Genesis 21:1-34
21 Jehova Diosqa manam Sarataqa qunqarqachu, chaymi Jehova Diosqa nisqanman hina Sarapaq ruwarqa.+
2 Hinaptinmi Saraqa wiksayakuruspan+ Diospa nisqan tiempopi wachakurqa, Abrahanqa machuyayninpiñam churiyuq karqa.+
3 Sarapa wachakusqan wawatam Abrahanqa suticharqa Isaacwan.+
4 Chaymantam pusaq punchawniyuq churin Isaac kachkaptin Abrahanqa Diospa kamachisqanman hina qari kayninpi señalarqa.+
5 100 watanpi Abrahan kachkaptinmi churin Isaacqa nacerqa.
6 Hinaptinmi Sara nirqa: “Diosmi kusikuymanta asirachiwarqa, pipas kayta uyariqqa ñuqawan kuskachá asikunqa*”, nispa.
7 Saraqa nirqataqmi: “¿Pitaq ninman karqa Abrahanpa churinta ñuñunaymanta? Paypa churintam yuyaqña kachkaptin wachakuruni”, nispa.
8 Chaymantam Saraqa wiñasqanman hina Isaacta anukarurqa. Chay anukasqan punchawmi Abrahanqa kusikuymanta achka mikuyta ruwachirqa.
9 Sarañataqmi qawarqa Isaacmanta Ismael asikusqanta,+ Ismaelqa karqa Egipto nacionniyuq Agarpi Abrahanpa churinmi.+
10 Chaymi Abrahanta Sara nirqa: “¡Agarta wawantinta qarquy! Waway Isaacqa manam paywanqa rakinakunmanchu imapas kapuqnikitaqa”, nispa.+
11 Churin Ismaelmanta chaynata niptinmi Abrahanqa llumpayta llakikururqa.+
12 Hinaptinmi Abrahanta Dios nirqa: “Churiki Ismaelmanta hinaspa mamanmanta Sarapa imapas nisusqaykiwanqa amayá llakikuychu. Paypa nisusqaykitayá uyariy, Isaacmantam kanqa miraynikiqa.+
13 Agarpa wawan Ismaelmantapas huk naciontam rikurichisaq churiki kasqanrayku”, nispa.+
14 Chaymi Abrahanqa tutapayta hatarispan tantata hinaspa yakuta odrepi Agarman quykurqa. Abrahanqa tukuy chaykunata sawaykachispanmi Agartawan churinta aviarurqa.+ Agarqa pasakuspanmi Beer-seba sutiyuq chunniqpi purirqa mana maymanpas rinanpaq kaptin.+
15 Punchawkuna pasasqanman hinam yakunku tukururqa, chaymi Ismaelta taksa sachapa sikinpi siriykachirqa.
16 Hinaspanmi Agarqa karuniqman rispan sapallan tiyaykuspa waqallarqa. Chaytaqa ruwarqa “manam wawaypa wañusqantaqa rikuyta munanichu” nispanmi.
17 Chaymantam Diosqa Ismaelta uyariykurqa,+ hinaptinmi Diospa angelnin hanaq pachamanta Agarta nimurqa:+ “¿Imanantaq? Ama llakikuychu, Diosmi warmaykita uyariykun.
18 Hatariy hinaspa warmaykita yanapay hatarinanpaq, paymantam hatun nacionta rikurichisaq”, nispa.+
19 Chaymantam Diosqa Agarman rikuykachirqa pozota. Agarñataqmi chayman rispan odreman yakuta hillpurqa, hinaspam warmanman tomachirqa.
20 Ismaeltaqa wiñasqanman hinam Dios yanaparqa.+ Chaymi Ismaelqa chunniqpi yachaspan* punchawkunapa risqanman hina flechayta yacharurqa.
21 Chaymantam Ismaelqa Paran sutiyuq chunniqpi+ yachananpaq pasakurqa, hinaptinmi Egipto warmiwan maman casarachirqa.
22 Chay watakunapim Abimelecqa soldadonkunapa capitannin Ficolwan rirqa Abrahanwan rimaq, hinaspam nirqa: “Diosqa tukuy ima ruwasqaykipim qanwan kachkan.+
23 Chayraykuyá niway ñuqatapas, churiykunatapas hinaspa willkaykunatapas ama imanawanaykikupaq. Niwaytaqyá kuyasqayman* hina ñuqata hinaspa yachasqayki llaqtapi runakunatapas kuyawanaykikupaq”, nispa.+
24 Abrahanñataqmi nirqa: “Arí, chaynayá kachun”, nispa.
25 Ichaqa Abimelecmanmi willakurqa serviqninkuna pozota qichurusqanmanta.+
26 Abimelecñataqmi nirqa: “Manam yacharqanichu pim chayta ruwasusqaykitaqa. Manam willawarqankichu, chayraqmi kunan yacharuni”, nispa.
27 Chaynata niptinmi Abrahanqa ovejakunatawan vacakunata Abimelecman quykurqa. Chaynatam iskayninku rimarqaku*.
28 Qanchis malta ovejakunata Abrahan rakiruptinmi
29 Abimelecqa Abrahanta nirqa: “¿Imanasqataq qanchis malta ovejakunata rakirunki?”, nispa.
30 Hinaptinmi Abrahanqa nirqa: “Kay qanchis malta ovejakuna qusqaytam chaskiwanayki. Kaywanmi nichkayki kay pozoqa ñuqapa uchkusqay kasqanta”, nispa.
31 Chaymi Abrahanqa chay rimasqanku lawta suticharqa Beer-sebawan*+ chaypi iskayninku rimasqankurayku*.
32 Chaynata Beer-sebapi rimasqankumantam,+ Abimelecqa soldadonkunapa capitannin Ficolwan Filisteaman kutirqa.+
33 Chaymanta qipatam Abrahanqa Beer-sebapi tamarisco sachata plantarqa, hinaspam wiñaypaq kawsaq Jehova Diospa sutinta hatuncharqa.+
34 Abrahanqa unay watam* Filistea runakunapa allpanpi yacharqa.+
Willakuykuna
^ Ichapas kanman: “Ñuqamantachá asikunqa”, niqpas.
^ Utaq: “Tiyaspan”.
^ Kaypiqa rimachkan imaña kaptinpas hinalla kuyasqanmantam.
^ “Beer-seba” ninanqa yaqachusmi “contrato ruwasqanku pozo” utaq “qanchisnintin pozo” ninan.
^ Utaq: “Pactota ruwasqankurayku”.
^ Utaq: “Achka punchawkunam”.
