Genesis 22:1-24

  • Isaacta wañuchispa kañananpaq Abrahanta Dios nisqanmanta (1-19)

    • Abrahanpa miraynintakama bendecisqa kanankumanta (15-18)

  • Rebecapa ayllunmanta (20-24)

22  Tukuy chaykuna pasakusqan qipatam Abrahanpa kasukuq kasqanta yachananpaq Dios nirqa:+ “Abrahan”, nispa. Payñataqmi nirqa: “Kaypim kachkani”, nispa. 2  Diosñataqmi nirqa: “Sapallan kuyasqayki churiki+ Isaacta+ pusarikuspayki Moria allpaman riy.+ Hinaspam qawachisqay urqupi wañuchispayki kañapuwanki”, nispa. 3  Chaymi Abrahanqa tutapayta hatarispan asnonta karunaykurqa, hinaspapas iskay serviqninkunatam nirqa paykunata riysinanpaq. Diospaq kañananpaqmi yantatapas chitqaykuspan aparqa. Hinaspam Diospa kamachisqan lawman rirqa. 4  Kimsa punchaw risqankumantam Abrahanqa chay urquta rikururqa. 5  Hinaspam Abrahanqa serviqninkunata nirqa: “Kayllapi asnontin suyawachkaychik, churiywan rirusaqku Diosta yupaychaq, hinaspam kutimusaqku”, nispa. 6  Abrahanqa kañananpaq yantatam churin Isaacman qipiykachirqa. Payñataqmi sansatawan cuchillota aparqa, hinaspam iskayninku rirqaku. 7  Hinaptinmi Isaacqa taytanta nirqa: “Taytáy”, nispa. Abrahanñataqmi nirqa: “Niway churilláy”, nispa. Isaacñataqmi nirqa: “Ninatawan yantallatam apachkanchikqa, ¿maytaq wañuchispa kañanapaq ovejaqa?”, nispa. 8  Abrahanñataqmi nirqa: “Churilláy, kikin Diosmi quwasun kañanapaq ovejataqa”, nispa.+ Hinaspam hinalla rirqaku. 9  Diospa nisqan urquman qispiruptinkuñataqmi Abrahanqa altarta ruwarqa, hinaspam yantata hawanman churaykurqa. Chaymantam churin Isaactapas yantapa hawanman siriykachirqa makintawan chakinta wataruspan.+ 10  Hinaspam Abrahanqa cuchillota hapiykurqa churinta wañuchinanpaq.+ 11  Chayta ruwachkaptinmi Jehova Diospa angelnin hanaq pachamanta nimurqa: “¡Abrahan! ¡Abrahan!”, nispa. Abrahanñataqmi nirqa: “¡Kaypim kachkani!”, nispa. 12  Hinaptinmi angel nimurqa: “Ama wañuchiychu churikitaqa, ama imanaypaschu. Kunanqa ñam yachaniña Diosta kasukuq runa kasqaykita, sapallan churikita kañapuwanaykipaq niptiypas manam harkakurqankichu”, nispa.+ 13  Chaymantam Abrahanqa qawariykuspan rikururqa chaprapi waqranmanta arwisqa carnerota. Chaymi Abrahanqa churinta kañananmantaqa chay carnerotaña Diospaq kañapurqa. 14  Hinaspam chay urquta Abrahanqa suticharqa “Jehova Diosmi churamunqa*” nispa. Chayraykum kunankamapas ninkuraq: “Jehova Diospa urqunpim imapas kanqa”, nispa.+ 15  Jehova Diospa angelninqa hanaq pachamantam Abrahanta kaqmanta nimurqa: 16  “Jehova Diosmi sutinpi juraspan nisunki: ‘Tukuy kaykunata ruwasqaykiraykum hinaspa sapallan churikitapas kañapuwayta munasqaykiraykum+ 17  bendecisqayki, hinaspapas hanaq pachapi lucerokunata hinam chaynataq lamar quchapa patanpi aquta hinam miraynikita achkayachisaq.+ Chay miraynikikunam chiqniqnin llaqtakunata munaychakunqa.+ 18  Kamachisqayta kasukusqaykiraykum+ kay pachapi llapallan runakuna miraynikiwan bendecisqa kanqaku’”, nispa.+ 19  Chaymantam Abrahanqa saqimusqan serviqninkunapa kasqanman kutirqa, hinaspam Beer-seba llaqtaman llapanku kutirqaku.+ Hina chaypim Abrahanqa yacharqa*. 20  Chaymanta qipakunamanmi Abrahanman willarqaku: “Wawqiki Nacorpa churinkunatam warmin Milca wachakurqa.+ 21  Piwi kaqpa* sutinmi Uz, qatiqninpañataqmi Buz, hukninpañataqmi Arampa taytan Kemuel, 22  chaymantañataq Kesed, Hazo, Pildas, Jidlaf hinaspa Betuel”, nispa.+ 23  Betuelpa churinmi karqa Rebeca.+ Paykunam karqaku Nacorpawan Milcapa pusaq churi-wawankuna, Nacorqa Abrahanpa wawqinmi karqa. 24  Nacorpa huknin warminmi karqa Reuma. Paypa wawankunam karqa Teba, Gaam, Taas hinaspa Maaca.

Willakuykuna

^ Hebreo rimaypiqa nichkan: “Jehova-yire”, nispam.
^ Utaq: “Tiyarqa”.
^ Utaq: “Punta naceqpa”.