Kichay leenaykipaq

Índice nisqaman riy

 72 WILLAKUY

Ezequiasta Dios yanapan

Ezequiasta Dios yanapan

¿IMA raykun Jehová Diosmanta kay runa mañakushan? ¿Ima raykun cartakunata churan yupaychana wasiq ñawpaqenman? Kay runaqa Ezequiasmi. Israelpi iskaynin ayllukunatan kamachin. Hatun sasachakuykunapin kashan. ¿Ima rayku?

Asiriapi ejercitokunan atipankuña Israelpi chunka ayllukunata. Mana kasukuq kasqankumantan Jehová Diosqa mana yanaparanchu. Kunanqa iskaynin ayllukunawanmi Asiria suyupi ejercitokunaqa maqanakuyta munanku.

Asiriapi kamachikuqmi cartata apachin Ezequiasman. Kay cartakunatan kamachikuq Ezequiasqa churan Dios yupaychana wasiq ñawpaqenman. Kay cartakunapin Asiriapi kamachikuqqa Diosmanta asikun, Ezequiastataq nin amaña payman churapakunanpaq. Chay raykun Ezequiasqa mañakun: ‘Jehová Diosniy, qespichiwayku Asiriapi kamachikuqmanta. Chaymi llapa suyukuna yachanqa qanlla cheqaq Dios kasqaykita,’ nispa. ¿Uyarinqachu Jehová Dios mañakusqanta?

Ezequiasqa allin kamachikuqmi. Manan chunka ayllupi kamachiqkuna hina millaychu, nitaq taytan Acaz hinapaschu. Payqa llapantan Diospa kamachikuyninkunata kasukun. Chaymi mañakuyta tukuqtin hina, profeta Isaiasqa Diospa nisqanta willan: ‘Asiriapi kamachikuqqa manan haykumunqachu Jerusalenman. Manan mayqen soldadollapas asuykamunqachu. Manan huk flechallatapas kay llaqtaman chayachimunqachu,’ nispa.

Qhawariy kay paginapi dibujota. ¿Pikunan chay wañusqa soldadokuna? Asiriokunan. Angelnintan Jehová Diosqa kachamuran chaymi huk tutallapi kay angelqa 185.000 soldadokunata wañuchiran. Chay raykun Asiriapi kamachikuqqa llaqtanman kutipun.

Iskaynin ayllukunan qespichisqa kanku, chaymi llaqtapi runakunaqa thakpi kawsanku. Ezequías wañuqtinmi ichaqa churin Manasés kamachin. Manasespas churin Amonpas millay kamachikuqkunan. Chay raykun millay kawsay sinchita q’oñirin. Kikin kamachinkuna Amonta wañuchiqtinmi churin Josías iskaynin ayllukunata kamachin.

2 Reyes 18:1-36; 19:1-37; 21:1-25.