Genesis 20:1-18
-
Abimelecpa makinmanta Sara librasqa kasqanmanta (1-18)
20 Abrahanmi maymi yachasqanmanta* Negueb qichwaman ripukurqa,+ hinaspam Guerar llaqtapi yacharqa. Chay llaqtaqa karqa Cades llaqtamanta Sur llaqtaman rina ñanpim.+ Guerar llaqtapi yachaspanmi+
2 Abrahanqa warmin Saramantam niq: “Payqa paniymi”, nispa.+ Chaymi Guerar llaqtata kamachiq Abimelecqa kamachirqa Sarata pusamunankupaq.+
3 Chaymanta qipatam Abimelecman sueñoyninpi rikuriykuspan Dios nirqa: “Sarata pusachimusqaykiraykuqa wañuruwaqmi,+ payqa qusayuqmi”, nispa.+
4 Abimelecqa manam Sarawanqa puñurqaraqchu. Chaymi tapurqa: “Jehova Dioslláy, ¿mana huchayuq llaqtaytachu chinkarachinki?
5 ¿Manachu Abrahanqa niwarqa: ‘Payqa paniymi’, nispa? ¿Manachu Sarapas niwarqa: ‘Payqa turiymi’, nispa? Ñuqaqa manam llullaytachu kaytaqa ruwarqani”, nispa.
6 Hinaptinmi Diosqa sueñoyninpi nirqa: “Yachanim mana llullaykita ruwasqaykita. Chaymi harkarqayki Sarawan puñuruspa huchallikunaykimanta.
7 Chaynaqa qusanmanyá Sarata kutichipuy, Abrahanqa ñuqamanta willakuqmi*.+ Paymi qampaq mañakunqa,+ chaynapi hinalla kawsakunaykipaq. Mana kutichipuspaykiqa llapallan runaykikunawan kuskam wañunki”, nispa.
8 Chaymi Abimelecqa tutapayta hatarispan serviqninkunata qayaspan chay sueñokusqanta lliwta willarqa. Paykunañataqmi llumpayta mancharikurqaku.
9 Chaymantam Abimelecqa Abrahanta qayaspan nirqa: “¿Imatataq kaytaqa ruwaruwankiku? ¿Imapitaq pantarurqani ñuqatawan runaykunata huchallichiwanaykikupaq? Chay llullakusqaykiqa llumpay mana allinmi”, nispa.
10 Hinaspam Abimelecqa Abrahanta nirqaraq: “¿Imata piensaspataq llullakuwarqanki?”, nispa.+
11 Abrahanñataqmi nirqa: “Kaytam piensarqani: ‘Kaypi runakunaqa manam Diostaqa manchakunkuchu, warmiyraykuchá wañurachiwanqaku’, nispay.+
12 Hinaspapas payqa taytaymanta paniymi, ichaqa manam mamaypa wawanchu. Chayraykum paywan casarakurqani.+
13 Chaymantapas taytaypa wasinmanta lluqsispay kaypi-chaypi yachanaypaq Dios kamachiwaptinmi+ warmiyta nirqani: ‘Kuyawaspaykiqa* maymanpas chayaptinchikmi turiki kasqayta ninki’”, nispa.+
14 Abimelecñataqmi ovejakunatawan vacakunata hinaspa serviqninkunata pusachimuspan Abrahanman quykurqa. Warmin Saratapas kutichipurqam.
15 Abimelecqa nirqataqmi: “Kay qawasqayki allpapipas munasqaykipiyá yachakuy”, nispa.
16 Saratañataqmi nirqa: “Kunanmi turikiman qusaq 1.000 qullqita*.+ Chaynapi qanwan kuska kaqkuna hinaspa hukkuna qanwan imapas mana ruwasqayta yachanankupaq. Chaynapi pipas pinqayman mana churasunaykipaq”, nispa.
17 Hinaptinmi Abrahanqa tukuy sunqunwan Diosta mañakurqa Abimelecpaq. Chaymi Diosqa Abimelecta, warminta hinaspa serviqnin warmikunata hampirurqa, hinaptinmi wawayuq kaytaqa atirqakuña.
18 Abrahanpa warmin Sararaykum Jehova Diosqa Abimelecpa wasinpi llapallan warmikunapa madrinta wichqarurqa.+
Willakuykuna
^ Utaq: “Tiyasqanmanta”.
^ Utaq: “Profetam”. Qaway kay palabrapa ima ninan kasqanta.
^ Kaypiqa rimachkan imaña kaptinpas hinalla kuyananmantam.
^ Utaq: “Rumichakuna hina qullqita”.
