Kichay leenaykipaq

Índice nisqaman riy

 19 WILLAKUY

Jacobpa askha wawankuna

Jacobpa askha wawankuna

QHAWARIY kay familiata. Kaykunaqa Jacobpa 12 churinkunan. Karanmi ususinkunapas. ¿Yachankichu wakin churinkunaq sutinta? Yachasun wakillantapas.

Lean wachakuran Rubenta, Simeonta, Levita, Judatawan. Mana wawayoq kaspanmi Raquelqa anchata llakikuran. Chaymi Jacobman qoran kamachin Bilhata, paymi wachakuran Danta, Neftalitawan. Leapas qollarantaqmi Jacobman kamachin Zilpata, paymi wachakuran Gadta, Asertawan. Chaymantan Lea wachakullarantaq iskay wawakunata Isacarta Zabulontawan.

Tiempoq pasasqanmanqa Raquelpas wachakuranmi huk wawata. José nispan suticharan. Chaymantaña Josemantaqa astawan yachasun, payqa allin reqsisqa runan karan. Jacobpa kay 11 churinkunaqa naceran suegron Labanwan tiyashaqtinkuraqmi.

Karanmi ususinkunapas, Bibliaqa willawanchis huknin ususillanmanta. Dina sutin karan.

Tiempo pasaqtinmi Jacobqa Labanpa wasinmanta ripuyta munaran Canaán suyuman. Chaymi askha wawankunata, ovejankunata, wakankunatapas huñuspa ripuran.

Jacob Familiantin Canaanman chayasqan qhepatañan Raquelqa huk wawata wachakullarantaq. Chayqa sucederan ñanpi kashaqtinkun. Sinchitan Raquelqa ñak’ariran wachakunanpaq, chaymi wachakushaspa wañupuran. Wawachaqa qhalin nacesqa. Benjamín sutiwanmi taytan Jacob suticharan.

Ama qonqasunchu Jacobpa 12 churinkunaq sutinta, Israel suyun paykunamanta qallariran. Israelpi 12 ayllukunaqa Jacobpa 10 churinkunaq sutinwan sutichasqan, iskaytaq Josepa iskay churinkunaq sutinwan. Isaacqa unaytan kawsaran, kay wawakunatapas rikusqaraqmi, kusikuranchá askha hawayniyoq kasqanmanta. Kunanqa Dinamanta yachasun.

Génesis 29:32-35; 30:1-26; 35:16-19; 37:35.