Kichay leenaykipaq

Índice nisqaman riy

 108 WILLAKUY

Damasco llaqtata rishaspa

Damasco llaqtata rishaspa

¿PIN pampapi kunparayashan? Saulon. Estebanta rumiwan ch’aqeqkunaq p’achanta hap’iqmi. ¡Qhawariy k’anchayta! ¿Iman sucedeshan?

Esteban wañuqtinmi, Sauloqa Jesuspa qatikuqninkunata maskhan paykunatapas ñak’arichinanpaq. Wasikunata haykuspan horqomun carcelpi wisqananpaq. Wakin qatikuqkunaqa ayqekuspan huk llaqtakunaman rinku, chaypin “allin willakuykunata” predicanku. Saulon ichaqa huk llaqtakunata rispa maskhamun Jesuspa qatikuqninkunata. Damasco llaqtata rishaqtinmi ichaqa ñanpi kay suceden:

Hanaq pachamanta k’anchaymi Saulota muyurin. Pampamanmi wikch’ukun kaypi rikusqanchis hina. Chaymi uyarin kayta: ‘¡Saulo, Saulo! ¿Ima raykun qatiykachawanki?,’ nispa. Saulowan kaq runakunaqa rikunkun k’anchayta, rimasqantapas uyarinkun, manan ichaqa entiendenkuchu uyarisqankuta.

‘¿Pin kanki señor?,’ ninmi Saulo.

‘Jesusmi kani, ñoqatan qatiykachawashanki,’ nispan nin. Qatikuqninkunata qatiykachaspaqa paytapas qatiykachashankuman hinan, chay raykun Jesusqa chayta nin.

Saulo tapun: ‘¿Imatan ruwanay, Señor?,’ nispa.

‘Sayarispa Damasco llaqtata riy. Chaypin ima ruwanaykitapas yachanki,’ ninmi Jesús. Sayarispa ñawinta kichariqtinmi, Sauloqa mana imatapas rikunchu. ¡Ñawsayanmi! Chay raykun paywan kaq runakunaqa makinmanta pusanku Damasco llaqtaman.

Damasco llaqtapi qatikuqnintan Jesús nin: ‘Hatariy Ananías. Recta sutiyoq calleta riy. Judaspa wasinpitaq maskhamuy Saulo sutiyoq runata. Ñoqan akllani kamachiy kananpaq,’ nispa.

Chaytan ruwan Ananías. Saulota rikuspan payman makinta churan kayta nispa: ‘Señormi kachamuwan hukmanta rikunaykipaq, santo espiritutapas chaskinaykipaq,’ nispa. Chay ratopachan Sauloq ñawinmanta lloqsin challwaq sarphan hina, chaymi hukmanta rikun.

Sauloqa allintan yanapan askha suyukunapi runakunata predicaspa. Apóstol Pablo nispan reqsinku, astawanmi paymantaqa yachasun. Ñawpaqtaqa Pedroman Diospa rikuchisqantaraq yachasun.