Genesis 38:1-30
-
Judamanta hinaspa Tamarmanta (1-30)
38 Chaymantam Judaqa wawqinkunata saqispan ripukurqa. Payqa ripukurqa Adulam llaqtayuq Hira sutiyuq runapa yachasqanpa* hichpanmanmi, hinaspam chaypi carpanta sayachirqa.
2 Chaypim Judaqa casarakururqa Canaan lawmanta Chua* sutiyuq runapa churinwan.+ Warminwan Juda puñuruptinmi
3 wiksayakuruspan qari wawata wachakurqa, hinaptinmi Judaqa churinta suticharqa Erwan.+
4 Warminqa huktawan wiksayakuruspanmi qari wawata wachakurqa, paytam suticharqa Onanwan.
5 Kaqmanta wiksayakuruspanmi huktawan qari wawata wachakurqa, hinaspam suticharqa Selawan. Chay wawanta wachakuptinqa Judaqa Akzib llaqtapim kachkarqa.+
6 Chaymantam watakuna risqanman hina Judaqa piwi* churin Erta casarachirqa Tamar sutiyuq warmiwan.+
7 Jehova Diospaqñataqmi Judapa piwi churin Erpa imayna kasqanqa mana allin karqa. Chaymi Jehova Diosqa wañurachirqa.
8 Hinaptinmi Judaqa churin Onantaña nirqa: “Wañukuq wawqikipa warminwanyá casarakuy, chaynapi churiki kaptin wawqikipa miraynin kananpaq”, nispa.+
9 Onanqa yacharqam churin karuptinqa wawqinpa miraynin kananta.+ Chaymi wañukuq wawqinpa warminwan puñuspanqa qari kayninmanta lluqsiqta pampaman sutuchiq, chaynapi wañukuq wawqinpa miraynin mana kananpaq.+
10 Chay ruwasqanqa Jehova Diospaqmi mana allin karqa. Chayraykum paytapas wañurachirqa.+
11 Hinaptinmi Judaqa llumchuynin Tamarta nirqa: “Taytaykipa wasinpiyá mana piwanpas yapakuspa yachamuchkay churiy Sela hatunyanankama”, nispa. Chaynataqa nirqa: “Selapas wawqinkuna hinach wañurunqa”, nispanmi.+ Chaynapim Tamarqa taytanpa wasinman pasakurqa, hinaspanmi chaypi yacharqa.
12 Watakunapa risqanman hinam Judapa warmin wañukurqa, payqa karqa Chua* sutiyuq runapa churinmi.+ Chaymi Judaqa achka punchaw llakisqa kasqanmanta puriqmasin Hirawan rirqaku Timnatman,+ chaypim ovejankunata rutuqkuna kachkarqa. Hiraqa Adulam llaqtayuqmi karqa.+
13 Chaymi Tamarman willaykurqaku: “Suedroykim Timnatman richkan ovejankunapa millwanta rutuchiq”, nispa.
14 Hinaptinmi Tamarqa viuda pachanta chustukuspan huk pachawan churakururqa, umantawan uyantañataqmi tapakuykurqa. Hinaspam Enaim llaqtaman yaykunapi tiyaykurqa Timnatman rina ñanpa patanpi. Chaytaqa ruwarqa cuñadon Sela hatunña kachkaptinpas suedron paywan mana casarachisqanraykum.+
15 Chayna uyan tapasqata rikuruspanmi Judaqa chuchumika* kasqanpaq hapirqa.
16 Chaymi Judaqa llumchuynin Tamar kasqanta mana yachasqanrayku nirqa: “Qanwan puñuytam munani”, nispa.+ Chaymi Tamarqa nirqa: “¿Imatataq quwanki qanwan puñuptiyqa?”, nispa.
17 Judañataqmi nirqa: “Malta cabrachatam apachimusqayki”, nispa. Tamarñataqmi nirqa: “Imallatapas saqiwayá chayta apachimuwanaykikama”, nispa.
18 Judañataqmi nirqa: “¿Imay saqinaytataq munawaq?”, nispa. Tamarñataqmi nirqa: “Sello churanayki watuyuq anilloykita+ hinaspa tawnaykitayá saqiykuway”, nispa. Chayta quykuspanmi Tamarwan puñurqa, hinaptinmi Tamarqa wiksayakururqa.
19 Tamarqa chaymanta pasakuspanmi uyan tapakusqanta hurqukuykuspa viuda pachanwan kaqmanta churakurqa.
20 Chaymantam Judaqa Adulam llaqtayuq amistadninwan malta cabrachata pusachirqa,+ chaynapi chay warmiman saqisqanta mañapamunanpaq. Ichaqa manam tarimurqachu.
21 Chaymi Enaim llaqtapi kaq runakunata tapukurqa: “¿Maypitaq kachkan ñanpa patanpi tiyaq chuchumika warmi?”, nispa. Paykunañataqmi nirqaku: “Kaypiqa manam chuchumika warmiqa kanchu”, nispa.
22 Hinaptinmi Judapa puriqmasinqa kutispan nirqa: “Manam tarimunichu, tapukuptiypas runakunam niwanku: ‘Kaypiqa manam chuchumika warmiqa kanchu’”, nispa.
23 Chaymi Judaqa nirqa: “Chaynaqa saqisqaywanyá qipakuchun, hinalla maskaptinchikqa runakunam asikuwanchikman. Ñuqaqa ñam malta cabrachataqa apachirqaykiña, ichaqa manamiki tarimurqankichu”, nispa.
24 Kimsa killa pasaytañataqmi Judaman willarqaku: “Llumchuyniki Tamarmi huchapakuruspan wiksayuqña kachkan”, nispa. Hinaptinmi Judaqa nirqa: “Llaqtamanta hurquspayá wañuchispa kañaramuychik”, nispa.+
25 Chaymi pusachkaptinku Tamarqa suedronman willachimurqa: “Kaykuna quwaqniy runapatam wiksayakuruni, riqsiykuyá pipataq kay watuyuq sellana anillo hinaspa kay tawna”, nispa.+
26 Chaykunata qawaykuspanmi Judaqa nirqa: “Ñuqamantaqa aswan allin ruwaqmi Tamarqa, churiy Selawan mana casarachisqayraykum chaytaqa ruwarqa”, nispa.+ Chaymanta qipamanqa manañam llumchuyninwanqa puñurqachu.
27 Chaymantañataqmi Tamarpa wachakunan punchaw chayaramurqa, hinaptinmi iskayta wachakurqa.
28 Wachakuchkaptinmi huknin wawa makichanta hurquramurqa, hinaptinmi wachakunanpaq yanapaqnin warmi puka qaytuwan makichanta wataruspan nirqa: “Kaymi puntata nacemuqqa”, nispa.
29 Ichaqa makichanta kutiykarachiptinmi huknin wawaraq naceramurqa, hinaptinmi wachakunanpaq yanapaqnin warmiqa nirqa: “¿Imaynatataq kichamurqanki lluqsimunaykipaq?”, nispa. Chaymi chay wawata suticharqa Perezwan*.+
30 Chaymantañam makichanpi puka qaytuwan watasqa wawaqa nacemurqa. Paytam suticharqaku Zerawan.+
Willakuykuna
^ Utaq: “Tiyasqanpa”.
^ Utaq: “Sua”.
^ Utaq: “Punta naceq”.
^ Utaq: “Sua”.
^ Utaq: “Qullqipaq piwanpas kakuq”.
^ “Perez” ninanqa: “Kichaq”, ninanmi.
