩɛɛr leoka woto: “Bɩ y tek yam n kos sugri, tɩ y ned kam fãa sak koom lisg ne a Zezi Kirist yʋʋr y yel-wẽnã sugr yĩnga, la y reeg Wẽnnaam kũunã sẽn yaa Sɩɩg Sõngã.” (Tʋʋ. 2:22, 23, 36-38) Baraare, na maan neb 3000 n lebg kiris-neb n naag bu-paalgã neba. (Tʋʋ. 2:41) Rẽ poore, tʋm-tʋmdbã kell n moona ne yẽesem, tɩ neb wʋsg sak n lebg kiris-neba. (Tʋʋ. 6:7) Bu-paalgã neb sõor kell n talla paasgo.

⁴ Kaoosg zugẽ, a Zezi karen-biisã tɩ moona Samari nebã. Koe-moond a Filip lisa b wʋsgo, la b pa paam vʋʋsem sõngã zaeeb zĩig pʋgẽ ye. Pipi kiris-nebã taoor lʋɩtb sullã sẽn be Zerizalɛmã tʋma tʋm-tʋmdb a Pɩɛɛr la a Zã Samari saam-biisã nengẽ. B sẽn ta be wã, b “tika bãmb ne b nusi, la bãmb deega Sɩɩg Sõngo.” (Tʋʋ. 8:5, 6, 14-17) Woto, Samari nin-kãens me lebga Israyɛll sẽn yaa Wẽnnaam dẽndã neba.

⁵ Yʋʋmd 36, Wẽnnaam kɩtame t’a Pɩɛɛr sõng neb a taab tɩ b lebg bu-paalgã neba. Yɩɩ wakat ning a sẽn moon Rom soda-naab a Korney ne a roagdbã la a zo-rãmbã koe-noogã. (Tʋʋ. 10:22, 24, 34, 35) Biiblã wilgame t’a Pɩɛɛr sẽn wa n gomdã, vʋʋsem sõngã siga nin-kãensã fãa sẽn pa zʋɩf-rãmbã zutu. “Zũm-rãmbã fãa sẽn tẽed a Zezi sẽn yãag a Pɩɛɛr n wa wã, a linga bãmb fãa Sɩɩg Sõng kũunã sẽn pʋdg bu-zẽmsã zutã yĩnga.” (Tʋʋ. 10:44, 45) Rẽ tɛka, bu-zẽmsã neb ra tõe n lebga bu-paalgã neba.

6, 7. Bõe la bu-paalgã neb maan n wilg tɩ b yaa neb a Zeova sẽn tũus ‘a meng yʋʋrã yĩnga’?

⁶ Pipi kiris-nebã taoor lʋɩtbã sull sẽn wa n tigim taab yʋʋmd 49 wã, karen-biig a Zak yeela woto: “A Sɩmo [a Pɩɛɛr] da wilga yãmb Wẽnnaam sẽn yɩ wãn n tũus nebã bu-zẽms sʋk b meng yʋʋrã yĩnga.” (Tʋʋ. 15:14) Zʋɩf-rãmb la bu-zẽmsã neb n naag  neb nins a Zeova sẽn tũus ‘a meng yʋʋr yĩngã.’ (Rom 11:25, 26) Kaoosg zugẽ, a Pɩɛɛr yeela woto: “Pĩnda, yãmb dag n ka Wẽnnaam neb ye, la moasã, yãmb yaa Wẽnnaam neba.” A wilga tʋʋmd ning bu-paalgã neb sẽn segd n tʋmã, n yeele: “Yãmb yaa buud b sẽn tũusi, la naam maan-kʋʋdba, la buud sẽn welg toor Wẽnnaam yĩnga, neb Wẽnnaam sẽn da tɩ y moon n wilg sẽn bool-a yãmb n yiis likã pʋgẽ, n kẽes-y vẽenem sẽn be ziirã pʋgã tʋʋm sõama wã.” (1 Pɩɛ. 2:9, 10, Kãab-paalgã Koe-noogo) B ra segd n yɩ a Zeova kaset rãmb sẽn moond ne raood n pẽgd-a, la b wilgd nebã tɩ yẽ la yĩngr la tẽng Naaba.

⁷ Ra yaa Israyɛll sẽn yaa Wẽnnaam dẽndã n lebg a Zeova nin-buiidu. Rẽnd a tõe n goma bãmb me yelle, n yeel wa a sẽn da yeel Israyɛll buudã. A ra yeela woto: “Neb nins mam sẽn naan m meng yĩngã na n pẽga maam.” (Ezai 43:21) Pipi kiris-nebã moona ne yẽesem, n wilg tɩ yaa a Zeova bal n yaa Wẽnnaam, la tɩ wẽnnaam-dãmb a taabã ka tar yõod ye. (1 Tes. 1:9) B ra yaa a Zeova la a Zezi kaset rãmb “Zerizalɛm, ne Zide la Samari ne dũniyã tɛk fãa.”—Tʋʋ. 1:8; Kol. 1:23.

8. Bõe la tʋm-tʋmd a Poll yeel n keoog Wẽnnaam nebã?

⁸ A Poll yɩ a Zeova kaset soab sẽn da gomd ne raoodo, n wilgd nebã t’a Zeova bal n yaa Wẽnnaam. A sẽn wa n gomd ne filozof-rãmb sẽn yaa bõn-naands pʋʋsdba, a wilgame t’a Zeova n yaa “Wẽnnaam sẽn naan dũniyã ne bũmb nins fãa sẽn be a pʋgẽ” wã, la t’a ‘yaa yĩngr la tẽng Zu-soaba.’ (Tʋʋ. 17:18, 23-25) Daar a to me, a keooga tigingã nebã, n yeel woto: “Mam miime tɩ mam loogr poore, kata sẽn yaa wẽns na n kẽe yãmb sʋkã n sãam piisã. La neb na n yika yãmb sʋk n zãms nebã sẽn ka sɩda, n belg karen-biisã tɩ b tũ bãmba.” (Tʋʋ. 20:29, 30) Nand tɩ tʋm-tʋmdbã ki menga, sɩdã kɩɩsdb ra zoe n yaa wʋsgo.—1 Zã 2:18, 19.

9. Tʋm-tʋmdbã kũum poore, bõe n maan Wẽnnaam nebã sʋka?

⁹ Tʋm-tʋmdbã kũum poore, sɩdã kɩɩsdb sõor kell n talla paasg tigimsã pʋsẽ, n wa lebg kiris-neb ne yʋʋrã tũudum toor-toorã. Kiris-neb ne yʋʋrã pa neb a Zeova sẽn ‘tũus a yʋʋrã yĩng’ ye. B pʋd n yãka Wẽnnaam yʋʋrã b Biibl-dãmb wʋsg pʋsẽ. Sẽn paase, b maana bũmb wʋsg n paoog Wẽnnaam. Wala makre, b kẽesa bõn-naands pʋʋsdbã yel-maandɩ b tũudmã pʋgẽ, b zãmsa nebã yɛl sẽn pa tik Biiblã zugu, b ra kʋʋda neb zab pʋsẽ, n yetẽ tɩ b zabda Wẽnnaam yʋʋr yĩnga, b tʋma pʋ-lik tʋʋma, la b yo. Woto, yʋʋm kobs pʋgẽ, wẽn-sakdb hakɩkã sõor da yaa bilf tẽngã zugu. Neb sẽn sigl a Zeova yʋʋrã yĩng ra ka be ye.

10, 11. a) Ki ne nadens yel-bũndã pʋgẽ, bõe la a Zezi wilg-yã? b) Wãn to la a Zezi goamã pids yʋʋmd 1914 poore?

¹⁰ A Zezi yel-bũnd ning sẽn gomd ki la nadens yellã pʋgẽ, a wilgame tɩ sɩdã kɩɩsg na n wa kɩtame tɩ nebã pa le tõe n bãng tũudum hakɩkã neb n bak nana-nana ye. A yeelame tɩ ‘nebã gõeem wakate,’ a Sʋɩtãan da na n fẽrga nadens pʋʋg ning pʋgẽ Ninsaal Biigã sẽn fẽrg ki wã. Ki wã ne nadensã ra na n naaga taab n bɩ hal n tãag “dũniyã sɛɛb wakate.” A Zezi wilgame tɩ “bõn-buud sõma” wã yaa Rĩungã  kamba, la tɩ “nadensã” yaa “wẽng soabã kamba.” Dũniyã sɛɛb wakate, Ninsaal Biigã na n tʋma “tigsdbã” sẽn yaa malɛgsã tɩ b welg ki wã ne nadensã. Rẽ poore, malɛgsã na n tigma Rĩungã kambã. (Mat. 13:24-30, 36-43) Wãn to la gom-kãensã pids-yã? La wãn to la rẽ kɩt t’a Zeova le paam neb sẽn sigl n tũud-a tẽngã zugu?

¹¹ ‘Dũniyã sɛɛb wakat’ sɩnga yʋʋmd 1914. Wakat kãng tɩ kiris-neb nins sẽn paam vʋʋsem sõng zaeebã yaa tus a wãn bala. Zabr ning sẽn sɩng yʋʋm-kãngã sasa tɩ Rĩungã kamb ra ket n bee Babilon-kãsengã yembd pʋgẽ. La yʋʋmd 1919 wã, a Zeova yiis-b-la yembdẽ wã, tɩ nebã tõe n bãng kiris-neb hakɩkã n bak ne kiris-neb ne yʋʋrã. A tigim-b lame tɩ b lebg buud a sẽn sigli. Woto pidsa a Ezai bãngr-gomde. A ra yeelame: “Tẽng tõe n doga daar a ye pʋgẽ bɩ? Buud tõe n doga wakat a ye pʋgẽ bɩ? Tɩ bõe, rogem sẽn sɩng n yik Siõ, a roga kamba.” (Ezai 66:8) Vɛrse kãngã pʋgẽ, Siõ makda a Zeova siglgã babg ning sẽn be yĩngrã sẽn yaa malɛgsã. A Zeova kamb nins sẽn paam vʋʋsem sõng zaeebã sẽn wa n sigl n lebg buudã, d tõe n yeelame tɩ Siõ “roga kamba.”

12. Bõe la sẽn paam-b vʋʋsem sõng zaeebã maand tɩ wilgdẽ tɩ b yaa neb a Zeova sẽn tũus ‘a meng yʋʋrã yĩnga’?

¹² Rĩungã kamb sẽn paam vʋʋsem sõng zaeebã me yaa a Zeova kaset rãmb wa pipi kiris-nebã. (Karm-y Ezai 43:1, 10, 11.) B yaa toor ne neb a taabã, bala b yel-manesmã yaa sõma. Sẽn paase, b moonda Rĩungã koe-noogã tɩ yaa ‘kaset buudã fãa yĩnga.’ (Mat. 24:14; Fil. 2:15) Woto, b sõnga neb milyõ-rãmb tɩ b lebg nin-tɩrs a Zeova nifẽ.—Karm-y Daniɛll 12:3.

13, 14. Bõe la neb nins sẽn pa paam vʋʋsem sõng zaeebã segd n maan n tõog n tũ a Zeova tɩ ta a yam? Biiblã bãngr-gom-bʋs n gomd rẽ yelle?

¹³ Sõsg ning sẽn loogã wilgame tɩ pĩnd wẽndẽ wã, a Zeova ra sakda  bu-zẽmsã neb nins sẽn da naagd a nin-buiidã n tũud-a wã. (1 Rĩm 8:41-43) Rũndã-rũndã, neb nins sẽn pa paam vʋʋsem sõng zaeebã me segd n naaga a Zeova Kaset rãmb nins sẽn paam vʋʋsem sõng zaeebã n tũ-a.

¹⁴ Hal sẽn kaoose, no-rɛɛsdb a yiib n deng n togs tɩ neb wʋsg na n naaga a Zeova nin-buiidã n tũ-a. A Ezai yeela woto: “Buud wʋsg na n kẽnga be n tɩ yeele: ‘Wa-y tɩ d kẽng Zu-soabã tãng zugu, n ta a Zakoob Wẽnnaamã roogẽ tɩ b zãms tõnd bãmb soaya, tɩ d tũ bãmb so-bugsi.’ Tɩ bõe, bãmb tõog na n yii Siõ n saage, la Zu-soabã goamã na n yii Zerizalɛm.” (Ezai 2:2, 3) A Zakari me yeelame tɩ “neb wʋsg ne bu-kãsems na n waa Zerizalɛm n wa waoog Saasẽ-pãng-soabã n kos bãmb barka.” Nin-kãens na n yɩɩ “bu-zẽms piig sẽn yaa buud toor-toor” neba. B na n naaga Israyɛll sẽn yaa Wẽnnaam dẽnda n tũ a Zeova. B na n yeela woto: “Bas-y tɩ d tũ yãmb n kẽnge, bala, tõnd wʋmame tɩ Wẽnnaam bee ne yãmba.”—Zak. 8:20-23.

15. Tʋʋm-bʋg la ‘piis a taabã’ tũud Israyɛll sẽn yaa Wẽnnaam dẽndã n tʋmdẽ?

¹⁵ A Zezi ‘piis a taabã’ tũuda Israyɛll sẽn yaa Wẽnnaam dẽndã neb n moond Rĩungã koe-noogã. (Mark 13:10) Bãmb me naaga Wẽnnaam nin-buiidã, tɩ bãmb ne sẽn paam-b vʋʋsem sõng zaeebã yaa “yãgr a yembre,” n sakd ‘pe-kɩɩm-sõng’ a Zezi Kirist.—Karm-y Zã 10:14-16.

16. Bõe la a Zeova na n maan tɩ to-kãsengã ta a zug tẽn-sʋka?

¹⁶ Babilon-kãsengã sãoong poore, Wẽnnaam nin-buiidã bɛɛb na n zaba ne-ba. Wakat kãnga, na n yɩɩ tɩlae tɩ d paam a Zeova koglg n tõog n põse. Sẽn mik tɩ zab-kãng n na n kɩt tɩ to-kãsengã ta a zug tẽn-sʋkã, yaa a Zeova meng n na n yãk wakat ning b sẽn na n zab ne a nin-buiidã, la rẽ sẽn na n yɩ to-to. (Mat. 24:21; Eze. 38:2-4) A Goog na n yik n zaba ne a nebã sẽn yaa “neb nins sẽn da yi tẽns a taab pʋsẽ n tigim” taabã. (Eze. 38:10-12) A sã n wa yik zabrã, a Zeova na n yɩɩ tao-tao n fãag a nin-buiidã la a zab ne a Goog la a poorẽ dãmbã. A Zeova na n wilgame tɩ yẽ n yaa yĩngr la tẽng Naaba, la t’a yʋʋrã zemsa ne pẽgre. A yeela woto: “Mam na n wilgame tɩ m yaa kãsenga, la m yaa sõngo, la m na n kɩtame tɩ buud wʋsg bãng mam sẽn yaa a soaba. B na n bãngame tɩ mam yaa Zu-soaba.”—Eze. 38:18-23.

17, 18. a) A Goog sã n wa yik zabrã, bõe la a Zeova na n yeel a nin-buiidã? b) D sã n dat n paam a Zeova koglgo, bõe la d segd n maane?

¹⁷ A Goog sã n wa yik zabrã, a Zeova na n yeela a nin-buiidã woto: “Mam neba, kẽng-y-yã, kẽ-y rotẽ wã n pag kʋɩlemse. Soond-y wakat bilfu, hal tɩ sũ-puugrã wakat looge.” (Ezai 26:20) Wakat kãnga, a Zeova na n kõ-d-la sagls d sẽn segd n tũ n paam koglgo. Wõnda d tigimsã naaga rot nins pʋsẽ d sẽn segd n kẽ n paam koglgã.

¹⁸ Rẽnd d sã n dat n paam a Zeova koglg to-kãsengã sasa, d segd n sak n deegame t’a tara nin-buiid tẽngã zugu, la t’a sigl-b lame tɩ b be tigims pʋsẽ. D segd n paa ne a Zeova nin-buiidã, la d tigimd ne d tigingã neb wakat fãa. Bɩ d rɩk yɩɩl-gʋlsdã togs-n-taare, n yeel ne d sũur fãa woto: “Fãagr yaa Zu-soabã n so. Bɩ yãmb barkã zĩnd yãmb nebã zutu.”—Yɩɩl 3:9.