Kichay leenaykipaq

Índice nisqaman riy

 1 WILLAKUY

Diosmi kamayta qallarin

Diosmi kamayta qallarin

LLIW allinkunaqa Diosmantan hamun. Paymi Intita ruwaran p’unchaypi k’anchananpaq; Killata ch’askakunatawan tutapi k’anchananpaq. Allpatataq tiyananchispaq.

Manan ichaqa Intita, Killata, ch’askakunata nitaq Allpatachu Diosqa ñawpaqta ruwaran. ¿Imatan ñawpaqta ruwaran? Pay hina espiritukunatan. Imaynan Diostapas mana rikunchischu, chhaynatan paykunatapas mana rikusunmanchu. Biblia sutichan angelkuna, nispa. Diosqa angelkunata ruwaran paywan kuska hanaq pachapi tiyanankupaqmi.

Diospa ñawpaq ruwasqan angelqa ancha munakusqanmi karan. Diospa phiwi Churinmi karan, Yayanwan kuskataq llank’aranpas. Diostan yanaparan imaymana ruwaypi. Yanaparanmi Intita, Killata, ch’askakunata, Allpanchistapas ruwayta.

¿Imaynan Allpanchis karan? Qallariypiqa mana tiyanapaq hinan karan. Manan imapas karanchu lamar-qochallan rikhuriran. Ichaqa Diosmi munaran kay Allpapi runakunaq tiyananta. Chaymi Allpata ñoqanchispaq allichayta qallariran. ¿Imatan ruwaran?

Ñawpaqtaqa, k’anchaytan Allpa necesitaran. Chay raykun Diosqa Intiwan Allpata k’anchachiran. Chhaynatan qallariran p’unchaypas tutapas. Chaymantan allpata lamar-qocha pataman wichachiran.

Qallariypiqa manan imapas allpapi karanchu. Kaypi rikusqayki dibujomanmi rikch’akuran. Manan karanchu t’ikakuna, sach’akuna nitaq animalkunapas. Lamar-qochapipas manan challwakuna karanchu. Askhatan Diosqa llank’aran, runakunapas animalkunapas kay Allpapi sumaqta kawsanankupaq.

Jeremías 10:12; Colosenses 1:15-17; Génesis 1:1-10.