Genesis 33:1-20
33 Hinaptinmi Jacobqa qawarispan rikururqa Esauta 400 runankunawan hamuchkaqta.+ Chaymi Leaman hinaspa Raquelman wawankuta sapakamaman quykurqa, quykurqataqmi Zilpamanwan Bilamanpas.+
2 Hinaspam ñawpaqman churarqa Zilpata wawantinta, Bilata wawantinta,+ paykunapa qipanmanñataqmi churarqa Leata wawantinta,+ Leapa qipanmanñataqmi churarqa Raquelta hinaspa wawan Joseyta.+
3 Hinaspam Jacobqa puntaruspan wawqinman asuykurqa qanchis kutikama qunqurakuspa pampaman kumuykustin.
4 Esauñataqmi kallpaylla* asuykuspan abrazaykuspa muchaykurqa, hinaspam wawqinwan kuska waqarqa.
5 Chaymantam Esauqa qawarispan rikururqa warmikunatawan warmakunata, hinaspam nirqa: “¿Pikunataq kay qanwan hamuqkunaqa?”, nispa. Jacobñataqmi nirqa: “Paykunaqa Diospa quwasqan churiykunam”, nispa.+
6 Chaymantam Zilpawan Bilaqa wawankunapiwan qunqurakuykuspa kumuykurqaku.
7 Leapas chaynatam wawankunapiwan ruwarqa. Joseywan Raquelpas asuykuspam qunqurakuykuspa kumuykurqaku.+
8 Hinaptinmi Esauqa Jacobta nirqa: “¿Imapaqtaq tupamusqay runakunatawan animalkunataqa ñawpachimurqanki?”, nispa.+ Jacobñataqmi nirqa: “Taytáy, llakipayawanaykita munaspaymi”, nispa.+
9 Chaymi Esauqa nirqa: “Wawqilláy, ñuqapaqa achkam kapuqniykunaqa kachkan.+ Ama quwayñachu”, nispa.
10 Jacobñataqmi nirqa: “Ama hina kaspayá kay qusqaykunata chaskiykullaway, qanwan tupaykuyta munaspaymi qatichimurqani. Diospa uyantapas qawachkayman hinam rikuykuyki kuyakuywan chaskiykuwasqaykirayku.+
11 Kay qusqaykunatayá chaskiykullaway,+ tukuy kaykunaqa Diospa quwasqanmi”, nispa.+ Chaymi hinalla hikutaptin Esauqa chaskiykurqa.
12 Chaymantam Esauqa nirqa: “Hakuchik, ñuqam pusasqayki”, nispa.
13 Jacobñataqmi nirqa: “Taytáy, qawasqaykiman hinam churiykunaqa warmallaraq.+ Qawasqaykiman hinam ovejaykunawan vacaykunaqa uñayuqkama kachkan. Huk punchawllapi utqayman qatiruptinchikqa llapallanchá wañurunqa.
14 Taytáy, qamyá puntachkay, ñuqaqa allimantam qipata hamusaq warmaykunawan hinaspa animalniykunawan. Seir lawpiñayá tupasunchik”, nispa.+
15 Chaymi Esauqa nirqa: “Chaynaqa wakin runaykunatayá saqiykusqayki”, nispa. Hinaptinmi Jacobqa nirqa: “Amaña taytáy chaytaqa ruwaychu, ñam qampa llakipayasqaykiña kachkaniku”, nispa.
16 Chaymi Esauqa chay punchawlla Seir lawman kutikurqa.
17 Jacobñataqmi Sucot lawman rirqa.+ Chaypim wasinta ruwarqa, animalninkuna puñunanpaqpas ramadakunatam ruwarqa. Chayraykum chay sitiota suticharqa Sucotwan*.
18 Chaynatam Jacobqa lluqsimusqan Padan-aranmanta+ allinlla chayarurqa Canaan allpapi+ Sichem* llaqtaman.+ Chay llaqtapa hichpanpim carpankunata sayachirqa.
19 Chay carpankuna sayachisqan allpatam rantirqa 100 qullqiwan*. Rantirqaqa Sichempa taytan Hamorpa churinkunamantam.+
20 Chaypim altarta ruwaruspan suticharqa “Diosqa Israelpa Diosninmi” nispa.+
