Genesis 43:1-34
43 Canaan allpapiqa hinallam llumpay muchuy* karqa.+
2 Chaymi Egipto nacionmanta kawsaykuna apamusqanku tukuruptin+ churinkunata Jacob nirqa: “Kutispaykichikyá kaqmanta kawsaykunata rantimuychik”, nispa.
3 Chaymi churin Juda nirqa: “Chay runaqa chunkay-chunkaytam nimuwarqaku: ‘Sullkaykichikta mana pusamuwaspaykichikqa amam kutimuwankichikchu*’, nispa.+
4 Sichu sullkaykuta ñuqaykuwan rinanpaq saqiptikiqa kawsaykunata rantiqmi kutisaqku.
5 Manachayqa manam kutisaqkuchu, chay runam niwarqaku: ‘Sullkaykichikta mana pusamuwaspaykichikqa amam kutimuwankichikchu’”, nispa.+
6 Hinaptinmi churinkunata Israel+ nirqa: “¿Imatam kayta ruwaruwankichik? ¿Imapaqtaq chay runamanqa willarqankichik sullkaykichik kasqanta?”, nispa.
7 Churinkunañataqmi nirqaku: “Chay runam pi kasqaykumanta hinaspa ayllunchikmanta tapuwarqaku: ‘¿Kawsakunraqchu taytaykichik? ¿Kanraqchu huk wawqikichikpas?’, nispa. Chaymi tapuwasqankuman hina willakurqaniku.+ Manam yacharqanikuchu ‘sullkaykichiktayá pusamuwaychik’ niwanankutaqa”, nispa.+
8 Chaymi Judaqa taytan Israelta nirqa: “Ñuqapa makiypim kanqa, sullkaytayá pusarullasaq.+ Chaynapi rispayku kawsayta rantimunaykupaq. Manachayqa ñuqaykupas, qampas hinaspa churinchikkunapas wañurusunmi.+
9 Ñuqapa makiypim kanqa, ñuqam mana imapas pasananpaq qawasaq.+ Mana kutichimuptiyqa ñuqachiki wiñaypaq huchayuq kasaq.
10 Mana harkakuwaptikikuqa iskay kutikama riruspapas ñam kutiramuymankuña karqa”, nispa.
11 Hinaptinmi taytanku Israel nirqa: “Rinaykichik kaptinqa wayqaykichikmanyá hinaychik Canaan allpapi imapas allin kaqkunata, hinaspayá chay runaman apaychik.+ Apaychikyá: Miski asnaq aceiteta*,+ mielta, miski asnaq waytapa wiqinta*, wiqisapa sachapa qaranta+ hinaspa almendrastawan pistacho sutiyuq rurukunata.
12 Apasqaykichikmantapas huk chaynatawanraqyá qullqitapas apaychik, kutichiychiktaqyá wayqaykichikpi tarisqaykichik qullqitapas.+ Ichapas pantaruspa hinaramurqaku.
13 Sullkaykichiktapas pusarikuspayá chay runaman kutiychik.
14 Tukuy atiyniyuq Diosyá qamkunata yanapaykusunkichik, chaynapi chay runa llakipayasunaykichikpaq hinaspa wawqikichik Simeontawan Benjaminta kacharimunanpaq. Churiykuna chinkanan kaptinqa imanaspaypas imanasaqmá”, nispa.+
15 Hinaptinmi tukuy chaykunata qipichakuspanku hinaspa qullqitapas huk chaynatawanraq aparikuspanku Egiptota rirqaku Benjaminwan kuska. Chayaruspankuñataqmi Joseypa kasqanman rirqaku.+
16 Paykunawan Benjamin kasqanta rikuykuspanmi Joseyqa wasinpi kamachikuqta nirqa: “Kay runakunata wasiyman pusaruy, hinaspayá animalkunata nakaspa mikuyta yanuramuy. Chawpi punchawtam paykunawan mikusaq”, nispa.
17 Chaymi chay runaqa Joseypa kamachisqanta chaylla ruwaspan wawqinkunata Joseypa wasinman pusarqa.+
18 Hinaptinmi wawqinkunaqa Joseypa wasinman pusaruptin mancharikurqaku, chaymi ninakurqaku: “Kaymanqa pusaramuwanchik punta hamusqanchikpi qullqita wayqanchikpi kutichipuwasqanchikmantachá. ¡Kunanqa hapiruwaspanchikchá llamkachikuwasunchik, asnonchikunawanpas qipakunqakuch!”, nispa.+
19 Chaymi Joseypa wasinman manaraq yaykuchkaspanku wasipi kamachikuq runata nirqaku:
20 “Taytáy, qaynam hamurqaniku kawsay rantiq.+
21 Kutispaykum samanaykuman chayaruspa kawsay apasqayku wayqaykuta kicharqaniku, hinaptinmi sapakamapa wayqaykupi qullqiykuqa imam kaqlla kachkasqa.+ Chaymi munachkaniku kikiyku kutiykachiyta.
22 Kunanqa achka qullqitam apamurqaniku kawsayta rantinaykupaq. Manam yachanikuchu pagasqayku qullqiykuta wayqaykuman pim hinaykusqantaqa”, nispa.+
23 Hinaptinmi chay runaqa nirqa: “Ama manchakuychikchu. Taytaykichikpa hinaspa qamkunapa Diosnikichikmi chay qullqitaqa wayqaykichikman hinaykurqa. Chay qullqikichikqa makiymanmi chayamurqa”, nispa. Chaymantam wawqinku Simeonta pusamurqa paykunawan kananpaq.+
24 Hinaspam Joseypa wasinman yaykuykachispa yakuta quykurqa chakinkuta mayllakunankupaq, asnonkumanpas mikunantam quykurqa.
25 Joseypa wawqinkunaqa yacharurqakum chawpi punchawta Josey chayamuspa paykunawan mikunanta,+ chaymi apamusqankuta hurqurqaku Joseyman qunankupaq.+
26 Josey wasinman chayaramuspa yaykuykamuptinñataqmi apamusqankuta quykuspanku ñawpaqninpi qunqurakuykuspa pampakama kumuykurqaku.+
27 Chaymantam Joseyqa tapurqa imayna kasqankumanta, tapurqataqmi: “¿Imaynallataq kachkan willawasqaykichik yuyaqña taytaykichikqa? ¿Kawsakuchkanraqchu?”, nispa.+
28 Paykunañataqmi nirqaku: “Taytaykuqa allinllam kachkan, kawsakuchkanraqmi”, nispa. Hinaspam kaqllamanta kumuykurqaku.+
29 Joseymi qawariykuspan mamanmanta kaq wawqin Benjaminta rikururqa,+ chaymi paykunata nirqa: “¿Paychu willawasqaykichik sullka kaq wawqikichik?”, nispa.+ Hinaspam Benjaminta nirqa: “Diosyá yanapasunki churilláy”, nispa.
30 Benjaminta rikuykuptinmi Joseytaqa yaqalla wiqin atiparurqa. Chaymi huklaw cuartoman chaylla rispan chaypiña waqarqa.+
31 Chaymantam sunqun tiyaykuptin uyanta upakurqa, hinaspam lluqsiramuspan nirqa: “Mikuyta qaramuychik”, nispa.
32 Joseymanmi qararqaku sapaq mesapi, wawqinkunamanñataqmi sapaq mesapi, Egipto llaqtayuq runakunamanpas sapaq mesapim qararqaku. Chaynataqa ruwarqaku Egipto llaqtayuq runakunapaq Hebreo runakunawan kuska mikuyqa millakuypaq kasqanraykum.+
33 Joseypa wawqinkunataqa chimpan mesapim tiyachirqaku. Piwi+ kaqmanta* qallaykuspam sullka kaqkama maymi tiyananpi tiyachirqaku. Paykunañataqmi mancharisqallaña qawanakurqaku.
34 Hinaptinmi Joseyqa mesanpi kaq mikuyta wawqinkunapa mesanman apachirqa. Benjaminmanmi wakin wawqinkunaman qarasqanmantapas aswan achkataraq* qarachirqa.+ Chaymi saksanankukama llapanku mikurqaku.
Willakuykuna
^ Utaq: “Yarqay”.
^ Hebreo rimaypiqa nichkan: “Uyaytaqa manam rikunkichikchu”, nispam.
^ Utaq: “Balsamota”.
^ Utaq: “Ladanota”.
^ Utaq: “Punta naceqmanta”.
^ Utaq: “Pichqa kuti chaynataraq”.
