Kichay leenaykipaq

Índice nisqaman riy

 103 WILLAKUY

Wisq’asqa cuarto ukhupi rikhurin

Wisq’asqa cuarto ukhupi rikhurin

PEDROPAS Juanpas Jesusta p’anpasqanku cheqasmanta lloqsiqtinkun, María sapallan chaypi qhepakuspan waqayta qallarin. ¡Aya p’anpana ukhuta qhawarispan rikun iskay angelkunata! Paykunan tapunku: ‘¿Ima raykun waqanki?,’ nispa.

Marian kutichin: ‘Señorniytan suwarunku, manan yachanichu mayman churasqankuta,’ nispa. Kutirispan huk runata rikun. Paymi tapun: ‘¿Pitan maskhashanki?,’ nispa.

Mariaqa yuyaykun Huerta qhawaq kananpaq Jesuspa cuerpontapas apananpaq. Chaymi nin: ‘Qan aparanki chayqa willaykuway mayman churamusqaykita,’ nispa. Chay runaqa Jesusmi. Hukniraq cuerpoyoq kaqtinmi Mariaqa mana reqsinchu. Sutinmanta waqyaqtinñan Mariaqa reqsin Jesusta. Usqhayllan phawan Jesuspa qatikuqninkunaman willaq: ‘¡Señortan rikuramuni!,’ nispa.

Chay p’unchaymi iskay qatikuqninkuna Emaus llaqtachata rishaqtinku huk runa paykunaman asuykuran. Qatikuqkunaqa sinchi llakisqan kashanku Jesuspa wañusqanmanta. Purisqankupin kay runaqa Bibliamanta imaymanakunata willan, chaywanmi paykunaqa kusirikunku. Mikhunankupaq samaqtinkun, iskaynin qatikuqninkuna reparanku chay runa Jesús kasqanta. Jesús ch’usaqman tukun, paykunataq Jerusalenman kutinku apostolkunaman willanankupaq.

Chaykuna qhepatan Jesusqa rikhurillantaq Pedroman. Wakinqa kusikunkun chaykunata uyarispa. Iskaynin qatikuqkunan Jerusalenta rinku apostolkunawan tupanankupaq. Willankun ñanpi Jesuspa rikhurisqanta. Chayta willashaqtinku, ¿yachankichu ima sucedesqanta?

Qhawariy dibujota. Jesusmi cuartopi rikhurin punkupas llavewan wisq’asqa kashaqtin. ¡Anchatan qatikuqninkunaqa kusikunku! ¡Kusikunapaq p’unchaymi chayqa! ¿Yupawaqchu Jesuspa hayk’a kuti rikhurisqanta? ¿Pisqachu?

Apóstol Tomasqa manan paykunawanchu karan Jesús rikhuriqtin. Chay raykun qatikuqkunaqa ninku: ‘¡Señortan rikuyku!,’ nispa. Chaymi Tomasqa niran, creenaypaqqa ñoqa kikiypunin rikunay, nispa. Pusaq p’unchay qhepatan qatikuqninkunaqa hukmanta kashanku wisq’asqa cuartopi, kunanqa Tomaspas paykunawanmi kashan. Qonqayllamantan Jesusqa chaypi rikhurin. Chayraqmi Tomasqa creen.