Kichay leenaykipaq

Índice nisqaman riy

 25 WILLAKUY

Familia Egiptoman astakun

Familia Egiptoman astakun

JOSEQA manañan waqayninta mukikuyta atiranñachu. Lliw kamachinkunatan niran cuartomanta lloqsinankupaq. Wayqenkunawan sapallan kaspanmi Joseqa waqayta qallariran. Manataq yacharankuchu imamanta waqasqanta chayqa, wayqenkunaqa utirayarankupaschá. Paymi niran: ‘José wayqeykichismi kani. ¿Kawsashanraqchu taytay?’, nispa.

Manchakuymantan wayqenkunaqa mana rimariytapas atirankuchu. José paykunata niran: ‘Asuykamuwaychis, ama hina kaspa’. Asuykuqtinkun, niran: ‘Egipto suyuman vendesqaykichis José wayqeykichismi kani’, nispa.

Munakuywanmi Joseqa nin: ‘Ama ñakapakuychischu kayman vendewasqaykichismanta. Diosmi Egipto suyuman kachamuwaran runakuna kawsananpaq. Faraonmi churawan suyuntinpi kamachinaypaq. Chay rayku usqhayta taytayman kutispa kaykunata willamuychis. Kaymantaq hanpuchun kaypi tiyananpaq’, nispa.

Chaymi Joseqa wayqenkunata marq’aykuspa llapankuta much’aykuran. Josepa wayqenkuna hamusqanta yachaspan Faraonqa Joseta niran: ‘Carretakunata aparikuspa taytaykita familiantinta kayman pusamuchunku. Egiptopi allin kaq allpatan paykunaman qosaq’, nispa.

Chaytan ruwaranku. Kaypi rikusqayki hina, Joseqa taytanta marq’arikushan Egipto suyuman familiantin chayamuqtin.

Jacobpa familianqa askhatan yapakusqa. Egipto suyumanqa llapankun astakuranku, Jacobpas churinkunapas hawayninkunapas, llapankupiqa 70 karanku. Churinkunaq warminkupas chaypin karanku, yaqapaschá kamachikunapas askha riranku. Llapankun Egipto suyupi tiyaranku. Israelita nispan suticharanku, Jacobpa sutinta Israelman Diospa cambiasqan rayku. Diospa akllasqan llaqtan karanku; chaymantaña paykunamanta astawan yachasun.

Génesis 45:1-28; 46:1-27.