Esaia 60:1-22
60 “Tsoha, uena Jerusalema,*+ khantša leseli kaha leseli la hao le tlile.
Khanya ea Jehova e khanya holim’a hao.+
2 Lefifi le tla koahela lefatše,Lefifi le letšo-letšo le koahele lichaba.
Empa Jehova o tla khanya holim’a hao,Khanya ea hae e tla bonoa ho uena.
3 Lichaba li tla ea leseling la hao+Le marena+ a ee botleng ba hao bo khanyang.*+
4 Phahamisa mahlo ’me u shebe hohle ho u potoloha.
Bara ba hao ba ntse ba tla ba tsoa hole+Le barali ba hao ba pepiloeng.
Kaofela ha bona ba phuthehile, ba tla ho uena.+
5 Ka nako eo, u tla bona ’me u thabe.+
Pelo ea hao e tla nyakalla ’me e tlale thaboKaha maruo a leoatle a tla lebisoa ho uena,Maruo a lichaba a tle ho uena.+
6 Mehlape ea likamele e tla koahela naha ea hao,*Likamele tse matla tsa Midiane le Efa.+
Bohle ba tsoang Sheba ba tla tla.
Ba tla nka khauta le libano tse tšoeu,Ba phatlalatse lithoriso tsa Jehova.+
7 Mehlape eohle ea Kedare+ e tla phuthoa, e tlisoe ho uena.
Liramo tsa Nebajothe+ li tla u sebeletsa.
Li tla amoheloa joaloka sehlabelo aletareng ea ka+’Me ke tla khabisa ntlo ea ka e ntle.*+
8 Ke bo-mang baa ba tlang ba fofa joaloka maru,Joaloka maeba a eang lirobeng* tsa ’ona?
9 Baahi ba lihlekehleke ba tla ntšepa+Le likepe tsa Tarshishe li ka pele*Hore li tlise bana ba hao ba tsoang hole+Hammoho le silevera le khauta ea bonaE le hore ba rorise lebitso la Jehova Molimo oa hao, Mohalaleli oa IseraeleHobane o tla u tlotlisa.*+
10 Balichaba ba tla u hahela marako’Me marena a bona a tla u sebeletsa.+
Ke ile ka u otla hobane ke halefileEmpa ke tla u hauhela hobane ke u rata.+
11 Likeiti tsa hao li tla lula li butsoe.+
Li ke ke tsa koaloa motšehare kapa bosiuE le hore u tlisetsoe maruo a lichaba’Me marena a lichaba a tla ba ka pele.+
12 Sechaba le ’muso leha e le ofe o ke keng oa u sebeletsa o tla timelaEbile lichaba li tla ripitloa hampe.+
13 Khanya ea Lebanone e tla tla ho uena+Hammoho le sefate sa junipere, sefate sa molora* le sa kiprese,+Bakeng sa ho khabisa tempele ea ka.
Ke tla tlotlisa sebaka sa maoto a ka.+
14 Bara ba batho ba ileng ba u hlorisa ba tla tla ’me ba u inamele.
Bohle ba u tellang ba lokela ho khumama maotong a hao,Ba tla lokela ho u bitsa motse oa Jehova,Sione ea Mohalaleli oa Iseraele.+
15 Ho e-na le hore u sale u lahliloe kherehloa ’me u hlouoe, ho se motho ea u fapohelang,+Ke tla etsa hore u rorisoe ka ho sa feleng,U be mohloli oa thabo melokong eohle.+
16 U tla noa lebese la lichaba,+U sebelise maruo a marena,*+U tla fela u tsebe hore ’na Jehova, ke Mopholosi oa hao,Ea Matla oa Jakobo ke Molopolli oa hao.+
17 Ke tla tlisa khauta ho e-na le koporo,Ke tlise silevera ho e-na le tšepe.
Ke tla tlisa koporo ho e-na le lehong,Ke tlise tšepe ho e-na le majoe.
Ke tla beha khotso hore e be molebeli oa haoLe ho loka hore ho u abele mosebetsi.+
18 Ntoa ha e sa tla hlola e utluoa naheng ea henoKapa timetso le tšenyo ka har’a meeli ea heno.+
U tla bitsa marako a hao Poloko+ le likeiti tsa hao Thoriso.
19 Letsatsi ha e sa tla hlola e e-ba leseli la hao motšehare,Khanya ea khoeli ha e sa tla hlola e u fa leseli.
Ho uena Jehova e tla ba leseli le sa feleng,+Molimo oa hao e be botle ba hao.+
20 Letsatsi la hao ha le sa tla hlola le likelaKapa khoeli ea hao e fifaleHobane Jehova e tla ba leseli le sa feleng bakeng sa hao+’Me matsatsi a hao a ho utloa bohloko a tla be a felile.+
21 Batho ba hao kaofela e tla ba ba lokileng.
Ba tla rua naha ho ea ho ile.
Batho bana ke lehlomela leo ke le lemmeng,Mosebetsi oa matsoho a ka+ hore ke tlotlisoe.+
22 E monyenyane o tla fetoha ba sekete,Ea fokolang e be sechaba se matla.
’Na Jehova, ke tla ho potlakisa ka nako ea teng.”
Linaletsana
^ Ka Seheberu: “mosali.”
^ Kapa: “khanyeng ea mafube a hao.”
^ Ka Seheberu: “e tla u koahela.”
^ Kapa: “e khanyang.”
^ Kapa: “masobeng a matlo?”
^ Kapa: “khabisa.”
^ Kapa: “joaloka pele.”
^ Sefate se seholo sa bolelele ba limithara tse 15 ha se holile. Se na le makhasi a matala le makala a ’mala o kang oa molora.
^ Ka Seheberu: “anya matsoele a marena.”
