Kichay leenaykipaq

Índice nisqaman riy

 21 WILLAKUY

Joseta wayqenkuna cheqnikunku

Joseta wayqenkuna cheqnikunku

¡QHAWARIY kay waynata, llakisqan kashan! Sutinmi José. Wayqenkunan kay Egipto suyuman riq runakunaman venderanku. Chaypin Joseqa kamachi kanqa. ¿Ima raykun Josepa wayqenkuna chayta ruwaranku? Joseta envidiakuspankun.

Paykunaq taytan Jacobmi Joseta anchata munakuran. Chay munakuynintan rikuchiran sumaq p’achata ruwapuspa. Taytankuq munakusqanta reparaspan chunkantin wayqenkunaqa Joseta cheqnikuranku. Karanmi huk razonpas cheqnikunankupaq.

Iskay kutitan José mosqokuran. Iskaynin mosqoyninpin wayqenkunaqa paypa ñawpaqenpi k’umuykuranku. Chay mosqokusqanta willakuqtinmi wayqenkunaqa astawan cheqnikuranku.

Huk kutinmi, taytankuq ovejankunata kuraq wayqenkuna michishaqtin, Jacobqa Joseta kamachiran wayqenkunata watukuq rinanpaq. Paykunaq kasqanman Josepa asuykusqanta rikuspan, wakin wayqenkuna niranku: ‘¡Wañuchisun kaytaqa!,’ nispa. Kuraq wayqenku Rubentaq niran: ‘¡Ama, ama chaytaqa ruwaychischu!,’ nispa. Chaymi ch’usaq ch’aki p’uytuman wikch’uyuranku. Chaymantataq tiyaykuspa rimanakuranku Joseta ima ruwanankumanta.

Chayllamanmi hamusqaku ismaelita runakuna. Chaymi Judaqa wayqenkunata niran: ‘Ismaelita runakunaman vendesun,’ nispa. Chaytan ruwaranku. ¡Josetan venderanku 20 qolqellaman! ¡Millaymi chay ruwasqankuqa karan, manan khuyapayarankuchu!

¿Ima ninqakutaq taytankuta? Josepa sumaq p’achantan ñak’asqanku cabraq yawarninman askha kutita chapuranku. Chayta taytanku Jacobman apaspan niranku: ‘Kaytan tarimuyku. Josepa p’achanchu icha manachu chayta allinta qhawaykuy,’ nispa.

Jacobqa reqsiruranmi Josepa p’achan kasqanta. ‘Ima phiña animalchá Josetaqa wañuchiran,’ nispan llakikun. Chhayna yuyaykunantan munaranku Josepa wayqenkunaqa. Anchatan Jacobqa llakikun. Askha p’unchaymi waqaran. Joseqa manan wañusqachu. ¿Iman payta sucederan apasqanku llaqtapi? Chaymanta yachasun.

Génesis 37:1-35.