Kichay leenaykipaq

Índice nisqaman riy

 58 WILLAKUY

Davidwan Goliatwan

Davidwan Goliatwan

HUKMANTAN filisteokunaqa Israelwan maqanakuyta munanku. Davidpa kinsantin kuraq wayqenkunaqa Saulpa ejercitonpin kashanku. Huk p’unchaymi taytan Jesé Davidta nin: ‘Yacharamuy wayqeykikunaq imayna kasqankuta. Mikhunankupaqtaq apay t’antata huk mikhuykunatawan,’ nispa.

Campamentoman chayaspan Davidqa soldadokuna ukhupi wayqenkunata maskhan. Filistea llaqtayoq hatun runa Goliatmi lloqsimun israelitakunata asipayananpaq. 40 p’unchayñan chayta ruwashan sapa tutamanta, sapa ch’isi. Kaytan qaparin: ‘Qankuna ukhumanta akllaychis pitapas ñoqawan maqanakunanpaq. Pay wañuchiwaqtinqa ñoqaykun kamachiykichis kapusaqku. Ñoqa wañuchiqtiytaq qankuna kamachiyku kapunkichis. Akllaychis pitapas ñoqawan maqanakunanpaq,’ nispa.

Davidmi soldadokunata tapun: ‘¿Imatan qonqaku kay filisteota wañuchiqman, israelitakunata p’enqaypi kasqanmanta horqoqtin?,’ nispa.

‘Saulmi qhapaqyachinqa, ususintapas qonqan warmin kananpaq,’ ninmi huk soldado.

Llapa israelitakunan ichaqa Goliatta manchakunku hatun runa kasqan rayku. Yaqa kinsa metro sayayniyoqmi, huk soldadon escudontapas apan.

Wakin soldadokunan Saulta ninku, Davidmi Goliatwan maqanakuyta munan, nispa. Chaymi Saulqa Davidta nin: ‘Manan riwaqchu. Waynachallaraqmi kanki, payqa wayna-kayninmantapacha maqanakuqmi,’ nispa. Davidmi nin: ‘Ñoqaqa wañuchiranin ukumaritapas leontapas taytaypa ovejanta apashaqtin. Kay filisteopas chay animalkuna hinallan kanqa. Jehová Diosmi yanapawanqa,’ nispa. Chaymi Saulqa nin: ‘Riy maqanakuq, Jehová Diostaq qanwan kachun,’ nispa.

Mayuta rispan Davidqa akllamun pisqa llusk’a rumikunata. Chaymantan warak’antin rin hatun runawan maqanakuq. Manan Goliatqa rikusqanta creeyta atinchu. Payqa yuyaykun Davidta usqhaylla wañuchinanpaqmi.

Goliatmi nin: ‘Hamuy kayman, aychaykitan ankakunaman salqa animalkunamanwan qaraykusaq,’ nispa. Davidmi ichaqa nin: ‘Qanmi ñoqaman hamunki espadayoq, lanzayoq, jabalinayoq, ñoqataqmi qanman risaq Jehová Diospa sutinpi. Paymi yanapawanqa chaymi qanta wañuchisayki,’ nispa.

Davidqa phawanmi Goliatpa kasqanman. Ch’uspanmanta rumita horqospan tukuy kallpawan Goliatta warak’an. ¡Goliatpa mat’inpi hap’ichiqtinmi payqa wikch’ukuspa wañun! Kallpasapa soldadonku wañusqanta rikuspan filisteokunaqa mancharikuspa ayqekunku. Paykunaq qhepanta phawaspan israelitakunaqa maqanakuypi atipanku.

1 Samuel 17:1-54.