Mu Fanga Cwañi ba Bañwi Kelezo?

Kana se mu kile mwa kupiwa ku fa batu ba bañwi kelezo? Ka mutala, kana se mu kile mwa buziwa lipuzo ze cwale ka za kuli: ‘Ni swanela ku ezañi? Kana na swanela ku ya kwa mukiti wo? Kana na swanela ku eza musebezi wo? Kana na swanela ku eza siango ni mutu yo ka mulelo wa kuli ite lu nyalane ni yena?’

Batu ba bañwi ba kana ba mi kupa kuli mu ba tuse ku eza likatulo, ili likatulo ze kana za ama swalisano ya bona ni balikani ba bona, lubasi lwa bona, hamohocwalo ni Jehova. Ne mu ka ba alaba cwañi? Mu fanga cwañi batu ba bañwi kelezo? Ku si na taba kuli taba ye ambolwa i bonahala ku ba ye tuna kamba ye nyinyani, Liproverbia 15:28 i bulela kuli: “Pilu ya mutu ya na ni niti i ikupula kalabo.” Ha mu nyakisise mo likuka ze ketalizoho za Bibele ze latelela li kona ku mi tuseza ku fa kelezo.

1 Mu Zibe Muinelo Luli.

“Ya alaba a si ka utwisisa pili, u iponisa bukuba, mi u ipatela maswabi.”—LIPROV. 18:13.

Kuli lu kone ku fa kelezo ye nde, lu lukela ku utwisisa miinelo ni mubonelo wa mutu yo ya tokwa tuso. Lu nge kuli mutu yo muñwi u mi kupa kuli mu mu kakanyeze nzila ye nde ye liba kwa ndu ya mina, ne mu ka tokwa ku ziba lika mañi ilikuli mu kone ku mu tusa? Kana ne mu ka mu kakanyeza nzila ye nde ya ku itusisa mu si ka ziba kale kuli u inzi kai? Ne mu si ke mwa eza cwalo! Ka nzila ye swana, kuli mu fe mutu kelezo ye nde, mu tokwa ku ziba pili miinelo ni mubonelo wa hae. Kana ku na ni miinelo ye miñwi ye kona ku mu palelwisa ku latelela kelezo ye ne lu kana lwa mu fa? Haiba lu sa zibi hande muinelo wa li ku ona mutu yo, lu kana lwa mu fa kelezo ye ka mu lyanganisa hahulu ni ku fita.—Luka 6:39.

Mu Buze Mutu ye mu Bata ku Tusa Kuli ki Lifi Lipatisiso za sa Ezize. Neikaba hande ku buza mutu yo ya kupa kelezo lipuzo ze cwale ka za kuli: “Ki likuka lifi za Bibele ze mu hupula kuli za kona ku mi tusa?” “Ki bufi bunde kamba bumaswe bo bu kona ku zwa mwa liketo za mina?” “Ki lifi lipatisiso ze se mu ezize?” “Ki lituso lifi ze se mu filwe ki baana-bahulu ba mwa puteho, bashemi ba mina, kamba ba ba mi zamaiseza tuto ya Bibele?”

Likalabo za mutu yo kwa lipuzo ze fahalimu li kana za lu tusa ku ziba buikatazo bwa sa ezize ilikuli a fumane kalabo ya puzo ya hae. Mi kelezo ye lu ka mu fa i ka ama ni kwa litaba ze se ba mu bulelezi kale batu ba bañwi. Mi hape ne lu kana lwa lemuha haiba mutu yo ya kupa kelezo u bata feela muelezi ya ka ‘mu bulelela litaba za lata ku utwa mwa lizebe za hae.’—2 Tim. 4:3.

2 Mu si ke Mwa Matukela ku fa Likalabo.

“Mutu kaufela u lukela ku ba ya teeleza kapili, ya sa akufi ku bulela.”—JAK. 1:19.

Ka mulelo wa ku bata ku tusa, lu kana lwa matukela  ku fa likalabo. Kono kana ku eza cwalo kwa swanela, sihulu haiba lu ambola fa taba ye ñwi ye lu si ka eza hande lipatisiso ka za yona? Liñolo la Liproverbia 29:20 li bulela kuli: “Kana u lemuhile mutu ya sa ikupuli kwa ku bulela? Litanya li ka sepisa ku fita yena.”

Mu bone teñi kuli muhato o mu nga ka nako kaufela wa lumelelana ka ku tala ni butali bo bu zwa ku Mulimu. Mu ipuze kuli: ‘Kana munahanelo ni “moya wa lifasi” li amile munahano wa ka?’ (1 Makor. 2:12, 13) Mu hupule kuli ku ba feela ni milelo ye minde ha ku si ka likana. Muapositola Pitrosi ha sa zibile ka za butata bwa naa ka kopana ni bona Jesu mwa musebezi wa hae, a eleza Jesu kuli: “Mulena, ha ku ikutwele butuku; taba yeo ha i na ku ezahala ku wena.” Lu kona ku itutañi kwa kelezo ya Pitrosi ku Jesu? Lu ituta kuli haiba lu sa tokomeli, nihaiba mutu ya na ni niti u kona ku lu susueza ku ba ni ‘mihupulo ye si ya Mulimu, kono ya batu.’ (Mat. 16:21-23) Ki kwa butokwa ku nahanisisa lu si ka bulela kale! Esi mane zibo ya luna ki ye nyinyani hahulu ha i bapanywa kwa butali bwa Mulimu.—Jobo 38:1-4; Liprov. 11:2.

3 Mu Sebelise Linzwi la Mulimu ka Buikokobezo.

“Ha ni ikezezi lika ili na; kono ni bulela lika ze, ka mwa ni lutezi Ndate.”—JOA. 8:28.

Kana ne mu ka eleza mutu yo muñwi ka ku bulela kuli “kambe ki na wena, ne ni ka . . . ”? Niha ne mu ka ziba kalabo kwa puzo ye buzizwe, neikaba hande ha ne mu ka ituta se siñwi kwa mutala wa buikokobezo ni buishuwo wa naa lu tomezi Jesu. Niha naa na ni butali hahulu ni yeloseli ku fita mutu ufi kamba ufi, Jesu naa ize: “Ha ni si ka ipulelela ka ili na feela, kono yena Ndate . . . u ni file taelo ya se ni swanezi ku bulela ni ku luta.” (Joa. 12:49, 50) Lituto ni likelezo za Jesu kamita ne li tomile fa tato ya Ndatahe.

Ka mutala kwa liñolo la Luka 22:49 lu bala kuli balutiwa ba Jesu ne ba mu buzize ka za haiba ne ba swanela ku mu lwanela ha naa tuha a tamiwa. Yo muñwi wa balutiwa ba Jesu naa itusisize mukwale. Mu lemuhe kuli mwa taba ye swana ni yeo ili ye ñozwi kwa Mateu 26:52-54, ku bonisizwe kuli Jesu niha naa talimani ni miinelo ye taata ya ku lwaniswa, naa tandile nako ya ku ikambota ni balutiwa ba hae ka za tato ya Jehova. Bakeñisa kuli naa ziba likuka ze fumaneha kwa liñolo la Genese 9:6 ni bupolofita bo bu kwa Samu 22 hamohocwalo ni bo bu kwa Isaya 53, Jesu naa konile ku fa ketelelo ye nde ili yeo ku si na ku kakanya ne i pulusize batu ni ku tabisa Jehova.

  4 Mu Itusise Sifalana sa Lihatiso za Luna.

“Ki mañi luli mutanga ya sepahala ya na ni kutwisiso, yo Mulenaa hae a mu ketile ku babalela batanga ba hae, ku ba fa lico za bona ka nako ye swanela?”—MAT. 24:45.

Jesu u ketile sitopa se si sepahala sa mutanga ili se si aba lico za butokwa za kwa moya. Ha mu fa ba bañwi kelezo ni ketelelo ye ama litaba za butokwa, kana mwa tandanga nako ya ku eza lipatisiso ka ku tala mwa lihatiso ze tomile fa Bibele?

Mukoloko wa litaba o fumanehanga fa likepe la mafelelezo la Tawala ya Mulibeleli ya December 15 u na ni litaba ze ñata ze kona ku mi tusa. Hape mwa kona ku kupa mutu yo muñwi kuli a mi tuse ku fumana litaba za butokwa mwa sifalana sa lihatiso sa Watchtower Library ya Sikuwa. * Ne ku si ke kwa ba hande ku sa itusisa sifumu seo sa litaba za kwa moya! Mwa lihatiso za luna ku fumaneha litaba ze ñata ze kona ku tusa mutu ya bata kelezo. Kana mu na ni buikoneli bwa ku tusa batu ba bañwi ku batisisa likuka za Bibele ni ku nahanisisa ze li bulela Linzwi la Mulimu? Sina feela mapa ha i kona ku tusa mutu ku ziba sibaka sa li ku sona ni ku mu bonisa nzila kwa libile, lihatiso ze itusiswa kwa ku eza lipatisiso ni zona za kona ku tusa mutu ku ziba nzila ya li ku yona ni ku lemuha mwa kona ku zwelapili ku ba mwa nzila ye isa kwa bupilo.

Baana-bahulu ba bañata se ba tusize bahasanyi ku batisisa litaba ka ku itusisa mukoloko wa litaba o fumanehanga fa likepe la mafelelezo la Tawala ya Mulibeleli ya December 15 kamba sifalana sa lihatiso sa Watchtower Library se si fa litapa la CD-ROM. Ku eza cwalo ku tusize mizwale ni likaizeli ba bona ku utwisisa Mañolo. Tuso ye cwalo ye fiwa kwa bahasanyi ha i ba tusi feela ku tatulula lipilaelo ze ba na ni zona ka nako yeo kono hape li ba tusa ku ba ni mukwa wa ku ezanga lipatisiso ni ku itinga fa lika za kwa moya za lu lukiselize Jehova. Ka nzila ye cwalo, bahasanyi ba ‘itusisa maata a bona a ku lemuha, e ba twaelize ku taluhanya ze lukile ku ze si ka luka.’—Maheb. 5:14.

5 Mu Ambuke ku Ezezanga ba Bañwi Likatulo.

“Mutu ni mutu u ka itwalela mulwalo wa hae.”—MAGAL. 6:5.

Mutu ni mutu u ka tokwa ku iketela kelezo ya ka latelela. Jehova u file mañi ni mañi wa luna tukuluho ya ku iketela ku etelelwa kamba ku sa etelelwa ki likuka za hae. (Deut. 30:19, 20) Miinelo ye miñwi i ama likuka li sikai za Bibele, mi mutu ya bata kelezo u ka tokwa ku iketela sa lukela ku eza. Ku likana ni fo i kuma taba kamba buhulu bwa mutu ya bata kelezo, ne lu kana lwa ipuza hape kuli, ‘Kana luli ni na ni maata a ku alaba puzo ye?’ Neikaba hande ku taluseza baana-bahulu ba puteho litaba ze ñwi, kamba haiba ya bata kelezo ki mwanana, neikaba hande kuli a buze bashemi ba hae.

[Litaluso za kwatasi]

[Caption on page 8]

Za ku Eza ka Nako ya ku Lapela Sina Lubasi

Ka nako ya ku lapela sina lubasi, kiñi ha mu sa lukisi kuli mu ezange lipatisiso za ku fumana likalabo kwa lipuzo ze mu sa zo buziwa cwanoñu fa? Ki lifi litaba za mwa lihatiso za luna ni likuka za mwa Bibele ze mu kona ku itusisa ili ze kona ku tusa mutu ya buza lipuzo ze cwalo? Ka mutala, mu nge kuli muzwale kamba kaizeli yo muñwi u mi buza ka za ku ba mwa libato ni mutu yo muñwi ka mulelo wa kuli ite ba nyalane. Ha mu itusisa mukoloko wa litaba o fumanehanga fa likepe la mafelelezo la Tawala ya Mulibeleli ya December 15, mu bone tutohonyana twa litaba to tu li “Litaba za ku Ituta” kamba “Bupilo ni Tulemeno Twa Sikreste.” Hape mwa kona ku fumana litaba ze tusa ka ku itusisa sifalana sa lihatiso sa Watchtower Library se si fa litapa la CD-ROM ya Sikuwa ka ku apula fa toho ya taba ye li Publications Index kihona mu ka ya fa taba ye li “Dating” (Libato) kamba “Marriage” (Linyalo).

[Caption on page 9]

Bakeñisa litukiso za lu file Jehova ka kopano ya hae, lwa kona ku fa ni ku amuhela likelezo ze nde. Liñolo la Muekelesia 12:11 li bulela kuli: “Manzwi a ba ba butali a swana sina miwayo; linguli ze kopanyizwe li swana sina limapo ze kokotezwi, ze tiile. Li zwa ku Mulisana a li muñwi.” Sina “miwayo” ili tukota to tu shengilwe to ne tu itusiswanga kwa ku etelela mutapi wa limunanu, likelezo ze nde, ze fiwa ka lilato li etelelanga ba ba na ni niti mwa nzila ye lukile. “Limapo ze kokotezwi” li tiisa miyaho. Ka nzila ye swana, kelezo ye nde i kona ku tahisa ze nde. Ba ba butali ba fumana tabo sakata ka ku nyakisisa “linguli ze kopanyizwe” ili ze bonisa butali bwa “Mulisana a li muñwi” wa bona, yena Jehova.

Mu likanyisange Mulisana yo ha mu fa ba bañwi kelezo. Ki tohonolo hakalo ku teeleza ku ba bañwi hamohocwalo ni ku ba fa kelezo ye tusa fo lu konela ku eza cwalo kaufela! Haiba likelezo za luna kamita li toma fa likuka za Bibele, likelezo zeo li ka ba ze nde mi li ka tusa batu ba ba li amuhela ku ya ku ile.