«Kujto Krijuesin tënd»

«Kujto Krijuesin tënd në ditët e rinisë sate, para se të vijnë ditët e këqija dhe të arrijnë vitet për të cilat ke për të thënë: ‘Nuk gjej asnjë kënaqësi në to.’»​—Predikuesi 12:1.

VARGU i mësipërm i Biblës të fut në mendime. Rinia vjen veçse një herë. Më vonë kur të shohësh prapa në vitet e adoleshencës ose do të ndihesh i kënaqur, ose do të ndjesh keqardhje të thellë. Ç’do të ndodhë në rastin tënd? Ç’mund të bësh që më vonë të mos pendohesh?

«Kujto Krijuesin tënd»,​—na nxit Bibla, siç thuhet më sipër. Si mund ta bësh këtë? Duke ndjekur ligjet dhe parimet e Perëndisë që gjenden në Fjalën e tij, në Bibël. Kjo nuk do të thotë aspak se duhet të kthehesh në një fanatik fetar dhe të bësh një jetë të vetmuar e të mundimshme, duke i mohuar vetes çdo kënaqësi. Përkundrazi, po të kujtosh Krijuesin tënd do të provosh lumturinë më të madhe që mund të ekzistojë. Si ka mundësi?

Le ta ilustrojmë: përfytyro sikur të kanë dhënë një makinë dhe një patentë. Para teje është hapur mundësia për të qenë i lirë. Kjo liri të entuziazmon dhe mund të të sjellë shumë kënaqësi. Vetëm mendo se në sa vende interesante mund të shkosh. Megjithatë liria e sapogjetur sjell edhe përgjegjësi të mëdha. Kur nget makinën duhet të respektosh rregullat e qarkullimit rrugor dhe t’u kushtosh kujdes shenjave të trafikut, kufirit të shpejtësisë dhe tabelave paralajmëruese. A të pengon kjo përgjegjësi që të kënaqesh? Aspak! Përkundrazi është një mbrojtje. Sigurisht që nuk ndien asnjë kënaqësi kur bën aksident, apo jo?

Është e njëjta gjë edhe me lirinë që të ka dhënë Krijuesi yt, Perëndia Jehova. Teksa rritesh, ai të lë të vendosësh vetë se si ta jetosh jetën tënde. (Ligji i përtërirë 30:19; Fjalët e urta 27:11) Çfarë privilegji i mrekullueshëm është ky! Por kjo liri mbart edhe një përgjegjësi serioze. Në Fjalën e tij, Jehovai ka vënë ‘rregullat e qarkullimit rrugor’, norma sipas të cilave ai dëshiron që të jetosh. A të pengojnë këto norma që të jesh i lumtur? Sigurisht që jo! Përkundrazi, ato të mbrojnë nga vuajtjet dhe dhembjet që pësojnë shumë të rinj sot.

 Federiko, që tani është në fillim të të 30-ave, e di që kjo gjë është shumë e vërtetë. Kur ishte adoleshent, ai shihte që shokët e shkollës merrnin pjesë në gjithfarëlloj veprimtarish që ai duhej të shmangte. «Nga jashtë dukej sikur bënin qejf,​—thotë ai,​—por kurrë nuk mendoja se ishin vërtet të lumtur.» Kur sjell ndër mend të kaluarën, Federiko është i lumtur që parimet e Biblës e drejtuan gjatë gjithë adoleshencës. «Sigurisht,​—thotë ai,​—edhe unë kisha probleme si çdo i ri tjetër. Por Bibla më mbrojti vërtet. Veç kësaj, gjithnjë më gjendej pranë ndonjë i bashkëkrishterë. Ndjekja e parimeve të Biblës më ka dhënë më shumë lumturi nga ç’kisha menduar!»

Perëndia Jehova dëshiron që ti të jesh i lumtur, vërtet i lumtur. Kjo lumturi nuk është vetëm një fasadë, sa për t’u dukur se po bën qejf, por që fsheh vuajtjen e brendshme. Bibla thotë: «Gëzoje rininë tënde. Ji i lumtur sa je ende i ri.» Por i njëjti varg i Biblës jep edhe një paralajmërim. «Mbaj mend,​—thuhet aty,​—që Perëndia do të gjykojë për gjithçka që bën.»​—Predikuesi 11:9, Today’s English Version.

Kujtoje Krijuesin tënd duke e përdorur me mençuri lirinë që të ka dhuruar. Nëse bën kështu, mund të jesh i sigurt se edhe Krijuesi yt do të të kujtojë ty dhe do të të bëjë të lumtur sa më s’ka. Bibla thotë: «Bekimi i Zotit pasuron dhe ai nuk shton asnjë vuajtje.»​—Fjalët e urta 10:22.

Për t’i ndihmuar të rinjtë që të përballojnë me sukses vështirësitë e adoleshencës, Dëshmitarët e Jehovait kanë botuar një libër me 320 faqe, të titulluar Të rinjtë pyesin . . . Përgjigje praktike. Deri tani janë shtypur gati 34 milionë kopje në 77 gjuhë. Nëse dëshironi një kopje mund të flitni me Dëshmitarët e Jehovait në zonën tuaj.

[Figurat në faqet 8, 9]

Për të kaluar një adoleshencë të mbarë

Gjej kohë për të lexuar Fjalën e Perëndisë

Ji i zellshëm në shërbim

Shmang shoqëritë e këqija

Vazhdimisht fol hapur me prindërit

[Burimi]

Kopertina e broshurës: Pictorial Archive (Near Eastern History) Est.