Genesis 7:1-24
7 Chaymantam Noeyta Jehova Dios nirqa: “Wasi hina hatun buqueman* aylluykikunawan yaykuy, qamllam kay tiempopi runakunamanta allin ruwaqqa kanki.+
2 Ñuqaman quwanaykichikpaq hina animalkunamantam qanchista*+ yaykuchinki urqutawan chinata. Mana quwanaykichikpaq hina kaqkunamantañataqmi huk parisllata yaykuchinki.
3 Alton pawaqkunamantañataqmi qanchista* yaykuchinki urqutawan chinata, chaynapi kay allpa pachamanta mana chinkananpaq.+
4 Kay allpa pachamanmi qanchis punchawllamantaña parachimusaq+ 40 punchaw hinaspa 40 tuta,+ chaynapim chinkachisaq kay pachapi kawsaq llapallan unanchasqaykunata”, nispa.+
5 Noeyqa Jehova Diospa tukuy ima kamachisqantam kasukurqa.
6 Noeyqa 600 watayuqmi karqa kay allpa pachaman yaku huntaruptinqa.+
7 Nisyullay-nisyu para manaraq chayamuchkaptinmi Noeyqa wasi hina hatun buqueman yaykurqa warminwan, churinkunawan hinaspa llumchuyninkunawan.+
8 Yaykurqataqmi Diosman qunapaq hina animalkuna, Diosman mana qunapaq hina animalkuna, alton pawaqkuna hinaspa qasqunpa puriq animalkunapas.+
9 Llapallankum Noeypa kasqanman rirqaku, hinaspam yaykurqaku parisnintinkama. Chayqa karqa Noeyta Diospa kamachisqanman hinam.
10 Chaymi qanchis punchawmanta kay pachaman nisyullay-nisyu para chayamurqa.
11 Noey 600 watanpi kachkaptinmi iskay kaq killapa 17 kaq punchawninpi hanaq pachapi kaq achkallay-achka yaku tuqyarurqa hinaspam tallikaykamurqa.+
12 Nisyu-nisyutam paramurqa kay allpa pachaman 40 punchaw hinaspa 40 tuta.
13 Parayta qallarisqan punchawmi Noeyqa wasi hina hatun buqueman yaykurqa warminwan, churinkunawan chaynataq kimsan llumchuyninkunapiwan.+ Churinkunapa sutinmi karqa Sem, Cam hinaspa Jafet.+
14 Paykunawantaqmi yaykurqa tukuy rikchaq lliw purun animalkuna, tukuy rikchaq lliw uywa animalkuna, tukuy rikchaq lliw qasqunpa puriq animalkuna, tukuy rikchaq lliw alton pawaqkuna chaynataq lliw raprayuq animalkunapas.
15 Tukuy rikchaq animalkunam* Noeypa kasqanman rirqaku, hinaspam parisnintinkama wasi hina hatun buqueman yaykurqaku.
16 Chaynapim tukuy rikchaq animalkuna urquntin chinantin yaykurqaku Noeyta Dios kamachisqanman hina. Noey yaykuruptinñataqmi Jehova Diosqa punkuta wichqarurqa.
17 Kay pachamanmi mana usyaykuspan nisyullay-nisyuta 40 punchaw paramurqa. Chaymi yakuqa quchayta qallaykuspan wasi hina hatun buqueta wampurachirqa.
18 Yakuqa hinallam tukuy hinastinman huntarqa, buqueñataqmi yakupa hawanpi wampurqa.
19 Yakuqa llumpayta huntaruspanmi kay allpa pachapi hatun urqukunatapas pamparurqaraq.+
20 Yakuqa urqukunatapas yaqa qanchis metrowanraqmi* masyarurqa.
21 Chaymi kay allpa pachapi puchuqkunaqa lliw wañururqaku.+ Wañururqakum alton pawaqkuna, uywa animalkuna, purun animalkuna, kay pachapi tukuy rikchaq uruchakuna* hinaspa llapa runakunapas.+
22 Wañurqakumá lliw kawsaqkuna*.+
23 Diosqa allpa pachapi llapallan kawsaqkunatam wañurachirqa. Wañuchirqam runakunata, animalkunata*, qasqunpa puriq animalkunata hinaspa alton pawaqkunata. Lliwmi chinkachisqa karqa.+ Kawsarqakuqa Noeywan kuska buquepi kaqkunallam.+
24 Kay allpa pachapim yakuqa 150 punchaw qucharayarqa.+
Willakuykuna
^ Utaq: “Arcaman”.
^ Ichapas kanman: “Qanchis parista”, niqpas.
^ Ichapas kanman: “Qanchis parista”, niqpas.
^ Utaq: “Samatyaspa kawsaq animalkunam”.
^ Utaq: “15 kuchuswanraqmi”. Qaway B14 kaq yachachikuyta.
^ Utaq: “Achkanpi huñulla kawsaq uruchakuna”.
^ Utaq: “Samatyaspa kawsaqkunapas”.
^ Utaq: “Tawa chakiyuqkunata”.
