Genesis 25:1-34
25 Abrahanñataqmi kaqmanta casarakurqa Ketura sutiyuq warmiwan.
2 Tiempopa risqanman hinam Keturaqa Abrahanpa churinkunata wachakurqa. Chay churinkunam karqa: Zimran, Jocsan, Medan, Madian,+ Isbac hinaspa Sua.+
3 Jocsanpa churinkunam karqa Seba hinaspa Dedan.
Dedanpa churinkunañataqmi karqa: Asurim, Letusim hinaspa Leumim.
4 Madianpa churinkunam karqa: Efa, Efer, Hanok, Abida hinaspa Eldaa.
Paykunam Keturapa mirayninkuna karqa.
5 Chaymanta qipatam Abrahanqa lliw kapuqninkunata Isaacman quykurqa.+
6 Huknin warminkunapi churinkunamanñataqmi wakin kapuqninkunata quykurqa. Hinaspam chay churinkunata intipa qispimunan lawman aviarurqa churin Isaacmanta karupi kanankupaq.+
7 Abrahanqa 175 watam kawsakurqa.
8 Payqa yuyaqyayninpiñam hawka wañukurqa, hinaspam abuelonkuna hina pampasqa karqa.
9 Churin Isaacwan Ismaelmi pamparqaku Mamrepa chimpan Macpela machaypi, chayqa karqa Het kasta Zoarpa churin Efronpa chakranpim.+
10 Chay chakraqa karqa Het runakunamanta Abrahanpa rantisqanmi, chaypim Abrahanta pamparqaku warmin Sarapa waqtanpi.+
11 Abrahan wañukuptinpas Diosqa hinallam churin Isaactaqa bendecirqa,+ Isaacqa Beer-laai-roi sutiyuq pozopa hichpanpim yacharqa*.+
12 Kaymi Abrahanpa churin Ismaelmanta willakuy.+ Ismaelqa karqa Sarapa serviqnin Egipto nacionniyuq Agarpa wawanmi.+
13 Ismaelpa churinkunaqa ayllunkuman hinam karqa. Piwi kaqpa* sutinmi karqa Nebayot,+ sullkankunañataqmi karqa: Quedar,+ Adbeel, Mibsam,+
14 Misma, Duma, Masa,
15 Hadad, Tema, Jetur, Nafis hinaspa Kedema.
16 Paykunam Ismaelpa churinkuna karqa. Sutinkum kachkan llaqtankuman hina hinaspa carpankupi yachasqankuman hina. Paykunam ayllunkupi 12 kamachiqkuna.+
17 Ismaelqa 137 wata kawsakuspanmi wañukurqa, hinaspam abuelonkuna hina pampasqa karqa.
18 Ismaelpa churinkunaqa yacharqaku Havila lawmanta+ Asiria lawkamam, Havilaqa kachkan Surpa hichpanpi+ hinaspa Egiptopa hichpanpim. Paykunaqa wawqinkunawanmi chimpa-chimpalla* yacharqaku.+
19 Kaymi Abrahanpa churin Isaacmanta willakuy.+
Isaacqa Abrahanpa churinmi karqa.
20 Isaacqa 40 watanpim karqa Padan-aram llaqtayuq Betuelpa+ churin Rebecawan casarakuspanqa, Rebecaqa karqa Aram llaqtayuq Labanpa paninmi.
21 Isaacqa warmin qulluq kasqanraykum Jehova Diosta mañakurqa, hinaptinmi Jehova Diosqa mañakusqanta uyariykurqa. Chaymi Rebecaqa wiksayakururqa.
22 Wiksanpi wawakuna haytanakuptinkum+ Rebecaqa nirqa: “Wiksallapiraq kayna kaptinkuqa, ¿imapaqñataq kawsayman?”, nispa. Chaymi Jehova Diosta tapukurqa.
23 Hinaptinmi Jehova Diosñataq Rebecata nirqa: “Iskay nacionkunam wiksaykipiqa kachkan.+ Paykunaqa sapakama llaqtayuqmi kanqaku.+ Hukninmi aswan atiyniyuq kanqa,+ piwi kaqmi sullkanta servinqa”, nispa.+
24 Chaymi wachakunanpaq punchaw chayaramuptin wiksanpiqa iskay wawakuna kasqa.
25 Punta kaqmi nacerqa pukay-pukay hinaspa pelosapallaña.+ Chaymi suticharqaku Esauwan*.+
26 Qipantañataqmi Esaupa talonninmanta hapikuykuspan wawqin nacemurqa.+ Chaymi paytaqa suticharqaku Jacobwan*.+ Isaacqa 60 watanpiñam karqa churinkunata warmin Rebeca wachakuptinqa.
27 Chaymantam warmakunaqa wiñarqaku. Esauqa purun animalkuna hapiq kasqanraykum maykunapipas purichkaq.+ Jacobñataqmi carpallapi hawka kawsakuq* karqa.+
28 Isaacqa Esautam astawan kuyarqa hapimusqan animalta mikunankupaq sapa kuti apasqanrayku, Rebecañataqmi Jacobta astawan kuyarqa.+
29 Huk punchawmi Jacobqa mikuyta yanukuchkarqa, Esauñataqmi purimusqanmanta pisipasqallaña chayaramurqa.
30 Hinaspam Esauqa wawqin Jacobta nirqa: “¡Ama hina kaspayá chay puka mikuychaykita qaraykullaway, yarqaymantam wañuruchkaniña!” nispa. Chayraykum Esautaqa suticharqaku “Edom*” nispa.+
31 Jacobñataqmi nirqa: “¡Piwi kaynikitaraqyá rantikuruway*!”, nispa.+
32 Hinaptinmi Esauqa nirqa: “¿Imapitaq piwi kayniyqa yanapawanqa? Yarqaymantam wañuruchkaniña”, nispa.
33 Jacobñataqmi nirqa: “¡Ñuqapaqña kananpaqyá niykuway!”, nispa. Chaymi Esauqa piwi kayninta Jacobman rantikururqa.+
34 Chaymi Jacobqa wawqin Esauman tantatawan lenteja mikuyta haywaykurqa. Esauñataqmi saksanankama mikuruspan pasakurqa. Chaynatam Esauqa piwi kayninta mana kaqpaqpas hapirqachu.
Willakuykuna
^ Utaq: “Tiyarqa”.
^ Utaq: “Punta naceqpa”.
^ Ichapas kanman: “Chiqninakuspa”, niqpas.
^ “Esau” ninanqa: “Pelosapa”, ninanmi.
^ “Jacob” ninanqa: “Talonta hapiq” utaq “pay tukuspan pantachiq”, ninanmi.
^ Utaq: “Mana huchayuq”.
^ “Edom” ninanqa: “Puka”, ninanmi.
^ Utaq: “Venderuway”.
