Kichay leenaykipaq

Índice nisqaman riy

 100 WILLAKUY

Jesús huertapi

Jesús huertapi

CHAY cuartomanta lloqsispan Jesusqa apostolninkunawan rin Getsemaní huertaman. Askha kutitan kaymanqa hamuranku. Jesusmi paykunata nin: ‘Rikch’aspa mañakushallaychis,’ nispa, achhurispataq pampaman k’umuykuspa mañakuyta qallarin.

Chaymantan kutimun apostolkunaq kasqanman. ¿Imatan ruwashanku? ¡Puñushankun! Kinsa kutitan Jesusqa nin rikch’asqalla kanankupaq, sapa kutimuspan ichaqa puñushaqtakama tarin. ‘¿Imanaqtinmi puñunkichis khayna tiempopi?,’ ninmi Jesús qhepa kutimusqanpi. ‘Ñan horaña awqaykunaman hap’ichiwanankupaq,’ nispa.

Chay ratopin uyarinku askha runaq rimasqanta. ¡Qhawariy! ¡Espadayoq, k’aspikunayoqmi runakuna hamushanku! K’anchakunankupaqtaq antorchakunata apanku. Asuykamuqtinkun runakuna ukhumanta lloqsimuspa huk runa Jesusta much’aykun, kaypi rikusqayki hina. ¡Chay runaqa Judas Iscarioten! ¿Ima raykun Jesusta much’aykun?

Jesusmi tapun: ‘Judas, ¿much’aykuspachu hap’ichiwanki?,’ nispa. Arí, much’asqanqa señalmi. Chaywanmi, Judaswan hamuq runakunaqa yachanku mayqenmi Jesús kasqanta. Chaymi Jesuspa awqankunaqa asuykunku hap’inankupaq. Pedron ichaqa mana chhaynallatachu qhawan Jesusta apanankuta. Espadanta horqospan, Jesuspa qayllanpi kaq runaq paña ninrinta qhororparin. Jesusmi ichaqa chay runaq ninrinta tupaykuspa hanpipun.

Pedrotan nin: ‘Espadaykita waqaychay. ¿Manachu Taytayta mañakuyman waranqanpi angelkunata kachamuspa qespichiwananpaq?,’ nispa. ¡Arí, mañakunmanmi! Jesusmi ichaqa mana mañakunchu angelkunata kachamunanpaq, yachanmi awqankunaq hap’inanpaq tiempo chayamusqanta. Chaymi payqa pusachikullan. ¿Imanankun Jesusta?