ఈ సన్నివేశాన్ని ఊహించుకోండి: బ్రియన్‌తోపాటు చదువుకునే ఇద్దరు అబ్బాయిలు, అతని వైపే వస్తున్నారు. బ్రియన్‌ చాలా కంగారు పడుతున్నాడు. ఎందుకంటే, అతనితో సిగరెట్‌ తాగించాలని వాళ్లు ఇప్పటికే రెండుసార్లు ప్రయత్నించారు. ఇది మూడోసారి.

అందులో ఒక అబ్బాయి ఇలా అన్నాడు:

ఫ్రెండ్‌ అనే మాటని నొక్కిచెప్తూ, జేబులోనుండి ఏదో తీసి బ్రియన్‌కు ఇవ్వబోయాడు.

ఏంటా అని చూస్తే, జేబులో నుండి ఒక సిగరెట్‌ బయటికి తీశాడు. బ్రియన్‌కు గుండెల్లో రైళ్లు పరిగెత్తాయి.

బ్రియన్‌ స్థానంలో మీరుంటే ఏం చేస్తారు?

ఆ ఇద్దరు అబ్బాయిలు బాగా ఆలోచించే ఆ పని చేస్తున్నారా? వాళ్లకై వాళ్లే అలా చేస్తున్నారా? కాకపోవచ్చు. నిజానికి వాళ్లు ఇతరుల ప్రభావానికి లొంగిపోవడం వల్ల అలా చేస్తున్నారు. వాళ్లు, ఇతరుల్ని మెప్పించాలనే ఉద్దేశంతో, ఇతరుల ఇష్టాలకు తగ్గట్టు ప్రవర్తిస్తున్నారు.

మీకూ అలాంటి పరిస్థితే వస్తే, మీరెలా తోటివాళ్ల ఒత్తిడిని ఎదుర్కోవచ్చు?

1. ముందుగానే ఊహించండి

   బైబిలు ఇలా చెప్తుంది: “బుద్ధిమంతుడు అపాయము వచ్చుట చూచి దాగును జ్ఞానములేనివారు యోచింపక ఆపదలో పడుదురు.”—సామెతలు 22:3.

   చాలావరకు, రాబోయే సమస్యను మీరు ముందుగానే ఊహించవచ్చు. ఉదాహరణకు, మీరు వెళ్తున్న దారిలో మీ తోటి విద్యార్థులు కొంతమంది సిగరెట్‌ తాగుతూ కనిపించారు. అప్పుడు ఎలాంటి సమస్య రాగలదో మీరు ముందుగానే ఊహిస్తే, దాన్ని ఎదుర్కోవడానికి సిద్ధంగా ఉంటారు.

2. ఆలోచించండి

   బైబిలు ఇలా చెప్తుంది: ‘నిర్మలమైన మనస్సాక్షి కలిగి ఉండండి.’—1 పేతురు 3:15, 16.

   మీరిలా ప్రశ్నించుకోండి, ‘అందరూ చేసేదే నేనూ చేస్తే ముందుముందు ఎలాంటి పరిస్థితులు ఎదుర్కోవాల్సి వస్తుంది?’ నిజమే, తోటివాళ్లు చెప్పింది చేస్తే, వాళ్లు ప్రస్తుతానికి మిమ్మల్ని ఏమీ అనకపోవచ్చు. కానీ భవిష్యత్తు మాటేమిటి? కేవలం మీ తోటి విద్యార్థుల్ని సంతోషపెట్టడం కోసం మీ విలువల్ని వదిలేసుకుంటారా?—నిర్గమకాండము 23:2.

3.  

   నిర్ణయించుకోండి

   బైబిలు ఇలా చెప్తుంది: “జ్ఞానముగలవాడు భయపడి కీడునుండి తొలగును.”—సామెతలు 14:16.

   జీవితంలో మనం ఎన్నో నిర్ణయాలు తీసుకుంటూ ఉంటాం, వాటి ఫలితాలు అనుభవిస్తూ ఉంటాం. సరైన నిర్ణయాలు తీసుకున్న యోసేపు, యోబు, యేసు గురించి బైబిలు చెప్తుంది. అలాగే చెడ్డ నిర్ణయాలు తీసుకున్న కయీను, ఏశావు, యూదా గురించి కూడా బైబిలు చెప్తుంది. మరి మీరు ఏం చేస్తారు?

బైబిలు ఇలా చెప్తుంది: ‘చిన్న విషయాల్లో నమ్మకంగా ఉండేవాడు పెద్ద విషయాల్లో కూడా నమ్మకంగా ఉంటాడు.’ (లూకా 16:10, పవిత్ర గ్రంథం, వ్యాఖ్యాన సహితం) తోటివాళ్ల ఒత్తిడికి లొంగిపోతే ఏం జరుగుతుందో ముందే ఆలోచించుకొని, మీ మనసును సిద్ధం చేసుకుంటే, మీ నిర్ణయాల గురించి వాళ్లకు ధైర్యంగా చెప్పగలుగుతారు, దానివల్ల మంచి ఫలితం ఉంటుంది.

కంగారుపడకండి, మీరేమి వాళ్లకు పెద్ద ప్రసంగం ఇవ్వనక్కర్లేదు. వద్దు అని ఖచ్చితంగా చెప్తే చాలు. లేదా స్థిరంగా ఇలా చెప్పవచ్చు:

• “నన్ను వదిలిపెట్టండి!”

• “నేను అలాంటివి చేయను!”

• “నేను ఎలాంటివాణ్ణో మీకు తెలుసు కదా!”

మీరు వెంటనే, స్థిరంగా జవాబివ్వాలి. అలా చేస్తే, మిమ్మల్ని ఒత్తిడి చేసేవాళ్లు వెనక్కి తగ్గడం చూసి మీరే ఆశ్చర్యపోతారు.

“నువ్వింత పిరికివాడివా?” అని తోటివాళ్లు మిమ్మల్ని ఎగతాళి చేస్తుంటే మీరేం చేస్తారు? అది కూడా తోటివాళ్ల ఒత్తిడేనని గుర్తించండి. ఇప్పుడు మీ ముందు కనీసం రెండు ఆప్షన్స్‌ ఉన్నాయి.

• మీరు దాన్ని సహించవచ్చు. (“అవును, నువ్వు అన్నది నిజమే. నేను పిరికివాణ్ణే!” అని చెప్పి, మీ నమ్మకాల్ని క్లుప్తంగా చెప్పండి.)

• మీరు దాన్ని తిప్పికొట్టవచ్చు. మీరు ఎందుకు సిగరెట్‌ తాగరో చెప్పి, దానిగురించి వాళ్లు కూడా ఆలోచించేలా చేయండి. (“నువ్వు సిగరెట్‌ తాగుతున్నావా? నువ్వు చాలా మంచివాడివి అనుకున్నానే!”)

వాళ్లు మిమ్మల్ని ఇంకా ఏడిపిస్తుంటే అక్కడినుండి వెళ్లిపోండి! మీరక్కడ ఎక్కువసేపు ఉండేకొద్దీ మీమీద ఒత్తిడి ఇంకా పెరుగుతుంది. మీరు అక్కడినుండి వెళ్లిపోతే, వాళ్లు ఇక మిమ్మల్ని ఒత్తిడిచేయలేరు.

నిజం చెప్పాలంటే, మీరు తోటివాళ్ల ఒత్తిడి నుండి పూర్తిగా తప్పించుకోలేరు. కానీ, ఏం చేయాలో మీరు నిర్ణయించుకోగలరు, మీ నమ్మకాల్ని వాళ్లకు స్థిరంగా చెప్పగలరు, మీ జీవితాన్ని మీ చేతుల్లోనే ఉంచుకోగలరు. ఏదేమైనా, నిర్ణయం మీదే! —యెహోషువ 24:15.