Kichay leenaykipaq

Índice nisqaman riy

 68 WILLAKUY

Iskay wawakuna kawsarin

Iskay wawakuna kawsarin

WAÑUSQAYKIMANTA kawsarimuqtiyki, ¿imaynan mamayki sentikunman? ¡Anchatachá kusikunman! ¿Kawsarinmanchu wañusqa runa? ¿Hayk’aqllapas chay sucederanchu?

Qhawariy kay dibujopi runata, warmita, wawatapas. Chay runaqa profeta Eliasmi. Warmiqa Sarepta llaqtapi tiyaq viudan, wawataq paypa wawan. Huk p’unchaymi kay wawa onqosqa. Astawan onqospataq wañupuran. Chaymi Eliasqa wawaq mamanta nin: ‘Wawaykita qoway,’ nispa.

Pataman apaspan Eliasqa puñunaman wawata churan. Chaymanta mañakun: ‘Jehová Diosniy, ama hina kaspayki, wawata kawsarichiy,’ nispa. ¡Chaymi wawaqa samariyta qallarin! Urayachimuspan Eliasqa mamanta nin: ‘¡Qhawariy, wawaykiqa kawsarinpunmi!,’ nispa. Chaymi mamanqa anchata kusikun.

Eliseopas Jehová Diospa profetanmi. Payqa Eliastan yanaparan. Qhepamanqa paymanpas Jehová Diosqa qonmi atiyta milagrokuna ruwananpaq. Huk kutinmi rin Sunem llaqtata, chaypin huk warmi wasinpi sumaqta chaskin. Huk tiempo qhepatan chay warmi wawayoq karan.

Huk p’unchaymi wawaqa taytanpa llank’asqan chakrata riran. Qonqayllamantan qaparin: ‘¡Ay, umaymi nanawan!,’ nispa. Wasiman apaqtinkutaq chaypi wañun. ¡Sinchitan mamanqa llakikun! Chaymi Eliseota maskhamun.

Chayamuspan Eliseoqa wañusqa wawata marq’arikuspa cuartoman apan. Jehová Diosmanta mañakuspan wañusqa hawanman thallaykun. Wawaq cuerpon q’oñiriqtinmi qanchis kutita achhin. ¡Anchatan mamanqa kusikun wawan kawsarisqanta rikuspa!

Askha runakunañan wañun. Chaymi sinchita llakichin familiankutapas amigonkunatapas. Ñoqanchisqa manan atisunmanchu wañusqakuna kawsarichiyta. Jehová Diosllan atin. Chaymantaña yachasun millonninpi wañusqakuna kawsarichinanmanta.

1 Reyes 17:8-24; 2 Reyes 4:8-37.