Esaia 21:1-17
21 Phatlalatso e tobisitsoeng lefeelleng la leoatle:*+
E tla joaloka meea ea sefefo e hoholang ka boroa,E hlaha lefeelleng, naheng e tšosang.+
2 Ke boleletsoe pono e tšosang:
Molotsana o sebetsa ka bolotsanaLe ea timetsang oa timetsa.
Nyoloha, uena Elame! Thibella, uena Media!+
Ke tla felisa mahlomola ’ohle ao a* a bakileng.+
3 Ke kahoo ke utloileng bohloko haholo.*+
Ke tšoeroe ke mahlabaJoaloka mosali ea pepang.
Ke ferekane hoo ke sa utloeng.
Ke tšoenyehile hoo ke sa boneng.
4 Pelo ea ka e otla habohloko, kea tlakasela ke letsoalo.
Mantsiboea ao ke neng ke a letetse ka tjantjello aa nthothometsa.
5 Tekang tafole le hlophise litulo,Jang le noe!+
Emang, lona likhosana, tlotsang thebe.*
6 Jehova o itse ho ’na:
“E-ea, u behe molebeli hore a u tlalehele hore na o bona’ng.”
7 A bona kariki ea ntoa e huloang ke lipere,Kariki ea ntoa e huloang ke litonki,Le kariki ea ntoa e huloang ke likamele.
A sheba ka hloko, a mamelisisa.
8 Joale a hoeletsa joaloka tau a re:
“Jehova, ke lula ke eme holim’a tora ea ho lebela motšehare’Me ke eme sebakeng seo ke lebelang ke le ho sona bosiu bo bong le bo bong.+
9 Bonang hore na ho tla’ng:
Banna ba palameng likariki tsa ntoa+ tse huloang ke lipere.”
A hoeletsa a re:
“O oele! Babilona o oele.+
Molimo o pshatletse litšoantšo tsohle tse betliloeng tsa melimo ea hae fatše.”+
10 Lona batho ba ka ba potsoeng,Lona lijo* tsa seotlo sa ka,+Ke le tlalehetse hore na ke utloile’ng ho Jehova oa mabotho, Molimo oa Iseraele.
11 Phatlalatso e tobisitsoeng ho Duma ke ena:*
Ho na le motho ea nkhoeletsang a le Seire+ a re:
“Molebeli, bosiu bo tla sa neng?
Molebeli, bosiu bo tla sa neng?”
12 Molebeli a re:
“E tla ba hoseng, ebe e e-ba bosiu.
Haeba le botsa, botsang.
Tloong hape!”
13 Phatlalatso e tobisitsoeng lehoatateng:
Le tla qeta bosiu le le morung, lehoatateng,Lona lihlopha tsa batsamai tsa Dedane.+
14 Khahlanyetsang motho ea nyoriloeng ka metsi,Lona baahi ba naha ea Tema,+Le tlisetse motho ea balehang bohobe.
15 Ba balehile lisabole, sabole e ntšitsoeng selateng,Seqha se kobiloeng le ntoa e boima.
16 Jehova o itse ho ’na: “Pele selemo se fela, ho ea ka lilemo tsa mohiruoa,* khanya eohle ea Kedare+ e tla fela.
17 Banna ba setseng ba fulang ka seqha ba har’a bahlabani ba Kedare ba tla fokotseha hobane Jehova Molimo oa Iseraele o buile joalo.”
Linaletsana
^ E ka ’na eaba ke sebaka sa mehleng ea khale sa Babilonia.
^ E leng Babilona.
^ Ka Seheberu: “liqholo tsa ka li opang haholo.”
^ Kapa: “tlotsang thebe ka oli.”
^ Ka Seheberu: “bara ba.”
^ E bolelang “Khutso.”
^ Kapa: “kamoo mohiruoa a neng a li bala ka hloko kateng.” E leng selemo hantle.
