Kichay leenaykipaq

Índice nisqaman riy

 61 WILLAKUY

David kamachin

David kamachin

HUKMANTAN Saulqa Davidta hap’iyta munan. 3.000 allinnin soldadokunata pusarikuspan maskhaq rin. Chayta yachaspan Davidqa qhamiyaqkunata kachan, chay tuta Saulpa maypi samananta yachamunankupaq. Iskaynin runakunatan tapun: ‘¿Mayqenniykichismi ñoqawan rinkichis Saulpa samasqanta?,’ nispa.

‘Ñoqa risaq,’ ninmi Abisai. Abisaiqa Davidpa panan Seruyaq wawanmi. Saulpas, soldadonkunapas puñushanankukaman Davidwan Abisaiwan haykunku Saulpa puñusqanman. Qayllanmantan apanku unu ukyanan jarrata, lanzantawan. Llapankun puñushanku chaymi mana pipas rikunchu nitaq uyarinkupaschu.

Qhawariy Davidta Abisaitawan. Ayqekuspan orqo patapi kashanku. Davidmi qaparimun Israel ejercitopi umalliqta: ‘Abner, ¿ima raykun mana qhawarankichu kamachiqniykita? ¡Qhawariy! ¿Maypin kashan lanzanpas, unu ukyanan jarrapas?,’ nispa.

Puñusqanmantan Saulqa rikch’arin. Davidpa kunkanta uyarispataq tapun: ‘¿Davidchu kanki?,’ nispa. ¿Rikushankichu Saulta, Abnertapas?

‘Arí, kamachiqniy,’ nispan Davidqa kutichin. Tapuntaq: ‘¿Ima raykun hap’iwayta munashanki? ¿Imatan mana allinta ruwarani? Kaypin kashan lanzayki. Hamuchun pipas apananpaq,’ nispa.

‘Manan allinchu ruwasqay, mana yuyayniyoq hinan kaytaqa ruwashani,’ nispan Saulqa nin. Chaymantan Davidqa ripun, Saultaq wasinman kutipun. Davidmi yuyaykun: ‘Saulqa ima ratopas wañurachiwanqan. Ayqekusaq filisteokunaq suyunman,’ nispa. Chaytan ruwan. Filisteokunata q’otuspan Davidqa creechin, qankunatan yanapasaykichis, nispa.

Chay qhepamanmi filisteokunaqa Israelwan maqanakuq wichanku. Chay maqanakuypin Saulpas Jonatanpas wañunku. Kaywanmi Davidqa anchata llakikun, chaymi sumaq takita qelqaspa takin: ‘Qanmantan llakikuni, wayqey Jonatán. ¡Anchatan munakurayki!,’ nispa.

Chaymantan Davidqa kutin Israelpi Hebrón llaqtaman. Chay llaqtapin wakin runakuna Saulpa churin Isbosetta akllanku kamachiq kananpaq, wakin runakunataq munan David kamachiq kananta, chaymantan iskaynin t’aqa runakuna maqanakunku. Davidpa runankunan maqanakuypi atipanku. Kinsa chunka watanpin Davidqa kamachiyta qallarin. Qanchis wata kuskanmi Davidqa Hebrón llaqtapi kamachin. Chaypin nacen Davidpa wakin churinkuna, Amnón, Absalón, Adoniaspas.

Tiempowanmi Davidqa runankunawan qechunku Jerusalén sumaq llaqtata. Davidpa panan Seruyaq wawan Joabmi maqanakuypi umallin. Chaymi Davidqa premiota hina qon ejercitopi umalliq kananpaq. Kunanqa Jerusalenmantan Davidqa Israelta kamachin.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Crónicas 11:1-9.