Kichay leenaykipaq

Índice nisqaman riy

 46 WILLAKUY

Jericó llaqtaq perqankuna

Jericó llaqtaq perqankuna

¿IMAN Jericó llaqtaq perqankunata urmachishan? Hatun bombapas chaypi phataspa thunichishanman hinan. Haqay tiempokunapiqa manan bombakuna nitaq cañonkunapas karanchu. ¡Kayqa Jehová Diospa ruwasqan milagron! Yachasun imaynatan chay sucederan.

Uyariy Josueman Jehová Dios nisqanta: ‘Qanpas soldadoykikunapas llaqtata muyuriychis. Soqta p’unchayta muyuriychis, sapa p’unchay huk kutita. Rimanakuy arcata apaychis. Qanchis sacerdotekunan arcaq ñawpaqenta rinqaku waqrata phukuspa.

Qanchis kaq p’unchaytan ichaqa qanchis kutita llaqtata muyurinkichis. Chaymantan waqrata unayta phukunkichis, llapaykichistaq maqanakuypaq hina qaparinkichis. ¡Chaymi perqakunaqa urmayunqa!,’ nispa.

Josuepas runakunapas Jehová Dios nisqantan ruwanku. Llaqtata muyurispan llapanku ch’inlla purinku. Waqrakuna phukusqanku, purisqallankupiwan uyarikun. Jericopi awqankunaqa manchakurankuchá chayta uyarispa. ¿Rikushankichu ventanapi warkusqa puka waskhata? ¿Piqpan chay ventana? Arí, Rahabmi waskhata warkuran iskaynin qhamiyaqkuna nisqanta kasukuspa. Familiantinmi wasi ukhupi kashanku imapas sucedenanta suyaspa.

Qanchis kaq p’unchaypin llaqtata qanchis kutita muyurinku, sacerdotekunan waqrata phukunku soldadokunataq qaparinku, chaymi perqakunaqa urmaykun. Josué nin: ‘Runakunata wañuchiychis llaqtatataq llapanta ruphachiychis, qorita, qolqeta, cobreta, fierrotan ichaqa ama ruphachinkichischu, chaykunataqa yupaychana karpaman apaychis,’ nispa.

Iskaynin qhamiyaqkunata Josué nin: ‘Horqomuychis Rahabta familiantinta,’ nispa. Paykunaqa qespichisqan kanku qhamiyaqkunaq prometesqan hina.

Josué 6:1-25.