Genesis 19:1-38
-
Iskay angelkunata Lot samachisqanmanta (1-11)
-
Aylluntin lluqsinanpaq Lotta angelkunapa nisqanmanta (12-22)
-
Sodoma hinaspa Gomorra llaqtakuna chinkachisqa kasqanmanta (23-29)
-
Lotpa warmin kachi rumi rikurirusqanmanta (26)
-
-
Lotmanta hinaspa iskay warmi churinkunamanta (30-38)
-
Moab hinaspa Ammon runakunamanta (37, 38)
-
19 Chay iskay angelkunam Sodoma llaqtaman tardeykuqtaña chayarurqaku, Lotñataqmi llaqtapa punkunpi tiyachkarqa. Chay runakunata rikuruspanmi Lotqa tariparqa, hinaspam qunqurakuykuspa pampakama kumuykurqa.+
2 Hinaspanmi Lotqa nirqa: “Taytallaykuna, wasiypiyá samakamuychik. Chakikichiktapas mayllachisaqmi. Paqarinñachiki tutapayta hatarispa pasakunkichik”, nispa. Paykunañataqmi nirqaku: “Manam, plazallapim achikyasaqku”, nispa.
3 Ichaqa Lot hikutaptinmi wasinman rirqaku. Chaymi Lotqa mikuyta yanupurqa, hinaspam mana levadurayuq tantatapas ruwapuspan quykarirqa, hinaptinmi mikurqaku.
4 Manaraq puñuchkaptinkum Sodoma llaqtapi achka runakuna hatunpas uchuypas Lotpa wasinta muyurirurqaku.
5 Hinaspam Lotta qayaykachaspanku nirqaku: “¿Maytaq chay samachisqayki runakuna? ¡Hurqumuy paykunawan kakunaykupaq!”, nispa.+
6 Chaymi Lotqa hawaman lluqsispan punkuta wichqarurqa.
7 Hinaspam nirqa: “Runamasillaykuna, amayá mana allintaqa ruwaychikchu.
8 Iskay warmi churiykunam kaypi kachkan, paykunaqa manaraq qariwan puñuqkunam. Pusarapamusqaykichikyá paykunawan munasqaykichikta ruwanaykichikpaq. Kay runakunataqa amayá imanaychikchu wasiypi samakusqankurayku”, nispa.+
9 Chay llaqtapi runakunañataqmi nirqaku: “¡Ama harkakuychu!”, nispa. Nirqakutaqmi: “Kay runaqa llaqtanchikman hamuq forasterom, ¿payraqchu ima ruwananchiktapas niwasun? Kunanqa qamtam paykunamanta astawan ruwasqaykiku”, nispa. Hinaspam chay runakunaqa Lotta tanqaspanku wasinpa punkunta kichayta munarqaku.
10 Chaymi wasi ukupi kaq runakunañataq makinkuta haywarispanku Lotta wasi ukuman aysaykuspa punkuta wichqarurqaku.
11 Hinaspam hawapi runakunatañataq hatuntapas uchuytapas ñawsayarachirqaku, hinaptinmi paykunaqa punku tariytapas mana atirqakuchu.
12 Lottam wasinpi samakuq runakuna nirqaku: “¿Kachkanraqchu kay llaqtapi aylluykikuna? ¡Qayamuyá masaykikunata, churikikunata hinaspa serviqnikikunata, hinaspayá kay llaqtamanta lluqsiychik!
13 Kaypi runakunatam llaqtantinta chinkachisaqku, kay llaqtapi runakunapa mana allin ruwaq kasqankumanta qayakuytam Jehova Dios uyarirun.+ Chaymi Jehova Diosqa kachamuwarqaku runakunata llaqtantinta chinkachinaykupaq”, nispa.
14 Hinaptinmi Lotqa lluqsirqa warmi churinkunata casaray munaq qarikunawan rimaq. Paykunatam kuti-kutirispa nirqa: “¡Utqayman kay llaqtamanta lluqsisun! ¡Kay llaqtatam runantinta Jehova Dios chinkachinqa!”, nispa. Paykunañataqmi asispalla nisqanpaq hapirqaku.+
15 Chaymantam achikyamuchkaptin angelkunaqa Lotta hikutarqaku: “¡Utqayman lluqsiy warmikiwan hinaspa iskaynin warmi churikikunapiwan, chaynapi llaqtantin runakuna wañuchisqa kaptin mana wañunaykichikpaq!”, nispa.+
16 Ichaqa Lot hinalla unaptinpas Jehova Diosqa llakipayariykurqam.+ Chaymi chay angelkunaqa Lotta, warminta hinaspa iskay warmi churinkunata aysarikuspaña llaqtamanta hurqurqaku.+
17 Hinaptinmi llaqtapa hawa lawninpi kachkaptinku huknin angel nirqa: “¡Ama qipata qawaspaykiyá utqayman kallpay* mana wañunaykipaq!+ ¡Amataqmi kay llaqtapa hichpallanpiqa qipankichu!+ ¡Urqukunapa kasqanmanyá ayqikuy mana wañuchisqa kanaykipaq!”, nispa.
18 Lotñataqmi nirqa: “¡Jehova Dioslláy, amayá chaymanqa!
19 Yachanim yanapawasqaykita hinaspa kuyawaspayki mana wañurachiwasqaykita.+ Ichaqa manam atiymanchu urqukunapa kasqanman ayqikuytaqa. Manchakunim imapas pasaruwaptin wañuruyta.+
20 Kayllapim kachkan ayqikunaypaq taksa llaqtacha. ¿Ayqikuymanchu chay llaqtachaman? Mañakullaykim chay llaqtachaman ayqikunaypaq, chaynapi mana wañurunaypaq”, nispa.
21 Angelñataqmi nirqa: “Nisqaykiman hinayá kachun,+ mañakusqaykiraykum chay llaqtachataqa mana imanasaqchu.+
22 ¡Utqayman lluqsiy! Manam imatapas ruwasaqchu chayman chayanaykikama”, nispa.+ Chayraykum chay llaqtapa sutinqa karqa Zoar*.+
23 Intiqa qispiramurqañam Zoar llaqtachaman Lot chayananpaqqa.
24 Chaymi Jehova Diosqa Sodoma hinaspa Gomorra llaqtaman azufreyuq nina parata chayachimurqa. Chaytaqa Jehova Diosmi hanaq pachamanta parachimurqa.+
25 Chaynatam chinkarachirqa chay llaqtakunata, runankunata hinaspa tukuy ima wiñaqkunatapas.+
26 Lotpa warminqa qipankutam kallparqa, hinaspam qipaman qawariykuspan kachi rumi rikurirurqa.+
27 Abrahanñataqmi tutapayta hatarispan Jehova Dioswan rimasqanku lawman rirqa.+
28 Chaymi Sodoma hinaspa Gomorra lawta qawarispan rikururqa pampamanta yanay-yanay qusni hornomanta* hinaña huqarikuchkaqta.+
29 Chay llaqtakunata chinkachispanqa Diosqa manam Abrahantaqa qunqarqachu. Chaymi chay llaqtamanta sobrinon Lotta hurqumurqa chaypi yachasqanrayku*.+
30 Punchawkuna risqanman hinam Lotqa Zoar llaqtapi yachayta manchakurqa,+ chaymi urqukunapa kasqanman ripukurqa iskaynin warmi churinkunapiwan,+ hinaspam machaypi yacharqaku.
31 Piwi kaqmi* sullka ñañanta nirqa: “Taytanchikqa machuyarunñam, kaypiqa manam pipas kanchu casarakuspa puñunanchikpaqqa.
32 Chaynaqa taytanchikmanyá vinota quykusunchik, chaynapi paywan puñuruptinchik miraynin mana chinkananpaq”, nispa.
33 Chay tutam taytankuta sinkarachirqaku, hinaptinmi piwi kaq warmi churin taytanpa kasqanman ustururqa, hinaspam paywan puñururqa. Lotqa manam musyakurqachu churinwan puñusqantaqa nitaq churinpa hatarisqantapas.
34 Paqarinnin punchawtam piwi kaqqa sullka ñañanta nirqa: “Chisi tutam taytanchikwan puñururqani. Kay tutapas kaqmantayá vinota quykusunchik qampas paywan puñunaykipaq, chaynapi taytanchikpa miraynin mana chinkananpaq”, nispa.
35 Chay tutam kaqmanta taytankuta sinkarachirqaku. Chaymi sullka kaq churin taytanwan puñururqa. Lotqa manam musyakurqachu churinwan puñusqantaqa nitaq churinpa hatarisqantapas.
36 Chaymantam Lotpa iskaynin churinkuna wiksayakururqaku.
37 Piwi kaq churinmi qari wawata wachakurqa, hinaspam suticharqa Moabwan.+ Paymantam Moab runakuna mirarqa.+
38 Sullka kaq churinpas qari wawatam wachakurqa, hinaspam suticharqa Ben-ammiwan. Paymantañataqmi Ammon runakuna mirarqa.+
Willakuykuna
^ Utaq: “Raskiy”.
^ “Zoar” ninanqa: “Uchuychalla”, ninanmi.
^ Utaq: “Imatapas kañanapaq hornomanta”.
^ Utaq: “Tiyasqanrayku”.
^ Utaq: “Punta naceqmi”.
