Genesis 45:1-28
45 Chayna nisqanta uyariruspanmi Joseyqa waqanayarqaña,+ chaymi runankunata nirqa: “¡Kaymanta llapallaykichik lluqsiychik!”, nispa. Wawqinkunallawanña qiparuspanmi Joseyqa paykunaman chayraq riqsichikurqa.+
2 Hinaspanmi qaparispan waqayta qallaykurqa, hinaptinmi chay waqasqanta hawapi kaqkunapas uyarirurqaku. Chaytaqa Egiptota kamachiqpa* wasinpi kaqkunapas yacharurqam.
3 Joseyqa wawqinkunatam nirqa: “Ñuqaqa Joseymi kani. ¿Kawsachkanraqchu taytanchik?”, nispa. Wawqinkunañataqmi mana ima niytapas atirqakuchu mancharisqallaña kasqankurayku.
4 Hinaptinmi wawqinkunata Josey nirqa: “Asuykamullawaychik”, nispa. Chaymi paykunaqa asuykurqaku.
Chaymantam payqa nirqa: “Ñuqaqa kani Egipto nacionman rantikamuwasqaykichik* wawqikichik Joseymi.+
5 Amayá ñakakuychikchu nitaq tumpanakuychikchu rantikamuwasqaykichikmantaqa. Diosmi kaymanqa puntachimuwarqa, chaynapi hinalla kawsananchikpaq.+
6 Kay watawanqa iskay watañam kay llaqtapiqa muchuy* kachkan,+ chaywanpas pichqa watatawanraq muchuy kasqanraykum pipas mana tarpunqachu nitaq cosechanqachu.
7 Diosmi kaymanqa puntachimuwarqa yarqaymanta mana wañunaykichikpaq, chaynapi ayllunchikwan kuska kay llaqtapi kawsananchikpaq.+
8 Chaynaqa manam qamkunachu kaymanqa kachamuwarqankichik. Diosmi kachamuwarqa Egiptota kamachiqpa allin yanapaqnin* kanaypaq hinaspa wasinpi kamachikuq kanaypaq chaynataq Egipto nacionta kamachinaypaqpas.+
9 Chaynaqa taytanchikman chaylla kutispayá nimuychik: ‘Churiki Joseymi nin: “Diosmi Egiptota nacionta kamachinaypaq churaruwan,+ ñuqapa kasqaymanyá utqayman hamuy.+
10 Hichpallaypim Gosen allpapi yachanki*+ churikikunawan hinaspa willkaykikunawan kuska. Chaypim animalnikikunapas hinaspa tukuy imaykikunapas kanqa.
11 Imapas mikunaykimantaqa ama llakikuychu ñuqam qusqayki, pichqa wataraqmi muchuyqa kanqa.+ Mana hampuspaykiqa wasikipi kaqkunapiwanmi ñakarinki”’, nispa.
12 Ñuqapuni chayna nisqaytaqa qamkunapas hinaspa Benjaminpas uyariwachkankichikmi.+
13 Taytanchikmanmi willanaykichik Egiptopi ancha riqsisqa runa kasqaymanta chaynataq tukuy qawasqaykichikmantapas. Utqayman kutispaykichikyá taytanchikta kayman pusamuychik”, nispa.
14 Chaymantam wawqin Benjaminta abrazaykuspa waqayta qallaykurqa, hinaptinmi Benjaminpas abrazaykuspan waqarqa.+
15 Chaymantam Joseyqa llapallan wawqinkunatapas abrazaykuspan waqarqa. Chayraqmi wawqinkunaqa paywan rimarqaku.
16 Egiptota kamachiqpa wasinpi kaqkunamanpas willaykurqakum: “Joseypa wawqinkunam hamurunku”, nispa. Chaymi Egiptota kamachiqqa hinaspa serviqninkunaqa anchata kusikurqaku.
17 Hinaptinmi Egiptota kamachiqqa Joseyta nirqa: “Wawqikikunatayá nimuy: ‘Asnoykichikman kawsayta churkuykuspayá kutiychik Canaan allpaman,
18 hinaspayá taytaykichikta chaynataq aylluykichikta kayman pusamuychik. Egiptopi allinnin kaqkunatam qusqaykichik, mikunkichikpas kay allpapi allinnin kawsaykunatam’, nispa.+
19 Chaymantapas ninkitaqmi:+ ‘Apaychikyá carretakunatapas+ warmikichikta, warmaykichikta hinaspa taytaykichikta apamunaykichikpaq.+
20 Amayá imaykichikmantapas llakikuychikchu,+ Egiptopi allinnin kaqkunam qamkunapaq kanqa’”, nispa.
21 Chayna nisqanman hinam Israelpa churinkunaqa ruwarqaku. Egiptota kamachiqpa nisqanman hinam Joseyqa wawqinkunaman carretakunata qurqa. Qurqataqmi ñanpi mikunankupaq quqawtapas.
22 Qurqataqmi sapakamaman musuq pachatapas, Benjaminmanñataqmi qurqa 300 qullqita* hinaspa pichqa musuq pachakunata.+
23 Taytanmanpas apachirqam chunka urqu asnokunapi Egiptopi allinnin kaqkunata, chunka china asnokunapiñataqmi apachirqa tantatawan kawsaykunata hamustin ñanpi taytan mikunanpaq.
24 Chaynatam Joseyqa wawqinkunata aviarqa, nirqataqmi: “Amamá ñanpiqa piñanakunkichikchu”, nispa.+
25 Chaymantam wawqinkunaqa Egipto allpamanta kutispanku Canaan allpapi yachaq taytanku Jacobman chayarqaku.
26 Hinaspam willarqaku: “¡Papáy, Joseyqa kawsachkasqam! ¡Egiptota kamachiqmi kasqa!”, nispa.+ Taytanku Jacobñataqmi mana imatapas nirqachu llullapaq hapisqanrayku.+
27 Ichaqa Joseypa nisqanta astawan willaptinku hinaspa apanankupaq Joseypa apachisqan carretakunata qawachiptinkum Jacobpa sunqunqa chayraq tiyaykullarqa.
28 Chaymi nirqa: “¡Amaña willawaychikchu! Chaynaqa, ¡churiy Joseyqa kawsakuchkanchiki! ¡Manaraq wañukuchkaspayá qawaykamusaq!”, nispa.+
Willakuykuna
^ Utaq: “Faraonpa”.
^ Utaq: “Vendemuwasqaykichik”.
^ Utaq: “Yarqay”.
^ Utaq: “Taytan hina”.
^ Utaq: “Tiyanki”.
^ Utaq: “Rumichakuna hina qullqita”.
