Genesis 49:1-33

  • Churinkunapa imayna kananmanta wañukunallanpaqña kachkaspan Jacobpa rimarisqan (1-28)

    • Judapa mirayninmanta kamachiq rikurinanmanta (10)

  • Jacob wañukuptin maypi pampanankumanta (29-32)

  • Jacob wañukusqanmanta (33)

49  Jacobmi churinkunata qayachispan nirqa: “Llapaykichik asuykamuwaychik, qipa punchawkunapi imapas kananmantam nisqaykichik.  Churillaykuna, allintayá kay taytaykichik Jacobta uyariykuwaychik”, nispa.  Hinaspanmi churin Rubenta+ nirqa: “Qamqa piwi*+ churiymi kanki. Kallpaypiraq kachkaptiy punta kaq churiymi kanki. Qamqa karqanki allin riqsisqa hinaspa atiyniyuqmi.  Ichaqa mana harkay atina lluqlla hina kasqaykiraykum warmiywan puñururqanki, chaymi manaña ancha riqsisqañachu kanki. Warmiywan puñurusqaykiraykum pinqaypi qiparqani.+ Llumpay mana allinmi chay ruwasqaykiqa karqa”, nispa.  Simeonmantawan Leviymantañataqmi nirqa: “Paykunaqa kanku huk mamallamantam.+ Paykunaqa maqakuq runakunam kanku, espadankuwan wañuchiqkunam kanku.+  Manam paykunawan kaytaqa munaymanchu. Sunquypas amayá munachunchu paykunawan hukllawakunaytaqa. Paykunaqa piñakuyninkupim runakunata wañurachirqaku,+ torokunapa ankuntapas yanqapas-yanqam kuchurqaku.  Piñakuq kasqankuqa ñakasqayá kachun, mana llakipayarikuq kasqankuraykum llumpay mana allinta ruwarqaku.+ Israel nacionpipas mirayninkutam chiqichisaq”, nispa.+  Judatañataqmi+ nirqa: “Wawqikikunam hatunchasunki.+ Chiqnisuqnikikunatam kunkanmanta hapinki.+ Wawqikikunam ñawpaqnikipi kumuykunqaku.+  Qamqa kanki uña leon hinam.+ Mikusqanmanta kutiramuspa waqtapaq leon hinam kanki. ¿Pitaqsi puñukuq leonta rikcharichinman?”, nispa. 10  Taytanqa nirqataqmi: “Judapa mirayninpa tawnanqa una-unaypaqmi kanqa,+ kamachinanpaq tawnanqa tukuy tiempom paywan kanqa akllasqa kaq chayamunankama*.+ Paytam lliw llaqtakuna kasunqa.+ 11  Payqa uvas plantamanmi asnonta watanqa, asnonpa uñantapas allin ruruq uvas plantamanmi watanqa. Vinowanmi pachantapas taqsanqa, uvaspa yakunwantaqmi capantapas taqsanqa. 12  Ñawinkunapas pukaniraqmi vino upyasqanrayku, kirunkunapas yuraqmi leche upusqanrayku”, nispa. 13  Zabulonmantañataqmi+ nirqa: “Zabulonqa botekunapa kasqan lamar quchapa patanpim yachanqa*.+ Linderonpas Sidon lawkamam chayanqa”, nispa.+ 14  Isacarmantañataqmi+ nirqa: “Isacarqa kallpasapa asno hinam, alforjan qipirisqa waqtapaq asno hinam. 15  Allinnin kaq allpapim hawka kawsakunqa. Hombronta kurkuykachispam qipikunata qipinqa, sasa llamkaykunapim llamkanqa”, nispa. 16  Danmantañataqmi+ nirqa: “Danqa Israelpi huknin ayllu kasqanraykum llaqtapa jueznin kanqa.+ 17  Danqa kanqa ñanpa patanpi culebra hinam, payqa kanqa caballokunata kachuspan sillakuqninta wasanpata saqtachiq waqrachayuq culebra hinam.+ 18  Jehova Dioslláy, qamllapim hapipakullani yanapaykuwanaykikupaq”, nispa. 19  Gadmantañataqmi+ nirqa: “Gadtam suwakuna suwanqa, chaywanpas payqa suwakunatam qatikacharunqa”, nispa.+ 20  Asermantañataqmi+ nirqa: “Aserpaqa achkam kanqa mikuyninqa, payqa kamachiqman qunanku mikuyta hinam miskillaña mikuykunata qukuykuq kanqa”, nispa.+ 21  Neftaliymantañataqmi+ nirqa: “Neftaliyqa malta luwichu hinam, sumaq rimaykunam siminmantapas lluqsimun”, nispa.+ 22  Joseymantañataqmi+ nirqa: “Joseyqa ruruq sachapa ikllipan* hinam, payqa pukyupa patanpi ruruq sacha hinam, pirqapa hawanta kallmankuna mastariq sacha hinam. 23  Paytaqa flechawan peleaqkunam kamirqaku, flecharqaku hinaspa hinalla chiqnirqaku.+ 24  Chaywanpas Joseyqa flechantam allinta takyachirqa,+ makinkunaqa manam katkatatarqachu.+ Chayqa karqa Jacobpa michiqnin atiyniyuq Dios yanapasqanraykum, payqa Israelpa rumin hinam. 25  Joseyqa yupaychasqay Diospa quwasqanmi, Diosmi bendecinqa. Joseyqa tukuy atiyniyuq Dioswanmi kachkan. Churilláy Josey, Diosmi qampaq parachipamusunki, allpa ukumantapas yakutam tuqyachipamusunki.+ Dios bendecisusqaykiraykum animalnikikunapas achkanpi kanqa, churikikunapas achkallañam kanqa. 26  Ñuqa taytaykipa nisqaykunaqa wiñaypaq urqukunamantapas hinaspa sumaq muqukunamantapas aswan allinraqmi kanqa.+ Chay nisqaykunaqa qampaqmi kanqa, qamqa wawqikikunamanta akllasqam karqanki”, nispa.+ 27  Benjaminmantañataqmi+ nirqa: “Bejaminqa chiqniqnin runakunatam atuq hina tisapanqa,+ achikyaqtam hapimusqanta mikunqa, tardeykuqtañataqmi qichumusqanta rakinakunqa”, nispa.+ 28  Chaynatam imayna kasqankuman hina taytanqa sapakama churinkunata bendecispan nirqa.+ Paykunamantam karqa Israelpi 12 ayllukuna. 29  Chaymantapas Jacobqa churinkunatam nirqa: “Ñam wañukusaqña.+ Wañukuptiyqa ñawpaq abueloykunapa pampakusqanpim pampamuwankichik, pampamuwankichikqa Het kasta Efronpa chakranpi kaq machaypim.+ 30  Chay machayqa kachkan Canaan allpapi kaq Mamrepa chimpan Macpela chakrapim. Chay chakratam Abrahanqa rantirqa Het kasta Efronmanta, chaypi kikinpas chaynataq ayllunkunapas pampakunanpaq. 31  Chaypim Abrahanpas hinaspa warmin Sarapas+ pampakurqa, chaypitaqmi pampakurqa taytay Isaacwan+ mamay Rebecapas. Hina chaypim warmiy Leatapas pampamurqani. 32  Chay chakrawan chay machayqa Het runakunamanta rantisqam karqa”, nispa.+ 33  Chaynata ruwanankupaq churinkunata niruspanmi Jacobqa camanpi siriykuspan wañukurqa.+

Willakuykuna

Utaq: “Punta naceq”.
Utaq: “Silo chayamunankama”.
Utaq: “Tiyanqa”.
Utaq: “Chikllipan”.