Kichay leenaykipaq

Índice nisqaman riy

 99 WILLAKUY

Altos cuartopi

Altos cuartopi

KUNANQA jueves tutan, iskay p’unchay ñawpaqtan Olivos orqopi kasharan. Jesusmi hamun 12 apostolkunantin altospi kay hatun cuartoman, Pascua cenata mikhunankupaq. Judas Iscarioten lloqsishan. Sacerdotekunamanmi willamunqa Jesusta imayna hap’inankupaq.

Huk p’unchay ñawpaqtan Judasqa paykunata niran: ‘¿Imatan qowankichis Jesusta hap’iysiqtiy?,’ nispa. Paykunan niranku: ‘Kinsa chunka qolqetan qosaykiku,’ nispa. Chaymi Judasqa sacerdotekunawan tupaq rishan Jesuspa kasqanman pusananpaq. ¡Manan allinchu chay ruwasqanqa!, ¿riki?

Pascua mikhunata tukunku. Kunanmi ichaqa yuyarina cenata Jesús qallarinqa. Apostolninkunaman t’antata qospan nin: ‘Mikhuychis, kayqa qankuna rayku qosqay cuerpoymanmi rikch’akun,’ nispa. Chaymantataq vinoyoq vasota hap’ispa, kayta nin: ‘Ukyaychis, kayqa qankuna rayku hich’anay yawarniymanmi rikch’akun,’ nispa. Kay cenatan Bibliaqa sutichan ‘Señorpa cenan,’ nispa.

Israelitakuna Egipto suyupi kashaqtinkun Diospa angelnin wañuchiran egipciokunaq phiwi churinta, paykunaq churintataq qespichiran, chayta yuyarispan israelitakunaqa Pascua mikhunata mikhuranku. Kunanmi ichaqa Jesús munan payta yuyarinankuta, paykuna rayku wañusqantapas. Chaypaqmi kay cena.

Señorpa Cenanta mikhusqanku qhepatan, Jesusqa apostolninkunata nin mana manchakuspa iñiyninkupi qaqa sayanankupaq. Chaymantan Dios hatunchana takikunata takispa cuartomanta lloqsinku. Chaykamaqa yaqa kuska tutañan. ¿Maytan rinku?