Genesis 32:1-32
32 Chaymantam Jacobqa richkaspan Diospa angelninkunawan tuparurqa.
2 Paykunata rikuruspanmi Jacobqa nirqa: “¡Paykunaqa Diospa runankunam!”, nispa. Chaymi chay tupasqanku sitiota suticharqa Maanainwan*.
3 Chaymantam Jacobqa wawqin Esauman willakuqkunata kacharqa, Esauqa kachkarqa Edom law Seir allpapim.+
4 Chay kachasqan willakuqkunatam Jacobqa nirqa: “Wawqiy Esaumanyá kaynata nimuychik: ‘Wawqiki Jacobmi nisunki: “Kunankamam tionchik Labanwan yachamurqani*.+
5 Kunanqa kapuwanñam toroykuna, asnoykuna, ovejaykuna chaynataq serviqniykunapas.+ Chaymi llakipayariykullawanaykipaq willachimullayki”’”, nispa.
6 Chaymantam chay willakuqkunaqa Jacobpa kasqanman kutispanku nirqaku: “Wawqiki Esauwanmi tuparamuniku, paymi qanwan tupaykunanpaq 400 runankunawan hamuchkan”, nispa.+
7 Chaymi Jacobqa llumpayta mancharikuspan hukmanyarurqa,+ chayraykum iskayman rakirurqa runankunata, ovejankunata, cabrankunata, vacankunata hinaspa camellonkunata.
8 Hinaspam nirqa: “Punta riqkunata wawqiy Esau wañurachiptinqa, qipa riqkunam lluptinqaraq”, nispa.
9 Chaymantam Jacobqa Diosta mañakurqa: “Abueloy Abrahanpawan taytay Isaacpa yupaychasqan Jehova Dioslláy, qanmi niwarqanki: ‘Llaqtaykiman hinaspa aylluykikunapa kasqanmanyá kutiy, ñuqam yanapasqayki’, nispa.+
10 Ñuqaqa manam anchata kuyawanaykipaq* hinachu kani.+ Jordan mayutaqa tawnayuqllam chimpamurqani, kunanmi ichaqa animalniykunapas iskayman rakisqa achkallay-achka kachkan.+
11 Wawqiy Esau mana imanawananpaqyá yanapaykullaway,+ manchakunim hamuruspan churiykunata, warmiykunata hinaspa ñuqatapas wañurachiwananta.+
12 Qanmi niwarqanki: ‘Ñuqa yanapaptiymi miraynikikunaqa lamar quchapa patanpi aqu hinaña mana yupay atina achkallay-achka kanqa’”, nispa.+
13 Jacobqa hina chaypi puñuspanmi achikyaytaqa kapuqninkunamanta wakinta wawqin Esaupaq rakirqa.+
14 Paymi rakirqa 200 cabrakunata, 20 chivokunata, 200 ovejakunata, 20 carnerokunata,
15 uñayuqkama 30 camellokunata, 40 vacakunata, chunka torokunata, 20 china asnokunata hinaspa chunka urqu asnokunata.+
16 Hinaspam sapa-sapaqta huñuykuspan serviqninkunawan qatichispan nirqa: “Ñawpaqniytayá karu-karunka qatiychik”, nispa.
17 Punta riqtam nirqa: “Sichu wawqiy Esau tapusunki: ‘¿Pipa serviqnintaq kachkanki? ¿Maymantaq richkanki? ¿Pipataq kay qatisqayki animalkunaqa?’, nispa.
18 Hinaptinqa kaynatam ninki: ‘Taytalláy, ñuqaqa wawqiki Jacobpa serviqninmi kani. Kay animalkunatañataqmi qampaq qatichimuwachkan.+ Payqa qipatam hamuchkan’”, nispa.
19 Chaynallatam kamachirqa lliw qipa qatiqkunatapas. Hinaspam nirqa: “Chaynatam ninkichik wawqiy Esauwan tuparuspaykichikqa”, nispa.
20 Jacobqa nirqataqmi: “Wawqiytaqa ninkichiktaqmi: ‘Wawqiki Jacobqa qipatam hamuchkan’”, nispa. Chaytaqa nirqa sunqullanpi “tukuy kaykuna apachisqaywan wawqiypa sunqun tiyaykuptinqa+ ichapas kuyakuywan chaskiykuwanman” nispanmi.
21 Chaymi Jacobpa serviqninkunaqa ñawparqaku, Jacobñataqmi chay tutaqa carpanpiraq qiparqa.
22 Chay tutam Jacobqa hatarispan Jaboc mayuta chimparqa. Chimpachirqam 11 churinkunata,+ iskaynin warminkunata+ hinaspa warminkunapa serviqninkunatapas.+
23 Mayuta* chimpaspankuqa aparqakutaqmi tukuy imankutapas.
24 Jacob sapallan qiparuptinñataqmi huk runa payman rikuriykurqa, hinaptinmi Jacobqa chay runaman hapipakuruspan achikyanankama mana kacharikuyta munarqachu.+
25 Chaymi Jacob kacharikuyta mana munaptin chay runaqa wiqawninmantaña hapirurqa, hinaptinmi Jacobpa huknin pierna kuchun muqakururqa.+
26 Chaymantam chay runaqa Jacobta nirqa: “Kachariway, ñam achikyamuchkanña”, nispa. Jacobñataqmi nirqa: “Manam kacharisqaykichu bendeciwanaykikama”, nispa.+
27 Hinaptinmi chay runaqa tapurqa: “¿Imataq sutiki?”, nispa. Payñataqmi nirqa: “Jacobmi”, nispa.
28 Chaymi chay runaqa nirqa: “Kunanmantaqa manam Jacobñachu sutikiqa kanqa, aswanqa Israelñam*.+ Chaynam kanqa Dioswan hinaspa runakunawan atipanakuspa qam vencerusqaykirayku”, nispa.+
29 Jacobñataqmi nirqa: “Sutikitayá niykullaway”, nispa. Chay runañataqmi nirqa: “¿Imapaqtaq sutiytaqa yachayta munanki?”, nispa.+ Hinaspanmi chay runaqa Jacobta bendeciykurqa.
30 Chaymi Jacobqa chay kasqanku lawta suticharqa Penielwan*,+ chaynataqa suticharqa: “Diosta rikuruchkaspaypas kawsachkaniraqmi”, nispanmi.+
31 Chaymantam Jacobqa inti qispimuyta Peniel* lawninta wiqrustin richkarqa.+
32 Jacobpa pierna kuchunta chay runa muqarusqanraykum, Israelpa mirayninkunaqa kunankamapas mana mikunkuchu animalpa pierna kuchunpi kaq ankutaqa.
Willakuykuna
^ “Maanain” ninanqa: “Iskay tropakuna”, ninanmi.
^ Utaq: “Tiyamurqani”.
^ Kaypiqa rimachkan imaña kaptinpas hinalla kuyananmantam.
^ Utaq: “Paranan tiempopi yakuyuq wayquta”.
^ “Israel” ninanqa: “Dioswan peleaq”, ninanmi.
^ “Peniel” ninanqa: “Diospa uyan”, ninanmi.
^ Hebreo rimaypiqa nichkan: “Penuel”, nispam.
