QHAWARIY kay runakunaq apamusqan frutakunata. Uvas ch’anpaqa hatunmi, iskay runan k’aspipi wantumuranku. Qhawariy higokunatapas granadakunatapas. ¿Maymantan apamuranku kay sumaq frutakunata? Canaán allpamantan. Yuyariy, Canaanpin tiyaranku Abrahanpas, Isaacpas, Jacobpas. Yarqay kaqtinmi Jacobqa familiantin Egipto suyuman astakuran. Chaymantaqa ñan 216 watakunaña pasan, kunanqa Moisesmi israelitakunata Canaanman kutichishan. Kunanqa Cades sutiyoq ch’inneq aqo pampapin kashanku.

Canaanpiqa millay runakunan tiyanku. Chay raykun Moisesqa 12 runakunata kamachin: ‘Qhawamuychis hayk’a runa chaypi tiyasqanta, imayna kallpayoq kasqankutapas. Allpapas tarpunapaq hina allin allpachus kasqanta. Apamuychistaq ima frutallatapas,’ nispa.

Cadesman kutispan Canaán allpa qhamiyaq runakunaqa, Moisesta ninku: ‘Allinmi allpaqa kasqa,’ nispa. Chayta creenanpaqmi rikuchinku apamusqanku frutakunata. 10 runakunan ichaqa ninku: ‘Chaypi tiyaq runakunaqa kallpasapa hatun runakunan. Allpankuta qechuyta munaqtinchisqa wañuchiwasunmi,’ nispa.

Chayta uyarispan israelitakunaqa mancharikunku. Ninku: ‘Egipto suyupi aswan wañusunman karan otaq kay ch’inneq aqo pampapipas. Maqanakuypin wañuchiwasun, warminchistapas wawanchistapas hap’ispan apapunqaku. ¡Moisespa rantinta huk umalliqta akllakusun Egipto suyumantaq kutipusun!,’ nispa.

Iskay qhamiyaqkunataq Jehová Diospi hap’ipakuspa llaqtapi runakunaq sonqonta thasnuyachiyta munanku. Hukninmi Josué hukkaqtaq Caleb, paykunan ninku: ‘Ama manchakuychischu. Jehová Diosmi yanapawasun. Manan sasachu kanqa allpanku qechuyqa,’ nispa. Llaqtantintaq ichaqa mana uyarinkuchu. Aswanmi Josueta Calebtawan wañuchiyta munanku.

Kaymi sinchita phiñachin Jehová Diosta, chaymi Moisesta nin: ‘Manan pipas iskay chunka watayoqmanta kuraqqa Canaán suyuman haykunqachu. Rikunkuñan Egipto suyupipas ch’inneq aqo pampapipas milagrokuna ruwasqayta, chaywanpas manaraqmi ñoqapi hap’ipakunkuchu. Chay raykun 40 wata ch’inneq aqo pampapi muchunqaku, chay runakuna wañunankukama. Calebwan Josuellawanmi Canaán allpamanqa haykunqaku,’ nispa.