Kichay leenaykipaq

Índice nisqaman riy

 60 WILLAKUY

Abigailwan Davidwan

Abigailwan Davidwan

¿REQSINKICHU Davidman hamuq kay sumaq rikch’ayniyoq warmita? Abigailmi sutin. Payqa allin yuyaykuq warmin, chaymi Davidta hark’an mana allin ruwananmanta. Ñawpaqtaqa yachasun Davidta imakuna sucedesqantaraq.

Saulmanta ayqekuspan Davidqa, qaqa t’oqopi pakakuran. Wayqenkunapas wakin familianpas paypa kasqanmanmi rinku. Yaqa 400 runakunan payman rinku, chaymi Davidqa paykunata umallin. Moab suyupi kamachiqpata rispan Davidqa valekun: ‘Ama hina kaspa qhawaripuway mamayta taytaytawan, ñoqata imapas sucedewananta yachanaykama,’ nispa. Chay qhepamanmi Davidqa runakunantin montekunapi pakakun.

Chaymantan Davidqa Abigailta reqsin. Abigailpa qosan Nabalqa askha allpayoq qhapaq runan. 3.000 ovejayoq 1.000 cabrakunayoq ima. Nabalqa millay runan. Warmin Abigailmi ichaqa munay warmi. Allintan imatapas ruwan. Huk kutinmi familiantapas qespichiran. ¿Imaynata?

Davidpas runankunapas sumaq sonqon karanku Nabalwanqa. Qhawaysirankun ovejankunata. Huk p’unchaymi David runankunata kachan Nabalpa yanapayninta valekamunankupaq. Ovejakunaq millmantan Nabalqa rutuchisharan. Fiesta p’unchaymi paykunapaqqa karan, chaymi askhata sumaq mikhunakunata Nabalqa ruwachiran. Davidpa runankunan ninku: ‘Ñoqaykuqa qanpaq allinta ruwapuraykiku. Manan hayk’aqpas ch’ulla ovejallatapas suwaraykikuchu, aswanmi qhawaysiraykiku. Chay rayku, ama hina kaspa, mikhunawan yanapaykuwayku,’ nispa.

‘Manan qankunamanqa ima mikhunaytapas qoykichismanchu,’ nispan Nabalqa nin. K’araqtan riman, Davidmantapas millaytan riman. Chaykunata Davidman willaqtinkun, payqa sinchita phiñakun. ‘¡Espadaykichista hap’iychis!’ ninmi. Nabalta runankunatawan wañuchinankupaqmi rinku.

Nabalpa millay rimasqanta uyarispan huknin runanqa Abigailman willamun. Chaymi Abigailqa mikhunata ruwachispa asnokunapi aparikuspa puririn. Davidwan tupaspan, asnomanta uraykuspa k’umuykun kayta nispa: ‘Ama hina kaspa, ama kasuychu qosay Nabalpa rimasqanta. Payqa mana yuyayniyoqmi, chhayna kaspanmi imatapas mana allinta ruwan. Kay regalotan apamushayki. Chaskiykuway ama hina kaspa, panpachaykuwaykutaq kay sucedesqanmanta,’ nispa.

Davidmi nin: ‘Yachayniyoq warmin kanki. Hark’awankin Nabal wañuchinayta. Ama llakikuychu, thakpi wasiykiman kutipuy,’ nispa. Nabal wañuqtintaq Davidqa Abigailwan casarakun.

1 Samuel 22:1-4; 25:1-43.