Kichay leenaykipaq

Índice nisqaman riy

 47 WILLAKUY

Israelpi huk suwa

Israelpi huk suwa

¡QHAWARIY karpanpi kay runaq p’anpasqanta! Sumaq p’achata, qolqeta, qoritawanmi pakashan. Kaytaqa Jericó llaqtamantan apamuran. Ichaqa, ¿imatan ruwananku karan Jericopi chaykuna tarisqankuwan? ¿Yuyashankichu?

Ruphachinankun karan, ichaqa qorita, qolqetan Jehová Dios yupaychana karpaman apananku karan. Kay runakunaqa manan kasukurankuchu Diospa kamachisqanta. Diospaq kaqtan suwakunku. Kay runaq sutinqa Ahanmi, paywan kuska kaqkunaqa paypa familianmi. Yachasun ima sucedesqanta.

Ahán suwakusqan qhepatan Josueqa israelitakunata kachan Hai llaqtapi runakunawan maqanakunankupaq. Ichaqa atipachikunkun. Wakinmi wañunku wakintaq ayqekunku. Chay raykun Josueqa anchata llakikun. Pampaman k’umuykuspan Jehová Diosmanta mañakun: ‘¿Ima raykun qhawallanki kaykuna sucedenanta?,’ nispa.

Jehová Diosmi kutichin: ‘¡Sayariy! Israelmi huchallikun. Karpankupin pakashanku ruphachinapaq kaqkunata, yupaychana karpaman apana qoritapas qolqetapas. Munay p’acha suwakusqankutapas mana willankuchu. Manan saminchasaykichischu chay p’achata ruphachinaykichiskama, p’acha suwakuqtapas wañuchinaykichiskama,’ nispa. Jehová Diosqa willanmi Josueman chay millay runa pí kasqanta.

Chaymi Josueqa llaqtantinta huñun, chaypin Jehová Dios reqsichin suwa runa Ahanta. Ahán nin: ‘Huchallikunin. Munay p’achatapas, qoritapas, qolqetapas rikuspan chaykunata munaspa apakurani. Karpaypi p’anpasqan kashan,’ nispa.

Chaykunata tarispa Josueman apaqtinkun, payqa Ahanta nin: ‘¿Ima raykun kayta ruwawankiku? ¡Kunanmi Jehová Dios qantapas muchuchisunki!,’ nispa. Chaymi llapan runakuna Ahanta, familiantapas rumiwan ch’aqespa wañuchinku. ¿Imatan chaymanta yachanchis? Manan hayk’aqpas hukpa kaqninkunataqa apakunachu.

Hukmantan Israelpi runakunaqa rinku Hai runakunawan maqanakuq. Kay kutipiqa yanapanmi Jehová Dios llaqtanta, chaymi maqanakuypi atipanku.

Josué 7:1-26; 8:1-29.