Genesis 46:1-34
46 Chaymantam Israelqa wasinpi lliw kaqkunawan tukuy imantin ripukurqa. Hinaspam Beer-seba+ llaqtaman chayaruspan taytan Isaacpa Diosninpaq animalkunata nakapuspa kañapurqa.+
2 Chaymi chay tuta Israelta musquypi hina* Dios nirqa: “¡Jacob! ¡Jacob!”, nispa. Payñataqmi nirqa: “Niykuway taytalláy”, nispa.
3 Diosñataqmi nirqa: “Ñuqaqa yupaychasqayki chiqap Diosmi kani, ñuqaqa taytaykipa Diosninmi kani.+ Egipto nacionman riytaqa ama manchakuychu, chaypim miraynikita achkallay-achkaman mirachisaq.+
4 Egiptoman riptikim qanwan kasaq, kikiytaqmi kutichimusqaykipas.+ Wañukusqayki punchawpas Joseymi qanwan kanqa”, nispa.+
5 Chaymantam Jacobqa Beer-seba llaqtamanta lluqsispan Egiptoman rirqa. Paytaqa* carretapim churinkuna aparqaku, carretapitaqmi aparqaku kikinkupa churinkuta hinaspa warminkutapas. Chay carretakunaqa karqa Egiptota kamachiqpa* apachisqanmi.
6 Aparqakutaqmi Canaan lawpi armakusqanku kapuqninkutapas, qatirqakutaqmi lliw animalninkutapas. Chaynatam Jacobqa lliw mirayninkunawan Egiptoman ripukurqa.
7 Pusarqam lliw churinkunata hinaspa willkankunata. Egiptomanmi Jacobqa lliw mirayninkunata pusarqa.
8 Egiptoman riq Israelpa utaq Jacobpa mirayninmi kaykuna:+ Jacobpa piwi* churinmi karqa Ruben.+
9 Rubenpa churinkunam karqa: Hanok, Palu, Hezron hinaspa Carmi.+
10 Simeonpa+ churinkunam karqa: Jemuel, Jamin, Ohad, Jakin, Zoar hinaspa Saul.+ Saulqa karqa Canaan lawmanta warmipa wawanmi.
11 Leviypa+ churinkunam karqa: Guerson, Koat hinaspa Merari.+
12 Judapa+ churinkunam karqa: Er, Onan, Sela,+ Perez+ hinaspa Zera.+ Erwan Onanqa Canaan+ allpapim wañukurqaku.
Perezpa churinkunañataqmi karqa Hezron hinaspa Hamul.+
13 Isacarpa churinkunam karqa: Tola, Puva, Yob hinaspa Simron.+
14 Zabulonpa+ churinkunam karqa: Sered, Elon hinaspa Jaleel.+
15 Paykunam karqa Leapi Jacobpa mirayninkuna. Paykunawan Dinam+ Padan-aram lawpi nacerqaku. Jacobpa llapan mirayninkunam karqa 33.
16 Gadpa+ churinkunam karqa: Zifion, Hagui, Suni, Ezbon, Eri, Arod hinaspa Areli.+
17 Aserpa+ churinkunam karqa: Imnaa, Isva, Isvi hinaspa Berias. Paykunapa paninmi karqa Sera.
Beriaspa churinkunañataqmi karqa Heber hinaspa Malkiel.+
18 Paykunam Zilpapa+ mirayninkuna. Zilpatam Leaman taytan Laban qurqa serviqnin kananpaq. Zilpapim Jacobpa mirayninkuna karqa 16.
19 Jacobpa warmin Raquelpa wawankunam karqa Josey+ hinaspa Benjamin.+
20 Egiptopi naceq Joseypa churinkunam karqa Manases+ hinaspa Efrain.+ Paykunaqa karqaku Potiferapa churin Asenatpa+ wawankunam, Potiferaqa karqa On lawpi sacerdotem.
21 Benjaminpa+ churinkunam karqa: Bela, Beker, Asbel, Guera,+ Naaman, Ehi, Ros, Mupim, Hupim+ hinaspa Ardi.+
22 Paykunam Raquelpi Jacobpa mirayninkuna karqa. Llapankum karqa 14.
23 Danpa+ churinmi karqa Husim.+
24 Neftaliypa+ churinkunam karqa: Jazeel, Guni, Jezer hinaspa Silem.+
25 Paykunam Bilapa mirayninkuna karqa. Bilatam Raquelman taytan Laban qurqa serviqnin kananpaq. Bilapim Jacobpa mirayninkuna karqa qanchis.
26 Egipto nacionman Jacobwan kuska riq mirayninkunam karqa 66 runakuna, Jacobpa llumchuyninkunaqa manam yupasqachu karqa.+
27 Egiptopim Joseypa iskay churinkuna nacerqa. Egipto nacionman riq Jacobpa llapallan mirayninkunam karqa 70.+
28 Chaymantam Jacobqa churin Judata ñawpachirqa+ Gosen allpapa hichpallanpiña kasqanta Joseyman willachimunanpaq. Gosen allpamanña taytan chayaramusqanta yacharuspanmi,+
29 Joseyqa carretanman qispiykuspa Gosen allpaman rirqa taytanwan tupaykuq. Tupaykuspanñataqmi taytanta abrazakuykuspa unayta waqarqa.
30 Hinaptinmi Joseyta taytan Israel nirqa: “Kayqaya kawsachkaqtaraq rikuykuyki, kunanqa hawkañam wañukullasaq”, nispa.
31 Chaymantam Joseyqa wawqinkunata hinaspa taytanpa wasinmanta kaqkunata nirqa: “Egiptota kamachiqman rispayá willamusaq:+ ‘Wawqiykunawan taytaypa wasinpi lliw kaqkunam Canaan lawmanta chayaramunku.+
32 Paykunaqa animal michiqkunam kanku.+ Chaymi ovejantin, vacantin hinaspa tukuy imantin hampukamurqaku’, nispa.+
33 Sichu Egiptota kamachiq tapusunkichik: ‘¿Ima ruwaytataq yachankichik?’, nispa. Hinaptinqa ninkichikmi:
34 ‘Taytáy, ñuqaykuqa ñawpaq abueloyku hinam+ taksaykumantapacha michiqkuna kaniku’, nispa. Chaynata niptikichikqa Gosen allpapi yachanaykichikpaqmi* nisunkichik,+ Egipto llaqtayuq runakunaqariki millakunkum oveja michiq runakunataqa”, nispa.+
Willakuykuna
^ Utaq: “Revelacionpi”.
^ Utaq: “Israeltaqa”.
^ Utaq: “Faraonpa”.
^ Utaq: “Punta naceq”.
^ Utaq: “Tiyanaykichikpaqmi”.
