Genesis 39:1-23
39 Ismael runakunam+ Egipto llaqtaman chayaruspanku Potifar sutiyuq runaman Joseyta rantikururqaku*.+ Potifarqa karqa Egiptota kamachiqpa* ancha riqsisqa runanmi hinaspa soldadonkunata kamachiqmi.
2 Joseytaqa Jehova Diosmi yanaparqa,+ chaymi tukuy imatapas allinta ruwaq. Chaymi patronninqa Joseyta churarurqa wasinpi tukuy imanmanta nanachikunanpaq.
3 Patronninqa cuentatam qukururqa Joseywan Jehova Dios kasqanta hinaspa Joseyta tukuy ima ruwasqanpi Jehova Dios yanapasqanta.
4 Joseyqa hinallam patronnin Potifarwan kuyachikurqa, chayraykum yanapaqninña karqa. Chaymi patronnin Potifarqa wasinpi llapallan serviqninkunamanta nanachikuq kananpaq hinaspa kapuqninkunamanta cuentallikuq kananpaq churarurqa.
5 Patronninpa wasinpi Josey kamachiyta qallaykusqanmantapacham Potifarpa wasinpiqa imapas allin karqa Joseyta Jehova Dios yanapasqanrayku. Jehova Diosqa Joseyraykum bendecirqa Potifarpa wasinpi kaqkunata hinaspa chakranpi kaqkunatapas.+
6 Chaymi Potifarqa Joseypa makinpiña tukuy imanta saqiykurqa. Patronninqa manam imamantapas llakikurqañachu, aswanqa imapas mikunallanmantañam. Joseyqa kallpasapa sumaq rikchayniyuq musuñam karqa.
7 Chaymi patronninpa warmin qawapayayta qallaykurqa, hinaspam nirqa: “Hamuy puñukusun”, nispa.
8 Joseyñataqmi mana munaspan nirqa: “Patronniyqa tukuy imanta saqiwasqanraykum wasinpi imapas allin kananmantaqa mana llakikunchu.
9 Patronniyqa ñuqapa makiypim tukuy imanta saqiykuwan. Qamllatañam manaqa saqiwarqachu warmin kasqaykirayku. Chaynaqa, ¿imaynamá kay mana allintaqa ruwayman hinaspa Diostapas qipanchayman?”, nispa.+
10 Chaywanpas patronninpa warminqa sapa punchawmi Joseyta hinalla hikutaq puñunankupaq. Joseyñataqmi mana munaqchu, nitaqmi paywanqa qipaqpaschu.
11 Huk punchawmi Joseyqa imapas ruwayninta ruwaq patronninpa wasinman yaykurqa, llamkaqkunam ichaqa chay punchawqa mana wasi ukupiqa karqachu.
12 Hinaptinmi patronninpa warminqa pachanmanta hapiruspan Joseyta nirqa: “Puñukusunyá”, nispa. Joseyñataqmi lluptikurqa pachantapas saqiruspan.
13 Patronninpa warminqa Joseypa lluptikusqanta hinaspa pachanta makinpi saqirusqanta qawaspanmi,
14 qaparispan qayakurqa wasinpi llamkaqkunata, hinaspam paykunaman willakurqa: “Qusaypa pusamusqan chay Hebreo kasta runam abusawayta munarqa pinqaypi qipachiwananchikrayku, ichaqa tukuy kallpaywanmi qaparirqani.
15 Qaparisqayraykum pachantapas saqiruspan lluptirun”, nispa.
16 Chaymi Joseypa pachanta waqtanpi churaykuspan qusanta suyarqa.
17 Qusan chayaramuptinñataqmi hina chaynallata paymanpas willakurqa: “Pusamusqayki Hebreo runam pinqaypi qipachiwayta munarqa.
18 Ichaqa qaparisqayraykum pachantapas saqiruspan lluptirurqa”, nispa.
19 Joseypa patronninqa llumpaytam piñakurqa “serviqniki Joseymi kayta-wakta ruwawarqa” nispa warmin niptin.
20 Chaymi patronninqa Joseyta hapiruspan wichqarachirqa kamachiqpa presokunapa kasqan carcelpi. Chaynapim Joseyqa carcelpi karqa.+
21 Ichaqa Jehova Diosmi Joseyta imaña kaptinpas kuyasqanrayku hinalla yanaparqa. Chaymi carcelpi presokunata qawaq runapas Joseytaqa allinpaq qawarqa.+
22 Chaymi presokunata qawaq runaqa Joseypa makinpiña lliw presokunata saqiykurqa, hinaptinmi Joseyña lliw presokunata kamachiq imatapas ruwanankupaq.+
23 Presokunata cuidaqqa yacharqam Joseyta Jehova Dios yanapasqanta, chaymi mana iskayrayarqachu Josey allinta ruwananmantaqa. Jehova Diosmi Joseyta yanaparqa ima ruwasqanpas allin kananpaq.+
