Genesis 44:1-34
44 Chaymantam Joseyqa wasinpi kamachiqta nirqa: “Kay runakunapa wayqanmanyá huntay-huntayta kawsayta hinamuy, qullqinkutapas sapakamapa wayqanman hinamuy.+
2 Sullka kaqpa wayqanpim ichaqa qullqinta hinaspaykipas, qullqimanta ruwasqa vasoytapas hinanki”, nispa. Chaymi chay runaqa Joseypa kamachisqanta kasukurqa.
3 Achikyaramuptinñataqmi Joseypa wawqinkunaqa asnonkuta pusarikuspa llaqtankuman kutirqaku.
4 Hinaptinmi manaraqpas karuta richkaptinku wasinpi kamachiq runata Josey nirqa: “¡Chay runakunata utqayman hayparuy! Hayparuspaykim ninki: ‘¿Imanasqamá allinta chaskisuchkaptikichikqa mana allintaqa ruwarunkichik?
5 ¿Manachum chay vasoqa patronniypa tomanan hinaspa ima pasakunanmantapas qawanan vaso? Chay ruwasqaykichikqa manam allinchu’”, nispa.
6 Chaynatam chay runaqa Joseypa wawqinkunata hayparuspan nirqa.
7 Hinaptinmi paykunañataq nirqaku: “¿Imanasqamá chaynataqa nin? Ñuqaykuqa manam haykapipas chaytaqa ruwaymankuchu.
8 Wayqaykupi qullqi tarisqaykutapas Canaan lawmantaraqmi kutichimurqaniku,+ ¿chaychu patronnikipa wasinmanta qurinta utaq qullqinta suwakamuymanku karqa?
9 Taytáy, sichu maskasqaykita hukkaqniykupapi tariruptikiqa chay runayá wañuchun, wakiqniykuñataq serviqninkuna kasaqku”, nispa.
10 Chay runañataqmi nirqa: “Nisqaykichikman hinam kanqa. Ichaqa pipapipas maskasqayta tariruptiyqa payllam huchayuqqa* kanqa, wakiqnikichikqa mana huchayuqmi kankichik”, nispa.
11 Chaymi wayqankuta chaylla asnonkumanta pampaman uraykachispa sapakama kicharqaku.
12 Hinaptinmi piwi kaqpa* wayqanmanta maskayta qallaykuspan sullka kaqpa wayqanpi tukurqa. Chaymi maskasqan vasotaqa sullkanku Benjaminpa wayqanpi tarirurqa.+
13 Chaymi paykunaqa pachankuta llikikurqaku, hinaspam wayqankuta asnonkuman kaqmanta churkuykuspanku Egipto llaqtaman kutirqaku.
14 Joseypa wasinman wawqinkunapiwan Juda+ chayaruptinmi, hina wasillanpiraq Joseyqa kachkasqa. Chaymi ñawpaqninpi qunqurakuykuspa kumuykurqaku.+
15 Hinaptinmi Joseyqa paykunata nirqa: “¿Imatataq kayta ruwarunkichik? ¿Manachu yacharqankichik imapas pasakunanmanta allin qawaq kasqayta?”, nispa.+
16 Chaymi Judaqa nirqa: “¿Ima nikikumantaq taytáy? ¿Imaynatataq mana huchayuq kasqaykuta nikikuman? Ñawpaqta mana allin ruwasqaykumantachiki Dios ñakarichiwachkanku.+ ¡Kunanqa llapaykum vaso apamuqwan kuska serviqniki kasaqku!”, nispa.
17 Joseymi ichaqa nirqa: “¡Manam haykapipas chaynataqa ruwaymanchu! Vasoy apamuqllam serviqniyqa kanqa.+ Wakiqnikichikqa taytaykichikman hawkalla kutikuychik”, nispa.
18 Chaymi Judaqa Joseyman asuykuspan nirqa: “Taytalláy, ama hina kaspayá uyariykullaway, amayá piñakullaychu. Qamqa kanki kay nacionta kamachiq* hinam.+
19 Qanmi tapuwarqankiku: ‘¿Kawsakunraqchu taytaykichik? ¿Kanraqchu huk wawqikichikpas?’, nispa.
20 Chaymi nirqaykiku: ‘Arí, taytaykuqa kawsakunraqmi, ichaqa yuyaqñam. Huk wawqiykupas kantaqmi, payqa llapaykumanta sullkam.+ Payqa taytaykupa yuyaq kayninpiña churinmi, payllañam kawsachkan,+ mamanmanta kaq wawqinqa wañukunñam.+ Chay sullkaykuqa taytaykupa llumpay kuyasqanmi’, nispa.
21 Hinaptinmi niwarqankiku: ‘Chay sullkaykichikta pusamuwaychik riqsiykunaypaq’, nispa.+
22 Chaymi taytáy, ñuqaykuñataq willarqaykiku: ‘Sullkaykuqa manam taytaykutaqa saqinmanchu. Paymanta rakikuruptinqa taytaykuqa wañurunmanmi’, nispa.+
23 Ichaqa qanmi niwarqankiku: ‘Sullka wawqikichikta mana pusamuspaykichikqa amam kutimuwankichikchu’, nispa.+
24 Chaymi taytaykuman kutispayku willarqaniku imam niwasqaykikuta.
25 Chaymantam taytayku niwarqaku: ‘Kutispaykichikyá kaqmanta kawsaykunata rantimuychik’, nispa.+
26 Hinaptinmi taytaykuta nirqaniku: ‘Manam chay runamanqa kutiymankuchu ñuqaykuwan sullkayku mana riptinqa. Risaqkuqa sullkayku ñuqaykuwan riptillanmi’, nispa.+
27 Chaymi taytayku niwarqaku: ‘Yachasqaykichikpi hinam warmiy Raquelqa iskay wawayuqlla karqa.+
28 Huknin churiy manaña kutiykamuptinmi nirqani: “¡Purun animalchiki mikurun!”, nispa.+ Chaymantapacham manaña ñuqawanñachu.
29 Kay sullka wawqikichikta pusasqaykichikpi imapas pasaruptinqa llakikuymantam kay yuyaq taytaykichikqa wañurusaq*’, nispa.+
30 Taytaykuqa kay sullkaykutaqa anchatam kuyan. Sullkaykuta taytaykuman mana kutichiptiykuqa
31 taytaykum wañurunqa mana kutisqanta qawaykuspan. Yuyaq taytaykuqa llakikuymantachá wañurunqa*.
32 Taytáy, sullkayta cuidanaypaqmi taytayta nirqani: ‘Mana kutichimuptiyqa ñuqachiki huchayuq kasaq wañunaykama’, nispa.+
33 Chaynaqa taytáy, ñuqayá serviqniki kanaypaq qipasaq, amayá sullkayqa. Paytaqa saqiykuyá wawqiykunawan kutinanpaq.
34 ¿Imaynamá taytaymanqa kutiyman mana sullkaywanqa? ¡Manam munaymanchu taytayku llakipi kanantaqa!”, nispa.
Willakuykuna
^ Utaq: “Serviqniyqa”.
^ Utaq: “Punta naceqpa”.
^ Utaq: “Faraon”.
^ Hebreo rimaypiqa nichkan: “Seolman rinqa”, nispam.
