Kichay leenaykipaq

Índice nisqaman riy

 16 WILLAKUY

Isaacpaq allin warmi

Isaacpaq allin warmi

¿REQSINKICHU kay dibujopi rikusqayki warmita? Sutinqa Rebeca. Payman asuykusqan qharitaqmi Isaac. Rebecaqa Isaacpa warminmi kanqa. ¿Imaynatan chay sucederan?

Abrahanmi Isaac churinpaq allin warmita munaran. Manan munaranchu Canaán suyupi warmikunawan casarakunanta, chay llaqtapi runakunaqa pantasqa dioskunatan yupaycharanku. Chaymi Abrahanqa kamachinta niran: ‘Kutiy Haranta familiaykunaman, chaymanta churiy Isaacpaq warmita pusamunki’, nispa.

Chayta niqtin hinan Abrahanpa kamachinqa chunka camellokunata aparikuspa karuta riran. Abrahanpa familian tiyasqan llaqtaman chayashaspañan p’uytuq qayllanpi samaran. Manaraq tutayashaqtinmi llaqtapi warmikunaqa p’uytumanta unu horqoq risqaku. Chaymi Abrahanpa kamachinqa Jehová Diosmanta mañakuran: ‘Ñoqapaq, camelloykunapaqpas unu horqoq sipasyá kachun Isaacpaq akllasqayki warmi’, nispa.

Chayllamanmi Rebecaqa unuman hamuran. Abrahanpa kamachin unuta mañakuqtintaq Rebecaqa haywariran. Ch’akichikuq camellokunamanpas usqhaylla unuta horqospa ukyachiran. Camellokunaqa askhatan unuta ukyanku, chaymi Rebecaqa askhata llank’aran.

Chay ruwayta tukuqtinmi, Abrahanpa kamachin tapuran taytanpa sutinta. Tapullasqataqmi wasinpi qorpachakunanpaq. Rebecataq kutichiran: ‘Taytayqa Betuelmi, wasiykupipas qorpachakuwaqmi,’ nispa. Abrahanpa kamachinqa yacharanmi Betuelqa Abrahanpa wayqen Nacorpa churin kasqanta. Chay raykun qonqorikuspa Jehová Diosman graciasta qoran, Abrahanpa familianman pusasqanmanta.

Chay tutan Abrahanpa kamachinqa Rebecaq taytan Betuelman, turan Labanmanwan willan imaman hamusqanta. Iskayninkupas manan hark’akurankuchu Rebeca paywan rispa Isaacwan casarakunanta. ¿Ima niranmi Rebeca payta tapuqtinku? Munaranmi Isaacwan casarakuyta. Chay raykun paqaristinpacha camellokunaman sillakuspa Canaán suyuta riranku.

Tutatañan chayaranku. Rebecan rikuran campopi purikuq runata. Isaacmi karan. Payqa kusikuranmi Rebecata rikuspa. Kinsa wata ñawpaqllatan Isaacpa maman Sara wañusqa, chaymi Isaacqa llakisqaraq kasharan. Isaacqa anchatan Rebecata munakuran, kunanqa yapamantan kusikuran.

Génesis 24:1-67.