Kichay leenaykipaq

Índice nisqaman riy

 8 WILLAKUY

Allpapi hatun runakuna

Allpapi hatun runakuna

SICHUS qanman hamuq runa sinchi hatun kanman, umanpas wasiykiq techonmanraq chayanman chayri, ¿ima niwaqtaq? ¡Hatun runa niwaqchá! Ñawpa tiempopiqa karanmi kay Allpapi chhayna runakuna. Biblian willawanchis chay runakunaq taytan hanaq pachapi angelkuna kasqanta. ¿Imaynataq chayri karan?

Millay ángel Satanasmi sasachakuykunata qallarichiran. Diospa angelninkunatapas millaymanmi tukuchiyta munaran. Tiempowanqa wakin angelkunapas Satanastan kasukuranku. Hanaq pachapi Diospa kamachisqan ruwanankutan saqeranku. Allpaman hamuspataq runaman tukuranku. ¿Ima raykun chayta ruwaranku?

Biblian willan Allpapi sumaq rikch’ayniyoq warmikunata rikuspa paykunawan tiyakuy munasqankuta. Chay raykun Allpata hamuspa paykunawan casarakuranku. Bibliaq nisqan hina kay ruwasqankuqa manan allinchu karan, Diosqa angelkunata ruwaran hanaq pachapi tiyanankupaqmi.

Kay angelkunaq churiyasqan wawakunaqa hukniraymi karanku. Qholla wawa kashaqtinkuqa manapaschá reparakuranchu hukniray kasqankuta. Wiñasqankuman hinan ichaqa aswan kallpayoq hatun runaman tukuranku.

Kay hatun runakunaqa millaymi karanku. Kallpasapa hatun kaspankun runakunata ñak’arichiranku. Llapa runakunatan tanqaranku paykuna hina millay kanankupaq.

Enocqa wañupusqañan, ichaqa karanmi Allpapi huk allin runa. Kay runaq sutinmi Noé. Payqa Diospa munasqantapunin ruwaran.

Diosmi Noeman willaran millay runakuna wañuchinan tiempoq chayamunanmanta. Noeta, familianta, askha animalkunatawanmi ichaqa qespichinan karan. Yachasun imayna ruwasqanta.

Génesis 6:1-8; Judas 6.