Jehovai kishte caktuar gjykatës për të drejtuar izraelitët, por ata donin një mbret. Prandaj i thanë Samuelit: «Të gjitha kombet përreth kanë mbretër. Edhe ne duam një.» Samueli mendonte që kjo ishte gabim, prandaj iu lut Jehovait për këtë. Jehovai i tha: «Populli s’po të hedh poshtë ty, por mua. Thuaju se mund të kenë një mbret, por ai do të kërkojë shumë gjëra nga ata.» Prapëseprapë populli tha: «Nuk duam t’ia dimë. Ne duam një mbret!»

Jehovai i tha Samuelit se mbreti i parë do të bëhej një burrë me emrin Saul. Kur Sauli shkoi të takonte Samuelin në Ramah, Samueli e mirosi si mbret duke i derdhur vaj mbi kokë.

Më vonë Samueli mblodhi popullin që t’u tregonte mbretin e ri. Por Saulin s’po e gjenin në asnjë vend. A e di pse? Sepse ishte fshehur mes plaçkave. Kur më në fund e gjetën, e sollën në mes të popullit. Sauli ishte më i gjati nga të gjithë dhe ishte shumë simpatik. Samueli u tha: «Shihni atë që ka zgjedhur Jehovai.» Populli thirri me zë të lartë: «Rroftë mbreti!»

Në fillim, mbreti Saul e dëgjonte Samuelin dhe i bindej Jehovait. Por më pas ndryshoi. Për shembull, Sauli nuk duhej të ofronte flijime. Profeti i Jehovait, Samueli, i kishte thënë të priste derisa të vinte ai. Por Samueli u vonua. Prandaj Sauli vendosi ta ofronte vetë flijimin. Si reagoi Samueli? Ai i tha: «Duhej t’i ishe bindur Jehovait.» A do të mësonte Sauli nga gabimi i tij?

Ca kohë më vonë, kur Sauli shkoi të luftonte kundër amalekitëve, Samueli i tha të mos linte gjallë asnjë prej tyre. Por Sauli vendosi të mos e vriste mbretin Agag. Jehovai i tha Samuelit: «Sauli më ka braktisur dhe nuk më dëgjon më.» Samueli u mërzit shumë dhe i tha Saulit: «Ngaqë nuk po  i bindesh më Jehovait, ai do të zgjedhë një mbret tjetër.» Kur Samueli u kthye që të ikte, Sauli i kapi cepin e petkut dhe ai u gris. Atëherë Samueli i tha: «Ashtu siç u gris ky petk, ashtu edhe Jehovai do ta shkëputë mbretërinë nga ti.» Jehovai do t’ia jepte mbretërinë dikujt që do ta donte dhe do t’i bindej.