Kichay leenaykipaq

Índice nisqaman riy

 55 WILLAKUY

Diospa munayninta ruwaq wawa

Diospa munayninta ruwaq wawa

MUNAYMI kay wawaqa. Samuelmi sutin. Umanman makinta churaqtaqmi Israelpi uma sacerdote Elí. Wawa apamuqkunataq taytan Elcana maman Anapiwan.

Samuelqa tawa otaq pisqa watallayoqraqmi. Eliwan, wakin sacerdotekunawan kuska Jehová Diospa yupaychana karpanpi tiyanqa. ¿Ima raykun Elcanapas Anapas Samuelta wawallataraq apanku yupaychana karpaman Jehová Diospa munayninta ruwananpaq? Chaymanta yachasun.

Pisi watakuna ñawpaqllatan Anaqa ancha llakisqa kasharan. Mana wawayoq kasqanmantan llakikuran. Huk p’unchaymi yupaychana karpata rispa Jehová Diosmanta mañakun: ‘¡Jehová Diosniy, ama qonqawaychu! Wawata qowaqtiykiqa qanmanmi qopusayki, paymi wañunankama munayniykita ruwanqa,’ nispa.

Jehová Diosqa uyarinmi Anaq mañakusqanta, chaymi tiempo pasaqtin Anaqa wachakun Samuel sutiyoq wawata. Anaqa munakuranmi wawachanta, huch’uychanmantapachan Jehová Diosmanta yachachin. Qosanta nin: ‘Hanuk’aqtiyñan yupaychana karpaman Samuelta apasaq, chaypi Jehová Diospa munayninta ruwananpaq,’ nispa.

Chaytan ruwashanku Elcanapas Anapas kay dibujopi rikusqanchis hina. Samueltaqa allintan tayta-mamanpas Diosmanta yachachiranku, chaymi payqa kusisqa kashan yupaychana karpapi Jehová Diospa munayninta ruwananpaq. Sapa watanmi tayta-mamanqa yupaychana karpata rinku Jehová Diosta yupaychanankupaq, Samueltapas visitanankupaq. Anaqa sapa watanmi mana mangayoq p’achata ruwaspa Samuelman apan.

Unay watañan Samuelqa yupaychana karpapi Jehová Diospa munayninta ruwashan, chaymi Jehová Diostapas llaqtapi runakunatapas kusichin. Ichaqa uma sacerdote Elipa churinkuna Ofni, Fineeswan mana allin runakuna kanku. Paykunaqa mana allinkunatan ruwanku, hukkunatapas pantachinku Diosta mana kasukunankupaq. Eliqa wikch’unanmi karan sacerdote kasqankumanta, manan ichaqa chaytachu ruwaran.

Yupaychana karpapi mana allin ruwasqankuwanqa manan Samuelqa hark’achikunchu, ruwashallanmi Jehová Diospa munayninta. Unay tiempoñan Jehová Diosqa mana pi runawanpas rimanchu, pisi runalla payta munakusqan rayku. Samuel wiñaqtinmi kay suceden:

Yupaychana karpapi puñushaqtinmi Samuelqa huk kunkata uyarispa rikch’arin. Paymi kutichin, ‘kaypin kashani’ nispa. Hatarispan usqhaylla phawan Eliman, nintaq: ‘Waqyamuwarankichu, kaypin kashani,’ nispa.

Elí ichaqa nin: ‘Manan waqyamuykichu; kutipuy puñunaykiman,’ nispa. Chaymi Samuelqa puñunanman kutipun.

Hukmantan waqyamullantaq: ‘¡Samuel!’ nispa. Chaymi Samuelqa hatarispa Eliman rillantaq. ‘Waqyamuwarankichu, kaypin kashani’ nispa. Kaytan Eliqa nin: ‘Manan waqyamuykichu, wawalláy. Kutipuy puñunaykiman’ nispa. Chaymi Samuelqa puñunanman kutipun.

‘¡Samuel!’ nispan huk kutitawan waqyamullantaq. Chaymi Samuelqa Eliman kutillantaq. ‘Kaypin kashani; kunanqa waqyamuwarankipunin,’ nispa. Eliqa reparanmi Jehová Dios waqyamusqanta. Chaymi Samuelta nin: ‘Puñunaykiman kutipuy, hukmanta waqyamuqtinqa kaytan ninki: “Rimallay Jehová Dios, kamachiykiqa uyarishanmi,” ’ nispa.

Chaytan Samuelqa ruwan hukmanta Jehová Dios waqyamuqtin. Jehová Diosmi willan Samuelman, Elitapas churinkunatapas muchuchinanta. Chay qhepamanmi Ofnipas Fineespas wañunku filisteokunawan maqanakushaspa, chayta uyarispan Eliqa urmaran, kunkanta p’akikuspataq wañuran. Chhaynapin hunt’akuran Jehová Diospa willachisqan.

Wiñaspan Samuelqa Israelpi qhepa kaq juez karan. Machuyaqtinmi llaqtapi runakuna ninku: ‘Kamachiqtan munayku kamachiwanankupaq,’ nispa. Samuelqa manan munanchu chay ruwayta, payqa yachanmi paykunaq kamachiqnin Jehová Dios kasqanta. Jehová Diosmi ichaqa nin ruwallay paykunaq nisqanta, nispa.

1 Samuel 1:1-28; 2:11-36; 4:16-18; 8:4-9.