Kichay leenaykipaq

Índice nisqaman riy

 101 WILLAKUY

Jesusta wañuchinku

Jesusta wañuchinku

¡QHAWARIY kaypi sucedesqanta! Jesustan wañuchishanku. K’aspipin warkurunku. Makinpas chakinpas clavokunawanmi takasqa kashan. ¿Ima raykun kayta ruwanku?

Jesusta cheqnikuspa. ¿Pikunan cheqnikunku? Hukninmi Saqra Satanás. Paymi Adanta Evatawan Jehová Dios contra huchallichiran. Satanasmi kallpacharan Jesuspa awqankunata payta wañuchinankupaq.

Manaraq Jesusta k’aspipi warkushaspan, awqankuna sinchita ñak’arichiranku. ¿Yuyashankichu Getsemaní huertamanta apasqankuta? ¿Pikunan chay awqankuna karan? Arí, religionpi umalliqkunan. Yachasun ima sucedesqanta.

Religionpi umalliqkuna Jesusta apaqtinkun apostolkunaqa ayqekunku. Mancharikuspan sapallanta saqerparinku awqankunaq makinpi. Pedrowan Juanwanmi ichaqa mana karutachu rinku. Jesustan qatipanku imapas sucedesqanta yachanankupaq.

Anasmanmi sacerdotekunaqa Jesusta pusanku, payqa uma sacerdoten karan. Manan ichaqa unaychu runakuna chaypi qhepakunku. Chaymantan Jesusta apanku Caifaspa wasinman, paymi chay tiempopi uma sacerdote. Askha umalliq religiosokunan chaypi kashanku.

Caifaspa wasinpin juiciota ruwanku. Chaymanmi pusanku runakunata, llullakuspa Jesusmanta mana kaqta rimanankupaq. Religionpi umalliqkunan llapanku ninku: ‘Wañuchinan Jesustaqa,’ nispa. Chaymantan Jesusta uyanpi thoqaykunku, askha kutitataq saqmankupas.

Chaykaman Pedroqa patiopi kashan. Chiriqtinmi runakunaqa ninata hap’ichinku. Ninaq muyuriqninpi q’oñikushaqtinkun huk kamachi warmi, Pedrota qhawarispa nin: ‘Kay runapas Jesuswanmi kasharan,’ nispa.

‘¡Manan, manan ñoqaqa paywanchu karani!’ nispan Pedroqa kutichin.

Kinsa kutitan Pedrota ninku Jesuswanmi kasharanki, nispa. Kinsantin kutipitaq Pedro llullakun. Kinsa kutita llullakushaqtinmi, Jesusqa kutirispa Pedrota qhawariran. Anchatan Pedroqa llakikun llullakusqanmanta, chaymi ripuspa waqayta qallarin.

Viernes tutamantatan Inti lloqsimuqtin sacerdotekuna Jesusta pusanku huñukunanku hatun wasiman, sala del Sanedrín nisqaman. Chaypin rimanakunku Jesuswan ima ruwanankuta. Chaymantan pusanku Judea distritopi kamachiq Poncio Pilatoman.

‘Kay runaqa millay runan’ ninkun Pilatota. ‘Wañuchinan,’ nispa. Jesusta askha kutita tapuspan Pilatoqa nin: ‘Manan paypiqa imatapas mana allintaqa tarinichu,’ nispa. Chaymantan Pilatoqa Jesusta pusachin Herodes Antipasman, payqa Galileapin kamachin, chay tiempopiqa Jerusalenpin kasharan. Paypas manan Jesuspiqa imatapas mana allintaqa tarinchu, chaymi Pilatoman kutichipun.

Pilatoqa Jesustan kachariyta munan. Jesuspa awqankunan ichaqa huk suwa runa Barrabasta kacharinanta munanku. Chawpi p’unchayta hinan Pilatoqa Jesusta hawaman horqomun. Runakunatan nin: ‘¡Qhawariychis kamachiqniykichista!,’ nispa. Allin reqsisqa sacerdotekunan qaparinku: ‘¡Wañuchiy! ¡Wañuchiy!,’ nispa. Chhaynapin Barrabasta kacharinku, Jesustataq wañuchinankupaq pusanku.

Viernes tardetan Jesusta k’aspipi warkunku. Jesuspa sapa ladonpitaq k’aspipi warkullankutaq runa wañuchiq millay runakunata, manan chayta dibujopi rikunkichu. Manaraq Jesús wañushaqtinmi huknin runa nin: ‘Kamachikuyta qallarishaspa, yuyariykuway,’ nispa. Jesustaq kutichin: ‘Ñoqan prometeyki, paraisopin ñoqawan kanki,’ nispa.

¡Sumaq promesan chayqa!, ¿riki? ¿Ima paraisomantan Jesús rimasharan? ¿Maypin karan qallariypi Diospa ruwasqan paraíso? Arí, kay Allpapi. Hanaq pachamanta kamachispan Jesusqa kay runata Allpapi kawsarichinqa sumaq Paraisopi tiyananpaq. Allinmi chayqa, ¿riki?