Genesis 23:1-20
-
Sarapa wañukusqanmanta hinaspa pampakusqanmanta (1-20)
23 Saraqa 127 watanpim wañukurqa.+
2 Saraqa wañukurqa Kiryat-arba llaqtapim,+ chay llaqtataqa riqsiqkutaqmi Hebron sutiwanpas.+ Chay llaqtaqa Canaan allpapim karqa.+ Sara wañukuptinmi Abrahanqa llumpayta waqallarqa.
3 Chaymantam Abrahanqa warminpa ayanta saqiykuspan Het runapa churinkunata nimurqa:+
4 “Ñuqaqa huklaw llaqtayuqmi kallani.+ Warmiyta pampanaypaqyá allpaykichikta rantikuykullawaychik*”, nispa.
5 Hetpa churinkunañataqmi Abrahanta nirqaku:
6 “Taytáy, qamqa Diospa akllasqan runam kanki.+ Allinnin sepulturata akllakamuspayá warmikita chaypi pamparamuy. Manam mayqanniykupas harkakusaqkuchu warmikita chaypi pampanaykitaqa”, nispa.
7 Chaymi Abrahanqa hatariykuspan Het runakunapa qayllanpi kumuykurqa,+
8 hinaspam nirqa: “Warmiy pampanayta munaspaykichikqa, Zoarpa churin Efrontayá niykapamullawaychik
9 Macpelapi machayninta rantikuwananpaq, chayqa kachkan chakranpa patanpim. Qamkunapa qayllaykichikpim hayka kasqanman hina pagapusaq.+ Chaynapi pampakunayku allpa kananpaq”, nispa.+
10 Het runakunapa chawpinpim Efronqa kachkarqa. Chaymi Efronqa paykunapa qayllanpi hinaspa llaqtaman yaykumuq runakunapa qayllanpi+ Abrahanta nirqa:
11 “Taytáy, manam machayllatachu qusqaykiqa aswanqa chakratawanmi. Kay llaqtamasiykunapa qayllanpim quyki, chaypiyá warmikita pamparamuy”, nispa.
12 Hinaptinmi Abrahanqa chay runakunapa qayllanpi kumuykurqa,
13 hinaspam llapankupa qayllanpi Efronta nirqa: “Taytáy, chakraykipa chanintam qupusqayki. Qullqitayá chaskiykullaway warmiyta chaypi pamparamunaypaq”, nispa.
14 Efronñataqmi Abrahanta nirqa:
15 “Taytalláy, kay chakraqa tawa kilo parten* qullqipa chaninmi. Ñuqanchikpaqqa, ¿mayna achkamá chayqa? Chaypiyá warmikita pamparamuy”, nispa.
16 Chaymi Abrahanqa Efronpa nisqanman hina Het runakunapa qayllanpi tawa kilo parten qullqita quykurqa, chay tiempopi rantisqankuman hina.+
17 Chaynatam Abrahanqa Mamrepa chimpan Macpelapi Efronpa allpanta rantirqa, paypañam karqa chaypi kaq machaypas hinaspa chakra ukupi kaq sachakunapas.
18 Tukuy chaytaqa Het kasta runakunapa hinaspa llaqtaman yaykumuq runakunapa qayllanpim rantirqa.
19 Chaymantam Abrahanqa warmin Sarata pamparqa Mamrepa chimpan Macpela machaypi, chayqa karqa Hebron llaqtapim. Hebronñataqmi kachkan Canaan allpapi.
20 Chaynapim Het runakunamanta rantisqan chakrawan machayqa Abrahanpaña karqa pampakunankupaq.+
